កីឡាជាតិ
ជាតិ
យុវជនជម្រើសជាតិកីឡាចំបាប់៤ នាក់ចេញទៅប្រកួតក្របខណ្ឌអន្តរជាតិនៅថៃ កីឡាករ កីឡាការិនី និងក្រុមគ្រូបង្វឹកនៅមុនចេញដំណើរ។ រូបថត ហ្វេសប៊ុក Vichet Thin
× ក្រុមកីឡាករ កីឡាការិនីយុវជនជម្រើសជាតិកីឡាចំបាប់ខ្មែរចំនួន ៤ រូបនឹងចាកចេញពីប្រទេសកំណើតនៅវេលាម៉ោង ១០:១៥ នាទី ព្រឹកថ្ងៃទី ៧ ឧសភា នេះតាមជើងហោះហើរភ្នំពេញ – បាងកក ដើម្បីទៅប្រកួតជម្រុះក្នុងពានរង្វាន់អន្តរជាតិសំខាន់ៗ ចំនួន ២ នៅប្រទេសថៃ។
កម្មវិធីប្រកួតទាំង ២ មាន វគ្គជម្រុះជើងឯកអាស៊ី និង វគ្គជម្រុះពានរង្វាន់យុវជនអូឡាំពិក ដែលរៀបចំឡើងនៅក្រុងបាងកក ចាប់ពីថ្ងៃទី ៨ ដល់ ១១ ឧសភា ខាងមុខនេះ។
ការប្រកួតនេះ ជាដំណើរឆ្ពោះទៅកាន់ការប្រកួតអូឡាំពិកយុវជនរដូវក្ដៅលើកទី២ ក្នុងខែកញ្ញា នៅទីក្រុងណាននីង ប្រទេសចិន និង ប្រកួតAsian Games នៅខែ តុលា – វិច្ឆិកា នៅទីក្រុង Incheon ប្រទេសកូរ៉េខាងត្បូង។
កីឡាករកីឡាការិនី របស់កម្ពុជាចំនួន ៤ រូបនេះរួមមាន កីឡាករ ងួន មករា ប្រកួតក្នុងប្រភេទទម្ងន់៦៣គីឡូក្រាម កីឡាករ ម៉ុល រស្មី ប្រកួតក្នុងទម្ងន់៥៥គីឡូក្រាម កីឡាការិនី នី សំណាង ម្ចាស់មេដាយមាស ស៊ីហ្គេមទី២៧នៅមីយ៉ាន់ម៉ាប្រកួតក្នុងប្រភេទទម្ងន់ ៦៣គីឡូក្រាម និង កីឡាការិនី ឌន ស្រីម៉ៅ ប្រកួតក្នុងប្រភេទទម្ងន់ ៥២គីឡូក្រាម ខណៈក្រុមទាំងមូលដឹកនាំដោយលោក Casey Barnett អនុប្រធានទី ១ សហព័ន្ធកីឡាចំបាប់កម្ពុជា និង លោកធិន វិចិត្រ ជាគ្រូបង្វឹក៕
© រក្សាសិទ្ធិដោយ thmeythmey.com