កីឡាជាតិ
ជាតិ
Singapore Cup៖ ស្វាយរៀងប៉ះ Albirex Niigata Singapore នៅម៉ោង៦:៣០ល្ងាចនេះ
× ក្លិបកីឡាបាល់ទាត់ស្វាយរៀង នឹងចាប់ផ្តើមការប្រកួតក្នុងព្រឹត្តិការណ៍ Singapore Cup ជាលើកដំបូងរបស់ខ្លួន ខណៈពួកគេត្រូវជួបជាមួយក្លិប Albirex Niigata Singapore នាវេលាម៉ោង៦ និង៣០នាទី (ម៉ោងនៅកម្ពុជា) ល្ងាចថ្ងៃពុធ ទី២៨ ខែឧសភា នេះ នៅកីឡដ្ឋាន Jalan Besar Stadium ប្រទេសសិង្ហបុរី។
Albirex Niigata Singapore គឺជាក្លិបនៃសហគមន៍ជនជាតិជប៉ុនដែលលេងនៅក្នុងក្របខណ្ឌ S.League របស់សិង្ហបុរី ចាប់តាំងពីឆ្នាំ២០០៤ មក។ ចំពោះការប្រកួតក្នុងព្រឹត្តិការណ៍ Singapore Cup ចំនួន១០លើកកន្លងមក Albirex ធ្លាប់ឈានដល់វគ្គផ្តាច់ព្រ័ត្រកាលពីឆ្នាំ២០១១ ខណៈកាលពីរដូវកាលមុន ពួកគេធ្លាក់នៅជុំទីមួយ។ ដោយឡែក ស្វាយរៀងដែលដឹកនាំបង្វឹកដោយលោក សំ វ៉ាន់ដេត នឹងបង្ហាញវត្តមានជាលើកដំបូង ហើយក្នុងដំណើរទៅកាន់សិង្ហបុរីនេះ លោកបានអមដំណើរដោយកីឡាករចំនួន១៨នាក់ ក្នុងនោះកីឡាករបរទេសបីនាក់។
ក្លិបមួយទៀតរបស់កម្ពុជាដែលត្រូវបានអញ្ចើញឲ្យចូលរួមក្នុងព្រឹត្តិការណ៍នេះ គឺក្លិបណាហ្គាខប ដោយពួកគេត្រូវប៉ះជាមួយម្ចាស់ការពារតំណែងជើងឯក Home United នាថ្ងៃសុក្រខាងមុខ៕
© រក្សាសិទ្ធិដោយ thmeythmey.com