កីឡាជាតិ
ជាតិ
យុទ្ធនាការដណ្តើមខ្សែក្រវាត់ Black Pantherនៅតាកែវទទួលបានការគាំទ្រច្រើន
× បន្ទាប់ពីខេត្តកំពង់ធំ និងកំពង់ចាម យុទ្ធនាការប្រកួតដណ្តើមខ្សែក្រវាត់ Black Panther ទម្ងន់៦៣,៥គីឡូក្រាម បានបោះជំហានទៅកាន់ខេត្តតាកែវកាលពីថ្ងៃសៅរ៍ម្សិលមិញនៅក្នុងទីលានបាល់ទាត់សាលាភូមិភាគខេត្ត។ ការប្រកួតបានទទួលបាននូវផ្លែផ្កាជាច្រើនដោយសារមានការជួយជ្រោមជ្រែងពីលោក ឡាយ វណ្ណៈ ដែលជាអភិបាលខេត្ត។
សម្រាប់ការប្រកួតវិលជុំលើកទី៣នេះ ក្នុងចំណោមកីឡាករទាំង១២នាក់មកពីសមាគម និងក្លិបប្រដាល់ផ្សេងៗពីគ្នានោះ មានកីឡាករបីនាក់កំពុងមានពិន្ទុនាំមុខគេគឺ ឈិន ក្វាន់ង៉ុយ តក់ សោភ័ណ្ឌ និងផាន់ សុវណ្ណ ដោយពួកគេមាន៩ពិន្ទុក្រោយឈ្នះបីប្រកួតជាប់ៗគ្នា។
កីឡាករ ឃឹម ពេជ្រចិន្តា និង សោម តឿទី មានម្នាក់៧ពិន្ទុនៅក្នុងដៃ តាមរយៈការប្រកួតឈ្នះ២ និងចាញ់១ប្រកួត ខណៈ សល់ ប៊ុនហ៊ូវ សួស យ៉ាត និង ផាន់ សារុន មាន៥ពិន្ទុស្មើគ្នា។ កីឡាករបីនាក់ទៀតដែលមិនទាន់ស្គាល់ថាឈ្នះនោះ គឺ ឡៅ ផានាថ ឡុង ប៊ុនរ៉ាត និងផល សីហា។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជាប្រធានបេសកកម្មព្រឹត្តិការណ៍នេះមានប្រសាសន៍ថា យុទ្ធនាការនេះនឹងចល័តបន្តទៅខេត្តបន្ទាយមានជ័យ ខេត្តឧត្តរមានជ័យ និងខេត្តព្រះវិហារ ទើបវិលមកប្រកួតបញ្ចប់នៅរាជធានីភ្នំពេញ នាថ្ងៃទី១៣ ខែកក្កដា ឆ្នាំ២០១៤ ។
លោក វ៉ាត់ ចំរើន បានសរសើរចំពោះកិច្ចសហការរៀបចំព្រឹត្តិការណ៍នេះនៅខេត្តតាកែវ ជាពិសេសការជួយជ្រោមជ្រែងរបស់លោក ឡាយ វណ្ណៈ ដែលជាអភិបាលខេត្ត ជាពិសេសលោកបានឧបត្ថម្ភដោយផ្ទាល់ដល់កីឡាករ និងគណៈកម្មការប្រកួត។
បើតាមលោក រាជ សុផែនប្រធានបច្ចេកទេស ការប្រកួតលើកនេះទទួលបានការគាំទ្រច្រើនពីមហាជនបើទោះបីមានភ្លៀងដក់ទឹកក៏ដោយ។ នៅក្នុងការប្រកួតចំនួន៦គូគឺមានសន្លប់តែមួយគូប៉ុណ្ណោះក្រៅពីនេះមានចាញ់ឈ្នះត្រឹមពិន្ទុដែលមានការប្រកួតគ្នា៥ទឹកពេញ៕
អត្ថបទ ណារាជ
© រក្សាសិទ្ធិដោយ thmeythmey.com