កីឡាជាតិ
ជាតិ
សង្គមជាតិ
«ហ្វេសប៊ុក»ក្លាយជារបាំងនៃការទប់ស្កាត់ល្បែងភ្នាល់បាល់នៅកម្ពុជា
× គិតមកដល់ថ្ងៃ១៤ ខែមិថុនានេះ អគ្គស្នងការដ្ឋាននគរបាលជាតិ នៅមិនទាន់ទទួលរបាយការណ៍ អំពីតុល្យការណ៍ចុងក្រោយនៃបទល្មើសដែលកើតចេញពីការភ្នាល់បាល់ នៃការប្រកួត World Cup នារដូវកាលឆ្នាំ២០១៤នេះនៅឡើយទេ។ ប៉ុន្តែមន្ត្រីនាំពាក្យនៃអគ្គស្នងការដ្ឋាននគរបាលជាតិ បានបង្ហាញការលំបាកមួយចំនួនរបស់សមត្ថកិច្ច ក្នុងការទប់ស្កាត់បទល្មើសល្បែងស៊ីសងភ្នាល់បាល់ ដោយសារអ្នកប្រព្រឹត្តិបានប្រើប្រព័ន្ធបច្ចេកវិទ្យា និងបណ្ដាញទំនាក់ទំនងសង្គមដើម្បីប្រព្រឹត្តិបទល្មើស។
បច្ចេកវិទ្យាទូរស័ព្ទ ហ្វេសប៊ុក និងបណ្ដាញទំនាក់ទំនងតាមអ៊ីធឺណែតមួយចំនួនទៀត កំពុងក្លាយជាឧបសគ្គរបស់កម្លាំងសមត្ថកិច្ចកម្ពុជា ក្នុងការទប់ស្កាត់បទល្មើសល្បែងស៊ីសង ពិសេសល្បែងភ្នាល់បាល់នៃការប្រកួតបាល់ទាត់ពិភពលោកឆ្នាំ២០១៤នេះ។ លោកឧត្តមសេនីយ៍ឯក គៀត ច័ន្ទថារីទ្ធ អ្នកនាំពាក្យនៃអគ្គស្នងការដ្ឋាននគរបាលជាតិ បានបង្ហាញអំពីភាពវិជ្ជមាននៃការទប់ស្កាត់ល្បែងស៊ីសង ជាពិសេសល្បែងភ្នាល់បាល់ ដែលអគ្គស្នងការសម្រេចបានកន្លងមក ហើយថា សម្រាប់ការប្រកួតបាល់ទាត់ពិភពលោកនាឆ្នាំ២០១៤នេះ កម្លាំងសមត្ថកិច្ចក៏កំពុងដុតដាំដុតជើងដើម្បីបន្តទប់ស្កាត់បទល្មើសដែលកើតចេញពីការភ្នាល់បាល់នេះផងដែរ។ ក៏ប៉ុន្តែជាមួយគ្នានេះ បញ្ហាចោទនៃភាពទំនើបរបស់ប្រព័ន្ធបច្ចេកវិទ្យា កំពុងក្លាយជារបាំងនៃការស្កាត់របស់កម្លាំងសមត្ថកិច្ច។
ថ្លែងប្រាប់គេហទំព័រថ្មីៗនៅព្រឹកថ្ងៃសៅរ៍នេះ លោក ឧត្តមសេនីយ៍ឯក បានបង្ហាញអំពីភាពលំបាករបស់កម្លាំងសមត្ថកិច្ចចំពោះការទប់ស្កាត់បទល្មើសល្បែងស៊ីសង ពិសេសល្បែងភ្នាល់បាល់ បើទោះជាចំណាត់ការរបស់អគ្គស្នងការបានបញ្ចប់ទាំងស្រុងលើករណីភ្នាល់បាល់ជាសាធារណៈស្ទើតែ១០០ភាគរយនោះហើយក៏ដោយ។ លោកបានសង្កត់ធ្ងន់ថា៖ «នៅពេលនេះ យើងកំពុងជួបបញ្ហាចោទ ដែលនាំឲ្យពិបាកដល់កម្លាំងដែលត្រូវចុះបង្ក្រាប់ល្បែងភ្នាល់បាល់។ ពីព្រោះពេលនេះគេឈប់ភ្នាល់តាមរោងកាហ្វេ តាមកន្លែងភ្នាល់ ឬជាសាធារណៈហើយ ប៉ុន្តែយើងដឹងថាពួកគេបានងាកទៅប្រើប្រព័ន្ធបច្ចេកវិទ្យាដូចជាទូរសព្ទ ហ្វេសប៊ុក និងប្រព័ន្ធទំនាក់ទំនងតាមអ៊ីនធឺណែតផ្សេងៗទៀត ដើម្បីប្រព្រឹត្តិបទល្មើស។ ដូច្នេះយើងពិបាកនឹងរកភស្តុតាងដើម្បីដាក់បន្ទុកពួគេ។ ប៉ុន្តែយើងនៅតែព្យាយាមរកវិធីទប់ស្កាត់ឲ្យបានអស់ពីលទ្ធភាព»។
ការប្រកួតបាល់ទាត់ពិភពលោក World Cup ២០១៤ បានឈានចូលដល់ថ្ងៃទី៣ហើយ សម្រាប់រយៈពេលប្រកួត ដែលរៀបចំឡើងជិត១ខែនោះ។ ប្រទេសកម្ពុជាតែងតែទទួលរងផលអវិជ្ជមានពីការប្រកួតនេះ ដោយសារតែមានពលរដ្ឋមួយចំនួនវក់វីនឹងការភ្នាល់បាល់ រហូតឈានទៅដល់ការបង្កបញ្ហាអសន្តិសុខដល់សង្គមទៀតផង។ រហូតមកដល់ថ្ងៃសៅរ៍នេះ អគ្គស្នងការដ្ឋាននគរបាលជាតិ នៅមិនទាន់ទទួលបានរបាយការណ៍ ដែលបញ្ជាក់អំពីបទល្មើសកើតចេញពីការភ្នាល់បាល់ទាត់ពិភពលោកនោះនៅឡើយទេ។ នេះបើតាមការបញ្ជាក់ពីលោកឧត្តមសេនីយឯក គៀត ច័ន្ទថារីទ្ធ។
យ៉ាងណាក៏ដោយមន្ត្រីប៉ូលីសជាន់ខ្ពស់រូបនេះ បានអះអាងថាអគ្គស្នងការនគរបាលជាតិ បានបញ្ជាទៅគ្រប់ប៉ុស្ត៍នគរបាលរដ្ឋបាលថ្នាក់ឃុំ សង្កាត់ទូទាំងប្រទេស ឲ្យបង្កើនការតាមដានការប្រព្រឹត្តិល្បែងភ្នាល់បាល់ និងជួយអប់រំដល់ប្រជាពលរដ្ឋឲ្យបាយល់អំពីផលលំបាក់នៃការប្រព្រឹតិ្ត និងការប្រឈមចំពោះចំណាត់ការច្បាប់ជាដើមនោះ៕
© រក្សាសិទ្ធិដោយ thmeythmey.com