កីឡាអន្តរជាតិ
អន្តរជាតិ
Suarez សុំអភ័យទោស Chiellini ជុំវិញឧប្បត្តិហេតុខាំ
× ខ្សែប្រយុទ្ធអន្តរជាតិអ៊ុយរូហ្គាយដែលខូចឈ្មោះ Luis Suarez កាលពីថ្ងៃចន្ទបានធ្វើការសុំអភ័យទោសទៅកាន់ខ្សែការពារអន្តរជាតិអ៊ីតាលី Giorgio Chiellini សម្រាប់ការប្រើធ្មេញខាំដែលបានធ្វើឲ្យរូបគេរងពិន័យព្យួររយៈពេលបួនខែពីគ្រប់សកម្មភាពបាល់ទាត់ និង៩ប្រកួតសម្រាប់ក្រុមជម្រើសជាតិ ដែលបង្ខំឲ្យរូបគេចេញពីយុទ្ធនាការ World Cup។
Suarez បានទទួលស្គាល់ថា កីឡាកររបស់អ៊ីតាលី ពិតជាត្រូវបានរូបគេខាំមែន។ ខ្សែប្រយុទ្ធរបស់ក្លិប Liverpool វ័យ២៧ឆ្នាំរូបនេះ បាននិយាយថា៖ «ខ្ញុំពិតជាសោកស្តាយណាស់ចំពោះអ្វីដែលបានកើតឡើង»។
កីឡាកររូបនេះ បានបញ្ជាក់នៅក្នុងសេចក្តីថ្លែងការណ៍មួយនៅលើបណ្តាញសង្គម Twitter របស់ខ្លួនថា៖ «ខ្ញុំសុំទោសចំពោះ Giorgio Chiellini និងក្រុមគ្រួសារកីឡាបាល់ទាត់ទាំងមូល។ ខ្ញុំសន្យាជាសាធារណៈថា វានឹងមានរឿងរ៉ាវបែបនេះកើតឡើងម្តងទៀតឡើយ»។
Chiellini ដែលបាននិយាយថា ការដាក់ពិន័យព្យួរនេះ មានកម្រិតធ្ងន់ធ្ងរពេកហើយនោះ បានប្រតិកម្មភ្លាមៗចំពោះការសុំទោសរបស់ Suarez។ រូបគេបានឲ្យដឹងនៅលើបណ្តាញសង្គម Twitter ថា៖ «រឿងរ៉ាវនេះត្រូវបានបំភ្លេចចោលអស់ហើយ។ ខ្ញុំសង្ឃឹមថា FIFA នឹងកាត់បន្ថយការដាក់ពិន័យព្យួររបស់អ្នក»។
ប្រធានាធិបតីអ៊ុយរូហ្គាយ ក៏បានរិៈគន់ខ្លាំងៗផងដែរចំពោះ FIFA ទាក់ទងនឹងការពិន័យនេះ៕
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com