កីឡាអន្តរជាតិ
អន្តរជាតិ
អ្នកគាំទ្រចង់ឲ្យ Tim Howard ទទួលបានការតែងតាំងជារដ្ឋមន្ត្រីការពារជាតិ
× នាពេលបច្ចុប្បន្ន អ្នកចាំទី Tim Howard កំពុងក្លាយជាវីរបុរសរបស់សហរដ្ឋអាមេរិក បន្ទាប់ពីរូបគេបានសង្គ្រោះបាល់រហូតដល់ទៅ១៦លើកនាជំនួបវគ្គ១៦ក្រុមចុងក្រោយក្នុងព្រឹត្តិការណ៍ World Cup នៅប្រទេសប្រេស៊ីល បើទោះបីជាអាមេរិកចាញ់បែលហ្ស៊ិក ២-១ ក៏ដោយ។
ដើម្បីលើកកិត្តិយសដល់វីរបុរសរបស់ខ្លួន ក្រុមអ្នកគាំទ្រកីឡបាល់ទាត់ បាននាំគ្នាធ្វើញត្តិចំនួនពីរនៅលើគេហទំព័រផ្លូវការរបស់សេតវិមាន ដែលទីមួយ ពួកគេចង់ដូរឈ្មោះអាកាសយានដ្ឋាន Ronald Reagan Washington National Airport ទៅជាឈ្មោះ Howard និងទីពីរ ពួកគេចង់ឃើញការតែងតាំង Howard ជារដ្ឋមន្ត្រីក្រសួងការពារជាតិ នាពេលអនាគត។
សម្រាប់អ្នកនាំពាក្យសេតវិមាន លោក Josh Earnest វាជារឿងកំប្លែងមួយក្នុងការតែងតាំង Tim Howard ជារដ្ឋមន្ត្រីក្រសួងការពារជាតិ ប៉ុន្តែលោកប្រធានាធិបតី បារ៉ាក់ អូបាម៉ា ពិតជារីករាយនូវអ្វីដែលអ្នកចាំទីរូបនេះ បានបំពេញនៅក្នុងព្រឹត្តិការណ៍ World Cup ។ ប្រមុខសេតវិមានក៏បានទូរសព្ទផងដែរទៅកាន់ Howard និងប្រធានក្រុម Clint Dempsey ដើម្បីអបអរដល់ពួកគេ។
នៅលើគេហទំព័ររបស់សេតវិមាន (whitehouse.gov) ពលរដ្ឋអាមេរិកអាចមានសិទ្ធិសរសេរញត្តិបាននៅលើផ្នែក «We the People»។ រដ្ឋបាលលោក អូបាម៉ា ក៏បានបញ្ជាក់ផងដែរថា ញត្តិដែលមានសំឡេងគាំទ្ររហូតដល់១សែនសំឡេងក្នុងរយៈពេល១ខែ នឹងទទួលបាននូវការឆ្លើយតបជាផ្លូវការ។ បើគិតត្រឹមរសៀលថ្ងៃព្រហស្បតិ៍នេះ ញត្តិដែលចង់ឲ្យដូរឈ្មោះព្រលានយន្តហោះ Reagan ទៅជា Howard មានសំឡេងគាំទ្រជាង១៣០០ ខណៈញត្តិដែលចង់ឲ្យ Howard ក្លាយជារដ្ឋមន្ត្រីការពារជាតិ មានសំឡេងគាំទ្រ ជាង៨០០សំឡេង។ បើសិនញត្តិទាំងនេះ ឈានទៅដល់គោលដៅមុនថ្ងៃទី៣១ ខែកក្កដា អ្នកគាំទ្រនឹងទទួលបាននូវការឆ្លើយតបពីសេតវិមាន។
លោក Chuk Hagel រដ្ឋមន្ត្រីការពារជាតិរបស់សហរដ្ឋអាមេរិក ក៏បានប្រើគណនី Twitter ដើម្បីអបអរដល់ Howard ផងដែរ។ លោកបានសរសេរថា «អរគុណដែលបានការពារសហរដ្ឋអាមេរិក។ យើងជាជនជាតិអាមេរិក មានមោទនភាពខ្លាំងណាស់ចំពោះក្រុមកីឡាបាល់ទាត់ជម្រើសជាតិ»៕
© រក្សាសិទ្ធិដោយ thmeythmey.com