អន្តរជាតិ
Kaka ចុះកិច្ចសន្យាលេងនៅក្លិបក្នុងលីកកំពូលអាមេរិក
× កីឡាករបាល់ទាត់ខ្សែបម្រើប្រយុទ្ធដ៏ល្បីល្បាញក្នុងពិភពលោកនាទសវត្សឆ្នាំ ២០០០ ជនជាតិប្រេស៊ីល Ricardo Kaka បានសម្រេចចុះកិច្ចសន្យារួមរស់ជាមួយក្លិប Orlando City SC នៃលីកកំពូលអាមេរិក Major Soccer League (MSL) នៅរដូវកាល ២០១៥ ខាងមុខ។
កីឡាករវ័យ ៣២ ឆ្នាំរូបនេះបានបញ្ចប់អាជីពរបស់ខ្លួននៅតំបន់អឺរ៉ុបក្រោយពេលក្រុមខ្លាំងរបស់ប្រទេសអ៊ីតាលី AC Milan មិនព្រមបន្តកុងត្រាជាមួយគេតទៅទៀត ខណៈសព្វថ្ងៃ Kaka កំពុងខ្ចីជើងនៅក្លិប São Paulo ឯប្រទេសកំណើត។
ក្លិប Orlando City SC បានផ្សាយនៅលើគេហទំព័រខ្លួនកាលពីថ្ងៃទី ១ កក្កដា ថ្មីៗ នេះថា ក្លិបបានចុះកិច្ចសន្យាកក់ទុកមុនជាមួយកីឡាករ Kaka ក្នុងរយៈពេលច្រើនឆ្នាំ ស្របពេលកីឡាករ FIFA World Player of the Year ឆ្នាំ ២០០៧ រូបនេះនឹងបង្ហាញខ្លួនជាលើកដំបូងនៅរដូវកាលថ្មី ដែលនឹងបើកក្នុងខែមករា ឆ្នាំ ២០១៥។
ធ្លាប់ចំណាយជីវិតលើទឹកដីអឺរ៉ុបប្រមាណជាង ១០ ឆ្នាំ Kaka បាននិយាយថា៖ «ថ្នាក់ដឹកនាំក្លិប Orlando City SC ធ្លាប់ប្រាប់ខ្ញុំថាពួកគេចង់បង្កើតក្លិបមួយដ៏ខ្លាំងប្រចាំប្រទេសអាមេរិក។ យើងធ្លាប់និយាយគ្នាជាច្រើនតាំងពីឆ្នាំ២០១២ មកម៉្លេះ ប៉ុន្ដែពេលនេះយើងបានសម្រេចបំណងធ្វើកិច្ចកាសំខាន់ជាមួយគ្នាហើយ»។
លោក Phil Rawlins ប្រធានក្លិប Orlando City SC បានលើកឡើងថា៖ «យើងមិនត្រឹមតែទិញតារាបាល់ទាត់ល្បីរបស់ប្រទេសប្រេស៊ីលទេ តែយើងទិញតារាល្បីប្រចាំពិភពលោក។ ឥឡូវនេះយើងបានកសាងកំណត់ត្រាថ្មីនៅ MLS»។
Kaka ជាយុវជនថ្នាលរបស់ក្លិប Sao Paulo ប្រទេសប្រេស៊ីល ចាប់ពីឆ្នាំ ១៩៩៤ ដល់ ២០០០ ហើយនៅឆ្នាំ ២០០១ ដល់ ២០០៣ ក្លិបបានជ្រើសឱ្យចូលលេងក្នុងឈុតធំនៅលីកកំពូលរបស់ប្រទេស។ ដោយសារសមត្ថភាពលើទីលានរបស់ខ្លួន ក្លិប AC Milan របស់អ៊ីតាលី បានទៅចចារ Kaka ឱ្យទៅកាន់កីឡដ្ឋាន San Siro ចាប់ពីឆ្នាំ ២០០៣ ដល់ ២០០៩។ ចេញពីអ៊ីតាលី Kaka បានទៅជាន់ទឹកដីអេស៉្បាញម្ដង ដោយចូលរួមជាមួយក្រុម Real Madrid នៅឆ្នាំ ២០០៩ ដល់ ២០១៣។ នៅរដូវកាល ២០១៣ – ២០១៤ នេះ Milan បានហៅរូបគេត្រឡប់មកវិញ ខណៈពាក់កណ្ដាលរដូវកាលបានឱ្យក្លិប Sao Paulo ខ្ចីជើង៕
ប្រែសម្រួល៖ ប៉ែន ប៉ារ៉ាឌី
© រក្សាសិទ្ធិដោយ thmeythmey.com