កីឡាអន្តរជាតិ
អន្តរជាតិ
ហូឡង់ និងអាហ្សង់ទីនប្រជែងគ្នាដើម្បីឡើងទៅជួបអាល្លឺម៉ង់នៅវគ្គផ្តាច់ព្រ័ត្រ
× ខណៈដែលក្រុមជើងខ្លាំងអាល្លឺម៉ង់កំពុងតែរង់ចាំនៅវគ្គផ្តាច់ព្រ័ត្រ ក្រុមបាល់ទាត់ជម្រើសជាតិអាហ្សង់ទីន និងហូឡង់នឹងត្រូវប្រឈមមុខនឹងភាពស្វិតស្វាញមួយក្នុងការប្រកួត World Cup វគ្គពាក់កណ្តាលផ្តាច់ព្រ័ត្ររបស់ពួកគេនៅរាត្រីនេះ។
ការប្រកួតនេះ ដែលនឹងចាប់ផ្តើមដំណើរការនៅទីក្រុង Sao Paulo នាវេលាម៉ោង៣ទៀបភ្លឺ (ម៉ោងនៅកម្ពុជា) នឹងក្លាយជាជំនួបមួយរវាងខ្សែប្រយុទ្ធដ៏ឆ្នើម Lional Messi និង Arjen Robben។ ក្រោយពីការទទួលជ័យជម្នះដ៏ធំក្នុងលទ្ធផល ៧-១ របស់អាល្លឺម៉ង់ លើក្រុមជម្រើសជាតិប្រេស៊ីល វាក៏នឹងមានសម្ពាធថ្មីមួយកំពុងតែកើតឡើងរវាងក្រុមនៅអឺរ៉ុប និងអាមេរិកខាងត្បូងផងដែរ។ ប៉ុន្តែ ខ្សែប្រយុទ្ធអន្តរជាតិហូឡង់ Robin van Persie ដែលក៏ជាប្រធានក្រុមផងដែរនោះ កំពុងតែជួបភាពស្រពេចស្រពិលដោយសារតែបញ្ហាក្រពះ ខណៈដែលក្រុមជម្រើសជាតិអាហ្សង់ទីនត្រូវតែលេងដោយគ្មានវត្តមានរបស់ខ្សែបម្រើដ៏មានឥទ្ធិពល Angel di Maria ដោយសារតែបញ្ហារបួសភ្លៅ។
លោក Louis van Gaal គ្រូបង្វឹកនៃក្រុមបាល់ទាត់ជម្រើសជាតិហូឡង់ បាននិយាយថា វានៅតែមានភាពមិនច្បាស់លាសថា Van Persie របស់ក្លិប Manchester United នឹងអាចចូលលេងក្នុងជម្រើសទាំង១១នាក់នៅឯកីឡដ្ឋាន Corinthians Arena ឬយ៉ាងណាឡើយ។
គ្រូបង្វឹកវ័យ៦២ឆ្នាំរូបនេះ ដែលក្រុមរបស់លោកបានឈ្នះការស៊ុតប៉េណាល់ទីលើក្រុមកូស្តារីកាក្នុងវគ្គ៨ក្រុមចុងក្រោយនោះ បានឲហយដឹងថា៖ «នៅរាត្រីនេះ ខ្ញុំនឹងត្រូវធ្វើការសម្រេចផ្សេងៗ ។ យើងមានរយៈពេលច្រើនជាង២៤ម៉ោងនៅមុនពេលការប្រកួតនេះ ហើយ Robin van Persie ពិតជាកីឡាករដ៏សំខាន់សម្រាប់យើង»។
លោក Van Gaal ក៏ជួបភាពស្រពេចស្រពិលជុំវិញខ្សែការពារកណ្តាល Ron Vlaar ដែលជួបបញ្ហារបួសជង្គង់ផងដែរ។ ប៉ុន្តែ ខ្សែបម្រើដ៏មានឥទ្ធិពល Nigel de Jong បានវិលទៅហ្វឹកហាត់វិញដ៏មិននឹកស្មានដល់កាលពីថ្ងៃអង្គារ ពោលគឺក្នុងរយៈពេលមួយសប្តាហ៍ ក្រោយពីត្រូវបានប្រកាសដកខ្លួនចេញពីយុទ្ធនាការដោយសារតែបញ្ហាក្រលៀន។
ស្របពេលជាមួយគ្នានេះ លោក Alejandro Sabella គ្រូបង្វឹកនៃក្រុមជម្រើសជាតិអាហ្សង់ទីន កំពុងតែព្យាយាមយកសម្ពាធចេញពីក្រុមរបស់លោក សម្រាប់ការប្រកួតនៅរាត្រីនេះ តាមរយៈការអះអាងថា ពួកគេបានត្រៀមលក្ខណៈរួចជាស្រេច៕
ជំនួបបីលើកចុងក្រោយរវាងក្រុមទាំងពីរ
21/06/06 World Cup Netherlands 0-0 Argentina
11/02/03 Friendly Netherlands 1-0 Argentina
30/03/99 Friendly Netherlands 1-1 Argentina
ប្រែសម្រួលដោយ ផេង សំណាង
© រក្សាសិទ្ធិដោយ thmeythmey.com