ខ្មែរក្រហម
ជាតិ
សង្គមជាតិ
សាលាក្តីខ្មែរក្រហមរៀបចំសិក្ខាសាលាស្តីពីច្បាប់ព្រហ្មទណ្ឌអន្តរជាតិ និងច្បាប់សិទ្ធិមនុស្ស អង្គជំនុំជម្រះវិសាមញ្ញក្នុងតុលាការកម្ពុជា (“អ.វ.ត.ក”) សហការជាមួយវិទ្យាស្ថានសិទ្ធិមនុស្សនិងច្បាប់ព្រហ្មទណ្ឌអន្តរជាតិ Raoul Wallenberg (RWI) បានរៀបចំសិក្ខាសាលារួមគ្នាកាលពីថ្ងៃទី២២ខែកក្កដាឆ្នាំ២០១៤កន្លងទៅស្តីពីប្រធានបទផ្សេងៗជុំវិញច្បាប់ព្រហ្មទណ្ឌអន្តរជាតិនិងច្បាប់សិទ្ធិមនុស្សដោយមានការចូលរួមពីនិស្សិតផ្នែកច្បាប់មកពីសាកលវិទ្យាល័យនានាចំនួន៩០នាក់។សិក្ខាសាលាទាំងនេះមានគោលបំណងបង្កើនការយល់ដឹងនិងចំណេះដឹងអំពីប្រធានបទទាំងនេះដល់និស្សិតច្បាប់និងសាស្ត្រាចារ្យ/អ្នកស្រាវជ្រាវច្បាប់នៅក្នុងប្រទេសកម្ពុជាព្រមទាំងជាវេទិកាជជែកពិភាក្សារវាងអ្នកច្បាប់នៅអ.វ.ត.កនិងអ្នកសិក្សាស្រាវជ្រាវដើម្បីជួយសម្រួលដល់ការសិក្សាស្រាវជ្រាវ។
លោកនេត្រភក្ត្រាមន្ត្រីនាំពាក្យនៃអង្គជំនុំជម្រះវិសាមញ្ញក្នុងតុលាការកម្ពុជាបានថ្លែងថាសិក្ខាសាលានេះនឹងត្រូវរៀបចំជា១០វគ្គនិងមានរយៈពេល ១០ ខែគ្របដណ្តប់ទៅលើប្រធានបទផ្សេងៗចាប់ពី “ប្រវត្តិនិងវិធីសាស្ត្រនៃការបង្កើតច្បាប់ព្រហ្មទណ្ឌអន្តរជាតិ” រហូតដល់“សារធាតុនៃឧក្រិដ្ឋកម្មប្រល័យពូជសាសន៍” និង“ឯករាជ្យភាពនិងអព្យាក្រិតភាពនៃតុលាការ។សិក្ខាសាលានីមួយៗនឹងមានរយៈពេលប្រមាណពីរម៉ោងដោយមានការធ្វើបទបង្ហាញនិងបន្ទាប់ការពិភាក្សា។វាគ្មិនក្នុងសិក្ខាសាលានេះរួមមានអ្នកជំនាញនៅអ.វ.ត.កនិងអ្នកសិក្សាស្រាវជ្រាវមកពីខាងក្រៅដែលមកធ្វើទស្សនកិច្ចនៅអ.វ.ត.ក។
លោកក្រាញ់តូនីប្រធានការិយាល័យរដ្ឋបាលស្តីទីនៃអង្គជំនុំជម្រះវិសាមញ្ញក្នុងតុលាការកម្ពុជាបានមានប្រសាសន៍ថាការបណ្តុះបណ្តាលនេះនឹងបង្កើនការយល់ដឹងនិងចំណេះដឹងផ្នែកច្បាប់ព្រហ្មទណ្ឌអន្តរជាតិ និងច្បាប់សិទ្ធិមនុស្ស ហើយនឹងផ្តល់ឱកាសដ៏កម្រមួយដែលនិស្សិតទាំងអស់អាចមកជួប និងលើកជាសំណួរទៅកាន់អ្នកជំនាញល្បីៗក្នុងពិភពលោកលើប្រធានបទទាំងនេះ។
ពាក់ព័ន្ធនឹងការផ្សះផ្សាជាតិ លោក ក្រាញ់ តូនីបានមានប្រសាសន៍ថា៖« អ.វ.ត.ក មានអាណត្តិស្វែងរកការពិត និងយុត្តិធម៌សម្រាប់ជនរងគ្រោះនៃរបបខ្មែរក្រហម។ ដូច្នេះ ដំណើរការផ្ទេរចំណេះដឹង និងចំណេះធ្វើនេះអាចចាត់ទុកថាជាយន្តការនៃការផ្សះផ្សាជាតិនៅពេលប្អូនៗជំនាន់ក្រោយមានលទ្ធភាពអាចយកចំណេះដឹងដែលទទួលបានពីសិក្ខាសាលានេះទៅពិចារណា ពិភាក្សា លើកឡើង សរសេរ អនុវត្ត ឬចែករំលែកជាមួយមិត្តភក្តិ ក្រុមគ្រួសារ និងសហគមន៍»។
ប្រធានការិយាល័យរដ្ឋបាលស្តីទីនៃអ.វ.ត.កក៏បានបន្ថែមថាអ.វ.ត.ក មិនត្រឹមតែមានភារកិច្ចស្វែងរកការពិត និងយុត្តិធម៌សម្រាប់ជនរងគ្រោះនៃរបបខ្មែរក្រហមនោះទេ តែក៏បានចូលរួមចំណែកចំពោះកំណែទម្រង់ច្បាប់ និងតុលាការនៅក្នុងប្រព័ន្ធយុត្តិធម៌កម្ពុជា ព្រមទាំងផ្តល់នូវសេចក្តីថ្លៃថ្នូរជូនជនរងគ្រោះ និងកំពុងបិទទំព័រប្រវត្តិសាស្ត្រកម្ពុជាដ៏ខ្មៅងងឹត ដើម្បីឈានដល់គោលដៅនៃការអភិវឌ្ឍន៍សង្គមកម្ពុជាទាំងមូល៕
© រក្សាសិទ្ធិដោយ thmeythmey.com