ពីនេះ ពីនោះ
អន្តរជាតិ
ក្រុងឌូបៃយករថយន្តទំនើបតម្លៃរាប់សិបម៉ឺនដុល្លារមករត់តាក់ស៊ីដោយមិនគិតថ្លៃ
× ក្នុងឱកាសពិធីបុណ្យយានយន្តនៅក្នុងទីក្រុងឌូបៃ ប្រទេសអារ៉ាប់រួម បានតម្រូវឲ្យអ្នកចូលរួមទាំងអស់ត្រូវតែយករថយន្តទំនើបៗ តម្លៃចាប់ពីជាង ២៧ ម៉ឺនដុល្លារឡើងទៅ មកបម្រើសេវាតាក់ស៊ីដល់អតិថិជន ជាពិសេសភ្ញៀវទេសចរ ដោយមិនគិតថ្លៃ ។ នេះបើយោងតាមគេហទំព័រ futureofdubai ។
ប្រភពដដែលបានផ្សាយថា រថយន្តដែលបានចូលរួមក្នុងកម្មវិធីមាន គឺមានរថយន្តម៉ាកល្បីៗ និងទំនើបជាច្រើនគ្រឿងដូចជា Rolls Royce BentleyFerrari Lamborghini និង AMG G Class Limo ជាដើម។ពិធីបុណ្យយានយន្តនេះ នឹងត្រូវចាប់ផ្ដើមពីថ្ងៃទី ១៩ ខែវិច្ឆិកា ដល់ថ្ងៃទី៦ ខែធ្នូ ហើយសម្រាប់កម្មវិធីផ្ដល់ជូនសេវាតាក់ស៊ីប្រណិតនេះ នឹងត្រូវធ្វើនៅចុងសប្ដាហ៍ រយៈពេល ៣ សប្ដាហ៍ គឺនៅថ្ងៃទី២១ និង ២២ ថ្ងៃទី២៨ និង២៩ ខែវិច្ឆិកា រហូតដល់ថ្ងៃទី ៥ និង៦ ខែធ្នូ។
អ្នករៀបចំកម្មវិធីនេះ បានឲ្យដឹងថា រថយន្តតាក់ស៊ីប្រណិតនេះ នឹងផ្តល់ជូនដល់ភ្ញៀវទេសចរនិងប្រជាជន នូវបទពិសោធន៍ថ្មីមួយ ដើម្បីបំពេញក្តីសុបិន្តមួយដែលមិនដូចកន្លែងផ្សេងៗ នៅក្នុងពិភពលោកនោះ។
កាលពីឆ្នាំមុន ប៉ូលីសនៅក្នុងទីក្រុងឌូបៃ បានដាក់ពង្រាយរថយន្តប្រដេញទំនើបៗបំផុត សម្រាប់បំពាក់ឲ្យប៉ូលីសនៅក្នុងក្រុង ដែលមានដូចជាម៉ាក Ferrari Bentley និង Aston Martin និង រថយន្ត Mercedes SLS ជាដើម។ ហើយកាលពីពេលថ្មីៗកន្លងទៅនេះ រថយន្តសង្គ្រោះបន្ទាន់ដ៏ទំនើប ត្រូវបានគេប្រកាសដាក់ឲ្យប្រើនៅក្នុងទីក្រុងនេះផងដែរ៕
© រក្សាសិទ្ធិដោយ thmeythmey.com