ជាតិ
សង្គមជាតិ
មុនស្លាប់ លោក ចាន់ សុវេត ចង់ឲ្យកូនប្រុសក្លាយជាអ្នកកាសែតភ្នំពេញប៉ុស្តិ៍
×![]()
ដោយ: លីម តុលា
ភ្នំពេញ៖សកម្មជនសិទ្ធិមនុស្សលោក ចាន់ សុវេត ដែលរិះគន់រដ្ឋាភិបាលមិនសំចៃមាត់ បានលាចាកលោកហើយនៅថ្ងៃពុធនេះ។ កាលពីប៉ុន្មានថ្ងៃមុននេះ លោកបានផ្តាំផ្ញើអ្នកកាសែតម្នាក់អោយជួយកូនលោកដើម្បីអាចក្លាយជាអ្នកកាសែតនៅកាសែតភ្នំពេញប៉ុស្តិ៍ដោយបំពេញការងារក្រៅម៉ោង។
លោក ម៉ៃ ទិត្យថារ៉ា អ្នកកាសែតជាន់ខ្ពស់នៅភ្នំពេញប៉ុស្តិ៍ដែលស្គាល់លោក ចាន់ សុវេត មន្ត្រីការពារសិទ្ធិមនុស្សអង្គការអាដហុកយ៉ាងច្បាស់អស់រយៈពេលជិត១០ឆ្នាំមកហើយនោះ បានសរសើរលោក ចាន់ សុវេត ថា គឺជាមនុស្សស្មោះត្រង់ ស្រឡាញ់យុត្តិធម៌ និងធ្វើអ្វីគ្រប់យ៉ាងដើម្បីតែជួយសង្គម និងជួយអ្នកក្រី។
លោក ទិត្យថារ៉ា ដែលជាមនុស្សជិតស្និទ្ធនឹងលោក ចាន់ សាវេត បាននិយាយបន្តទៀតថា៖«គេធ្លាប់អោយលុយគាត់ដែរ។ តែគាត់បដិសេធ។ គាត់ទៀងត្រង់ណាស់»។ បើយោងតាមលោក ថារ៉ា លោក ចាន់ សុវេត មានតែយាន្តជំនិះជាម៉ូតូម៉ាកគប់(Cube)ចាស់មួយគ្រឿង និងបន្ទាប់មកគឺមានម៉ូតូម៉ាក (Wave)ប៉ុណ្ណោះ។ គាត់បានជួយសង្គម និងជួយអ្នកក្រីក្រច្រើន តែគាត់ក៏ជាអ្នកក្រដែរ។
លោក ម៉ៃ ទិត្យថារ៉ា បន្តទៀតថា ប៉ុន្មានថ្ងៃមុនពេលគាត់ស្លាប់ គាត់ធ្លាប់បានប្រាប់លោក ថារ៉ា ថា គាត់ចង់អោយកូនប្រុសរបស់គាត់ដែលទើបប្រឡងជាប់បាក់ឌុបឆ្នាំ២០១៤នេះអោយចូលធ្វើការក្រៅម៉ោងនៅកាសែតភ្នំពេញប៉ុស្តិ៍។ ក្តីស្រម៉ៃរបស់លោកមិនទាន់បានលេចចេញជារូបរាងផង ស្រាប់តែនៅថ្ងៃនេះ លោក ចាន់ សុវេត បានលាចាកលោកទៅហើយ៕
© រក្សាសិទ្ធិដោយ thmeythmey.com
