ជាតិ
សង្គមជាតិ
ពលករខ្មែរខុសច្បាប់៣នាក់ស្លាប់នៅប្រទេសថៃ
× មានពលករខ្មែរខុសច្បាប់៣នាក់បានស្លាប់ដោយឧប្បត្តិហេតុផ្សេងៗនៅក្នុងប្រទេសថៃកាលពីពេលថ្មីៗនេះ។ នេះបើតាមសេចក្តីជូនដំណឹងរបស់អ្នកនាំពាក្យក្រសួងការបរទេសកម្ពុជា លោក កុយ គួង នៅព្រឹកថ្ងៃសុក្រនេះ។ អ្នកនាំពាក្យដដែលបញ្ជាក់ថា សពរបស់ពលករខ្មែរទាំង៣ ត្រូវបានបញ្ជូនមកដល់ច្រកព្រំដែនប៉ោយប៉ែតនៅថ្ងៃទី១០ខែធ្នូដូចគ្នា។
ជនរងគ្រោះទី១ ឈ្មោះ បេ សាន អាយុ២២ឆ្នាំ ជាពលករខុសច្បាប់មកពីខេត្តកំពង់ធំ ត្រូវបានពលករខ្មែរដូចគ្នាចាក់សម្លាប់នៅខេត្តភិតបុរី កាលពីថ្ងៃទី៦ធ្នូ។ ជនល្មើសត្រូវបានចាប់ខ្លួនដោយប៉ូលីសថៃហើយ។
ជនរងគ្រោះទី២ ឈ្មោះ វិត លៀម អាយុ១៩ឆ្នាំ មកពីស្រុកព្រះនេត្រព្រះ ខេត្តបន្ទាយមានជ័យ បានស្លាប់ដោយរអិលជើងធ្លាក់ពីលើអគារកំពុងសាងសង់នៅក្នុងខេត្ត នុនថាបុរី កាលពីថ្ងៃអង្គារ។ មន្ត្រីក្រសួងការបរទេសកម្ពុជាបានបញ្ជាក់ថា ថៅកែសំណង់បានឧបត្ថម្ភថវិកា៤ម៉ឺនបាតដើម្បីអោយគ្រួសារធ្វើបុណ្យសព។
ចំណែកឯជនរងគ្រោះទី៣ មានឈ្មោះ ពួក ម៉ាប់ អាយុ២០ឆ្នាំ មកពីស្រុកកំពង់ស្វាយ ខេត្តកំពង់ធំ គឺជាកម្មករសំណង់ នៅខេត្តប្រាធំថានី ហើយបានស្លាប់ដោយគ្រោះថ្នាក់ចរាចរណ៍កាលពីថ្ងៃទី៩ធ្នូ។ សម្រាប់ជនរងគ្រោះម្នាក់នេះ ថៅកែសំណង់ក៏បានផ្តល់ការឧបត្ថម្ភចំនួន៦៥០០០បាត ដើម្បីចូលរួមធ្វើបុណ្យសពដែរ៕
© រក្សាសិទ្ធិដោយ thmeythmey.com