ជាតិ
ពិភពតារា៖ សារ៉ា ទម្លាយអាថ៌កំបាំងស្នេហ៍ប្រេះស្រាំ
×
ភ្នំពេញៈ តារាសម្តែងតួកាច ឆ្នាស់ឆ្នើមកំពុងតែចាប់ផ្តើមមានទីផ្សារការងារសិល្បៈ កញ្ញា សារ៉ា នាពេលកន្លងមក មិនធ្លាប់បង្ហាញពីចំណុចវិជ្ជមានថា នាងមានម្ចាស់បេះដូងនោះទេ ទើបតែថ្មីៗនេះ នាងបែរជាសម្រេចចិត្ត ទម្លាយអាថ៌កំបាំងស្នេហ៍ប្រះស្រាំ ជាសាធារណៈ នៅលើបណ្តាញ ទំនាក់ទំនងសង្គម Facebook ដោយនាងត្អូញត្អែរ បង្ហាញពីការឈឺចាប់ ព្រោះស្នេហាបែកបាក់ ។
តារាសម្តែង ដែលទស្សនិកជនស្គាល់ ជាតួម៉ែយ៉ែម នៅក្នុងសាច់រឿង “កូនឥតខាន់ស្លា” ដែលមានឈ្មោះពិតថា សារ៉ា នោះ នាពេលកន្លងមក នាងមិនធ្លាប់ទម្លាយអាថ៌កំបាំងផ្ទាល់ខ្លួនឲ្យទស្សនិកជន បានឃើញ ពីភាពទុក្ខសោក ឬក៏ជីវិតឯកជនរបស់នាងឡើយ។
ពេលនេះតារាសម្តែង និងជាប្រធានក្រុមបង្ហាញម៉ូដ Pop Modelសម្បុរស្រអែម កញ្ញា សារ៉ា បានបង្ហោះរូបភាព និងរៀបរាប់ពី ទឹកចិត្តសោកសៅ បន្ទាប់ពីនាងជួបស្នេហា មិនសមប្រកប ដើរដល់ផ្លូវបំបែក ជាមួយម្ចាស់បេះដូង ។ នាងបានសរសេរ ពាក្យសំដីរំលេច ពីការឈឺចាប់ ដោយប្រយោលថា “មុនដំបូងស្មានតែ ខ្លួនមានតម្លៃ តាមពិតគ្រាន់តែជាតួអង្គ គេខ្ចីមកជំនួស ពេលតួឯកមិននៅ ដឹងថាបានត្រឹម តែអ្នកជំនួស ហើយនៅតែមិន ដកខ្លួនចេញ ទ្រាំនៅឈឺចាប់ ” ។ ពាក្យសំដីទាំងអស់នេះ ពិតណាស់ថា នាងចង់បង្ហាញ ពីការឈឺចាប់ ក្នុងរឿងស្នេហាឲ្យ ទស្សនិកជនបានឃើញ និងផ្តល់ជាកំលាំងចិត្តដល់នាង ។
បើតាមប្រភពអ្នកនៅជិតដិត តារាសម្តែងរូបនេះ បានបង្ហើបប្រាប់ឲ្យដឹងថា ក្នុងមួយរយៈពេលនេះ សារ៉ា ហាក់មានភាពស្ងប់ស្ងាត់មិនសូវនិយាយស្តីអ្វីទេ មើលទៅដូចជាមនុស្ស មានទុក្ខសោកក្រៀមក្រំ បន្ទាប់ពីនាងបានប៉ះពាក្យសំដីប្រកែកគ្នាជាមួយគូស្នេហ៍យ៉ាងតឹងសរសៃកររួចមក។ តែម្ចាស់បេះដូងរបស់នាង បានសម្រេចចិត្តដើរផ្លូវបំបែកពីនាង ព្រោះតែអតីតសង្សារចាស់ គេត្រឡប់មកវិញ ធើ្វឲ្យក្តីស្រលាញ់ ដែលនាងមានចំពោះបុរសម្នាក់នោះ ត្រូវប្រែក្លាយមកជាការឈឺចាប់ ពិបាកចិត្តតែម្នាក់ឯងទៅវិញ ។
ពាក់ព័ន្ធនឹងការលើក ឡើងព័ត៌មានថា តារាសម្តែង កញ្ញា សារ៉ា មានវិបត្តិស្នេហា ពិបាកចិត្ត លែងខ្វល់ពីការងារ គិតតែពីសម្ងំរងទុក្ខនោះ “ថ្មី”នៅមិនទាន់អាចទាក់ទងទៅនាងសុំការបកស្រាយថា ជាការពិតឬយ៉ាងណាទេ ? តែបើតាមការបង្ហាញជាសាធារណៈនៅលើ Facebook របស់នាង ស្តែងឲ្យឃើញយ៉ាងប្រាកដណាស់ថា នាងពិតជាមានបញ្ហាផ្ទាល់ខ្លួនណាមួយចង់បង្ហាញ ដើម្បីឲ្យធូរអារម្មណ៍ ក្នុងនាមជាអ្នកខូចចិត្ត ៕
© រក្សាសិទ្ធិដោយ thmeythmey.com