ជាតិ
នយោបាយជាតិ
លោក យឹម សុវណ្ណ៖«យើងនឹងធ្វើឲ្យវាក្លាយជាទូរទស្សន៍មានវិជ្ជាជីវៈបំផុត» លោក យឹម សុវណ្ណ អ្នកនាំពាក្យគណបក្សសង្គ្រោះជាតិ
× មហាជនកំពុងរង់ចាំមើលទូរទស្សន៍ថ្មីមួយ ក្នុងចំណោមគម្រោងទូរទស្សន៍ថ្មីមួយចំនួន ដែលផ្សាយនៅលើរលកធាតុអាកាសខ្មែរ នោះគឺទូរទស្សន៍ដែលមាននិន្នាការគាំទ្រគណបក្សសង្គ្រោះជាតិ។ លោក យឹម សុវណ្ណ មន្ត្រីជាន់ខ្ពស់របស់គណបក្សសង្គ្រោះជាតិ អះអាងថា ទូរទស្សន៍នេះនឹងក្លាយជាទូរទស្សន៍ដែលមានវិជ្ជាជីវៈខ្ពស់ និងមានក្រមសីលធម៌បំផុត។
លោក លាង ដឺលុច៖ មន្ត្រីក្នុងគណបក្សសង្គ្រោះជាតិបានបង្ហើបឲ្យដឹងថា គេត្រូវការថវិកាវិនិយោគប្រមាណ២លានដុល្លារដើម្បីផ្តើមដំណើរការទូរទស្សន៍នេះ។ តើគេត្រូវការថវិកាសរុបប៉ុន្មានដើម្បីបង្កើតទូរទស្សន៍នេះ?
លោក យឹម សុវណ្ណ៖ គម្រោងថវិកាចំណាយអាចមានចន្លោះពី ២លានដុល្លារ ទៅដល់៤លានដុល្លារ ដោយអាស្រ័យទៅលើទម្រង់នៃការវិនិយោគ។ ប្រសិនបើយើងសង់អគារខ្លួនឯង ធ្វើអ្វីៗដោយខ្លួនឯងនោះ យើងអាចត្រូវចំណាយដល់ប្រមាណ៤លានដុល្លារ។ នៅពេលនេះ យើងកំពុងស្វែងរកប្រភពទុនពីអ្នកដែលចង់ចូលរួមក្នុងការងារនេះ។ ក្នុងក្របខណ្ឌចំណាយនេះ កម្លាំងផ្សាយរបស់ទូរទស្សន៍នេះ នឹងគ្របដណ្តប់រាជធានីភ្នំពេញ និងខេត្តជុំវិញរាជធានី។
លោក លាង ដឺលុច៖ ការបង្កើតអោយមានបណ្តាញផ្សព្វផ្សាយពិសេសទូរទស្សន៍នេះ វាជារឿងមួយ។ ប៉ុន្តែរឿងមួយទៀត គឺដំណើរការរបស់វា ដែលត្រូវពឹងផ្អែកលើចំណូលមួយផ្នែកពីការផ្សាយពាណិជ្ជកម្ម។ គណបក្សប្រឆាំងធ្លាប់មានពិសោធន៍ហើយជាមួយសារព័ត៌មានបោះពុម្ព នោះគឺក្រុមហ៊ុនឯកជនមិនហ៊ានផ្សាយពាណិជ្ជកម្មនៅលើកាសែតប្រឆាំងឡើយ។ ចុះលើកនេះ តើលោកព្រួយបារម្ភទេ? ឬក៏លោកយល់ថា បរិយាកាសបានផ្លាស់ប្តូរ?
លោក យឹម សុវណ្ណ៖ ខ្ញុំយល់ថា បរិយាកាសបានផ្លាស់ប្តូរ។ លើសពីនេះទៀត ទូរទស្សន៍របស់យើង គឺជាទូរទស្សន៍ដែលគោរពក្រមសីលធម៌ និងមានវិជ្ជាជីវៈបំផុត ដែលត្រូវទទួលស្គាល់ដោយមតិជាតិ និងអន្តរជាតិ។ យើងនឹងមិនប្រើប្រាស់ពាក្យពេចន៍វាយប្រហារ និងផ្សាយព័ត៌មានឥតប្រយោជន៍ឡើយ។ យើងនឹងផ្សាយតែព័ត៌មានដែលទាក់ទាញ និងបម្រើប្រយោជន៍សាធារណៈ។ ប្រសិនបើយើងជាទូរទស្សន៍ល្អ ក្រុមហ៊ុនឯកជននឹងមកផ្សាយពាណិជ្ជកម្មជាមួយយើង។
លោក លាង ដឺលុច៖ តើក្រុមការងារសារព័ត៌មានជាអ្នកណា? អាចមានការការចូលរួមប្រឹក្សាដោយបរទេសដែរឬទេ? ឬក៏ជាក្រុមការងារជនជាតិខ្មែរទាំងអស់?
លោក យឹម សុវណ្ណ៖ យើងនៅមិនទាន់គិតគូរដល់ក្រុមការងារនៅឡើយទេ។ នៅពេលនេះ ការងារចម្បង គឺកៀងគអ្នកវិនិយោគដែលចាប់អារម្មណ៍លើការងារនេះ មិនថាអ្នកនៅក្នុងគណបក្ស ឬអ្នកនៅក្រៅគណបក្សទេ និងទី២ គឺយើងកំពុងអនុវត្តនីតិវិធីស្នើសុំអាជ្ញាបណ្ណ៕
© រក្សាសិទ្ធិដោយ thmeythmey.com