កម្មករ​ក្រុមហ៊ុន​ស៊ីនទ្រី​បន្ដធ្វើ​កូដកម្ម​បន្ទាប់ពី​បដិសេធ​ការសម្រេច​របស់​ក្រុមហ៊ុន
ជាតិ
សង្គមជាតិ
កម្មករ​ក្រុមហ៊ុន​ស៊ីនទ្រី​បន្ដធ្វើ​កូដកម្ម​បន្ទាប់ពី​បដិសេធ​ការសម្រេច​របស់​ក្រុមហ៊ុន
16, Dec 2014 , 6:07 pm        
រូបភាព
កម្មករ​ក្រុមហ៊ុន​ស៊ិន ទ្រី នឹង​បន្ដធ្វើ​កូដកម្ម​បន្ដទៀត បន្ទាប់ពី​ពួកគេ​មិន​ព្រម​ទទួលយក​ការសម្រេច​របស់​ក្រុមហ៊ុន។ នេះ​បើតាម​លោក ប្រាក់ សុខា តំណាង​កម្មករ​ក្រុមហ៊ុន​ស៊ីន​ទ្រី។ ថ្លែងប្រាប់​សារព័ត៌មានថ្មីៗលោក​បាន​បញ្ជាក់ថា ក្រុមហ៊ុន​ស៊ិន ទ្រី សម្រេច​ដំឡើង​ប្រាក់​ឈ្នួល​គោល១៥ដុល្លារ​បន្ថែម​សម្រាប់​កម្មករ​ប្រមូល​វេន​ថ្ងៃ -យប់ និង ប្រាក់១០ដុល្លារ​បន្ថែម​ដល់​កម្មករ​អ្នក​បោស​តាមផ្លូវ។ ចំណែក​អ្នកបើកបរ​ឡាន ក្រុមហ៊ុន​បន្ថែម២០ដុល្លារ​ពីលើ​ប្រាក់​ឈ្នួល​គោល។



លោក​ប្រាក់​សុខា​ពន្យល់ថា៖«ក្រុមហ៊ុន​ផ្ដល់ប្រាក់១៥ដល់ក​ម្មក​កើប​ទាំងពីរ​វេន និង១០ដុល្លារ​អ្នក​បោសសំអាត ២០ដុល្លារ​ដល់​អ្នក​បើកឡាន។ តែ​ពួកគេ​មិន​ព្រម​ទទួលយក ហើយ​ពួកគេ​មិន​ព្រម​ចូលធ្វើការ​នោះទេ លុះត្រា​មាន​ដំណោះស្រាយ​សមរម្យ»។

លោក ម៉េ​ត វិច្ឆិកា បុគ្គលិក​ក្រុមហ៊ុន​ស៊ីន​ទ្រី បាន​បញ្ជាក់ថា កម្មករ​ប្រមាណ១០០០នាក់​បានចាប់ផ្តើម​ធ្វើ​កូដកម្ម កាលពី​ល្ងាច​ថ្ងៃអាទិត្យ ដោយ​ពួកគេ​ទាមទារ​ប្រាក់​ឈ្នួល​គោល១៥០ដុល្លារ ។ ចំណែក​អ្នកបើកបរ​ចាប់ពី២០០ទៅ៣០០ដុល្លារ​ក្នុង​មួយខែ និង​ការធ្វើការ​ត្រឹមតែ៨ម៉ោង​ក្នុង​មួយថ្ងៃ។ ហើយ​ការផ្ទុះ​កូដកម្ម​នេះ​ត្រូវបាន​ធ្វើឡើង​បន្ទាប់ពី​ក្រុមហ៊ុន​មិន​អនុញ្ញាត​ឲ្យ អ្នកបើកបរ​បូម​យក​ប្រេងសាំង​នៅសល់​ពី​រថយន្ត ក្រោយពី​បញ្ចប់​ការងារ។ លោក​បន្ថែមថា៖«ពីមុន​ក្រុម​ឲ្យ​អ្នក​បើកឡាន​បូម​ប្រេង​យក​លក់ ដើម្បី​ចែកគ្នា​ចាយ​ជាមួយ​កម្មករ គ្រាន់​ហូបបាយ កាហ្វេ ។ តែ​ឥឡូវ​ក្រុមហ៊ុន​មិន​អនុញ្ញាតិ​ឲ្យ​បូម​ប្រេង ដូចនេះ​កម្មករ​មាន​ប្រាក់​ចាយ​ប្រចាំថ្ងៃ​មកពីណា បើ​ប្រាក់ខែ​តិចតួច​ដូចនេះ»។

គួរ​បញ្ជាក់ថា កម្មករ​ក្រុមហ៊ុន​ស៊ិន ទ្រី ធ្លាប់បាន​ផ្ទុះ​កូដកម្ម​តវ៉ា​តម្លើង​ប្រាក់​ឈ្នួល ចំនួន២ដង​មកហើយ កាលពី​ខែកុម្ភៈ និង ខែកក្កដា​ឆ្នាំ២០១៤នេះ។ ជាការ​កត់សម្គាល​រាល់​ការផ្ទុះ​ការតវ៉ា​របស់​កម្មករ​ក្រុមហ៊ុន ស៊ិន ទ្រី ម្ដងៗគេ​សង្កេតឃើញថា សំរាម​គឺ​នៅ​កកស្ទះ​នៅតាម​បណ្ដាល​ទីប្រជុំជន ជះក្លិន​ស្អុយ និង​ធ្វើ​ខូច​សណ្ដាប់ធ្នាប់​សាធារណៈ​ជាដើម។

ប្រាក់​ឈ្នួល​គោល​កម្មករ​ក្រុមហ៊ុន​ស៊ិន ទ្រី​បច្ចុប្បន្ន អ្នកប្រមូល​សំរាម​វេន​ថ្ងៃ​ទទួលបាន ១០៥ ដុល្លារ  អ្នកប្រមូល​សំរាម​វេន​យប់ ១២០ដុល្លារ អ្នក​បោសសំអាត៩០ដុល្លារ និង​បើកឡាន​ពី១៣០-១៥០ដុល្លារ (តាម​អតីតភាព​ការងារ)៕



© រក្សាសិទ្ធិដោយ thmeythmey.com