ជាតិ
សង្គមជាតិ
សំរាមបង្ហាញវត្តមាននៅកណ្តាលក្រុងភ្នំពេញក្រោយកម្មករធ្វើកូដកម្ម
× នៅព្រឹកថ្ងៃពុធទី១៧ខែធ្នូនេះ សំរាមបានបង្ហាញវត្តមាននៅតាមដងផ្លូវ និងមហាវិថីមួយចំនួននៅទីក្រុងភ្នំពេញ។ អ្នកធ្វើដំណើរដែលមិនបានដឹងរឿងកូដកម្មរបស់កម្មករក្រុមហ៊ុន ស៊ិន ទ្រី បាននាំគ្នាចោទជាសំណួរថា ហេតុអ្វីបានជាទីក្រុងភ្នំពេញគ្របដណ្តប់ដោយសំរាមយ៉ាងដូច្នេះ?
សូមបញ្ជាក់ថា វត្តមានសំរាមនៅទីក្រុងភ្នំពេញ កើតមានឡើងបន្ទាប់ពីកម្មករក្រុមហ៊ុនស៊ិន ទ្រី បន្ដធ្វើកូដកម្ម បន្ទាប់ពីពួកគេមិនព្រមទទួលយកការសម្រេចរបស់ក្រុមហ៊ុន។ នេះបើតាមលោក ប្រាក់ សុខា តំណាងកម្មករក្រុមហ៊ុនស៊ីនទ្រី។ ថ្លែងប្រាប់សារព័ត៌មានថ្មីៗលោកបានបញ្ជាក់ថា ក្រុមហ៊ុនស៊ិន ទ្រី សម្រេចដំឡើងប្រាក់ឈ្នួលគោល១៥ដុល្លារបន្ថែមសម្រាប់កម្មករប្រមូលវេនថ្ងៃ -យប់ និង ប្រាក់១០ដុល្លារបន្ថែមដល់កម្មករអ្នកបោសតាមផ្លូវ។ ចំណែកអ្នកបើកបរឡាន ក្រុមហ៊ុនបន្ថែម២០ដុល្លារពីលើប្រាក់ឈ្នួលគោល។
ប្រាក់ឈ្នួលគោលកម្មករក្រុមហ៊ុនស៊ិន ទ្រី បច្ចុប្បន្ន គឺអ្នកប្រមូលសំរាមវេនថ្ងៃទទួលបាន ១០៥ ដុល្លារ អ្នកប្រមូលសំរាមវេនយប់ ១២០ដុល្លារ អ្នកបោសសំអាត៩០ដុល្លារ និងបើកឡានពី១៣០-១៥០ដុល្លារ (តាមអតីតភាពការងារ)។ សូមអញ្ជើញទស្សនារូបភាពខាងក្រោមនេះ!
© រក្សាសិទ្ធិដោយ thmeythmey.com