ជាតិ
សង្គមជាតិ
ព្រះសង្ឃវត្តដំណាក់ស្នើឲ្យអាជ្ញាធរទប់ស្កាត់ការរំខានពីក្លឹបកម្សាន្ត ហ៊ីប ហ៊ប
× សៀមរាប៖ ការរំខានដោយសំឡេង បានកើតមានរាល់រាត្រី ដល់ព្រះសង្ឃ និងប្រជាពលរដ្ឋ ដែលបង្កឡើងក្លឹបកម្សាន្តមួយកន្លែង ដែលគេស្គាល់ថា មានទីតាំងនៅជាប់របងនៃវត្តដំណាក់ ក្រុងសៀមរាប។ ជាថ្មីម្តងទៀត ថ្នាក់គ្រប់គ្រង់វត្តដំណាក់ បានចេញលិខិតមួយ ដើម្បីស្នើឲ្យអាជ្ញាធរមូលដ្ឋាន ជួយអន្តរាគមន៍ការរំខានជាសំឡេង ដែលបង្កឡើងដោយក្លឹបកម្សាន្ត ហ៊ីប ហ៊ប នេះ។
ក្លឹបក្លាស់ហ៊ីក ហ៊ីប ហ៊ប មានទីតាំងនៅខាងជើងវត្តដំណាក់ ចំងាយប្រមាណមិនដល់១០ម៉ែត្រ ពីរបងវត្ត។ វាមិនមែនជារឿងថ្មីទេ ដែលព្រះសង្ឃ កូនសិស្សវត្ត ក៏ដូចជាប្រជាពលរដ្ឋ សំដែងការមិនពេញចិត្ត ចំពោះការបើកអាជីវកម្ម ក្លឹបរាត្រីនេះ។ រាល់ពេលដែលក្លឹបកម្សាន្តនេះ ដំណើរការចាប់ពីម៉ោង១០យប់ តទៅ ការរំខានដោយសំឡេង បានកើតឡើង ដោយសារសំឡេងខ្ទរចេញពីធុងបាស់ ឫតន្ត្រី និងការស្រែកហ៊ូរកញ្ច្រៀវជាដើម ដែលធ្វើឲ្យព្រះសង្ឃ ដែលគង់នៅវត្តដំណាក់ និងប្រជាពលរដ្ឋដែលមានផ្ទះក្បែរនោះ ពិបាកសឹង ឫដេកជាខ្លាំង។
ក្នុងលិខិតមួយច្បាប់ ដែលដាក់ជូនទៅក្រុមប្រឹក្សាខេត្តសៀមរាប ព្រះសង្ឃ និងពុទ្ធបរិស័ទវត្តដំណាក់ បានសរសេរថា ចាប់តាំងពីឆ្នាំ២០១៣មក វត្តដំណាក់តាមរយៈលិខិតទៅកាន់ អភិបាល អភិបាលរងខេត្ត និងតំណាងរាស្ត្រខេត្តសៀមរាប លោក សៀង ណាំ ផងនោះ ឲ្យពួកគេជួយដោះស្រាយបញ្ហារំខាន ដែលបណ្តាលមកពីក្លឹប ហ៊ីប ហ៊ប តែរហូតមកទាល់ពេលនេះ ពុំឃើញមានដំណោះស្រាយបែបណានោះទេ។ សំឡេងខ្លាំងៗ លាន់ឮ និងខ្ទរ រហូតដល់បើកដំបូលសាលាឆាន់ក៏មាន។ ចាប់ពីម៉ោង១០ រហូតដល់ម៉ោង៤ភ្លឺ ដែលក្លឹបកម្សាន្តនេះបើក វាបានរំខានពេលវេលាសម្រាក ដល់ព្រះសង្ឃ ប្រជាពលរដ្ឋ ដែលពួកគេរវល់រៀនសូត្រ និងធ្វើការនៅពេលថ្ងៃ ក៏រកពេលសម្រាកគ្មានដែរ។
ក្នុងលិខិតដែលសរសេរកាលពីថ្ងៃទី១៤ ធ្នូ បានពន្យល់ថា ការបង្កភាពអសន្តិសុខ សណ្នាប់ធ្លាប់ អនាម័យ ក៏បានកើតឡើងដោយសារក្លឹបកម្សាន្ត ហ៊ីប ហ៊ប នេះដែរ តួយ៉ាងដូចជា ការទាស់ទែងគ្នា និងឈានដល់ការប្រើហិង្សា ការប្រើប្រាស់គ្រឿងញៀន និងការឆក់ប្លន់ជាដើម ដែលការណ៍នេះ ផ្ទុយពីឪវាទព្រះពុទ្ធសាសនា។
ព្រះសង្ឃ និងពុទ្ធបរិស័ទ ស្នើឲ្យអាជ្ញាធរជួយធ្វើយ៉ាងណា កុំឲ្យក្លឹបរាត្រី ហ៊ីប ហ៊ប មានសំឡេងចេញមកខាងក្រៅ ដែលរំខានដល់ព្រះសង្ឃ និងប្រជាពលរដ្ឋក្បែរនោះ។ ក្នុងនោះ ម្ចាស់ក្លឹប គួររៀបចំធ្វើជញ្ជាំង ឫដំបូលខ្ពស់ៗ ដើម្បីទប់សំឡេងកុំឲ្យលាន់ចេញក្រៅ។ ព្រះសង្ឃ វត្តដំណាក់ សុំឲ្យអ្នកពាក់ព័ន្ធ ដោះស្រាយបញ្ហាពួកគេឲ្យបានឆាប់ៗផងដែរ ប្រសិនបើអាចនោះ អាចបិទក្លឹបនេះតែម្តង រិតតែប្រសើរ។
គួររំលឹកថា រឿងអាស្រូវមួយបានផ្ទុះឡើង នៅក្នុងក្លឹបកម្សាន្ត ហ៊ីប ហ៊ប។ គេនៅចាំបានថា កាលពីរាត្រីទៀបភ្លឺ ថ្ងៃទី១៨ ខែវិច្ឆិកា ឆ្នាំ២០១៤ មានអគ្គិភ័យមួយ បានកើតឡើង ដែលសមត្ថកិច្ចអះអាងថា បង្កឡើងដោយសារទុស្សេខ្សែរភ្លើង បានលាបត្របាក់ក្លឹបកម្សាន្ត ហ៊ីប ហ៊ន ដែលបណ្តាលឲ្យមនុស្ស៥នាក់ស្លាប់ ក្នុងនោះមានជនជាតិអូស្ត្រាលីម្នាក់ផង ចំណែកអ្នករងរបួស មានចំនួន២នាក់។ រំលងមិនដល់១០ថ្ងៃផង ក្លឹបកម្សាន្តនេះ បានបើកដំណើរការវិញ ព្រមទាំងមានការបញ្ចុះតម្លៃពិសេសផង។ នៅដើមខែធ្នូកន្លងទៅ សាលាក្រុងសៀមរាបបានចេញលិខិត សុំបិទអាជីវកម្មនេះបណ្តោះអាសន្ន ដោយរង់ចាំការស្ងប់អារម្មណ៍ពីគ្រួសារសពសិន ប៉ុន្តែរហូតមកថ្ងៃនេះ ក្លឹបកម្សាន្ត ហ៊ីប ហ៊ប ដែលមានម្ចាស់តែមួយនឹងក្លឹបកម្សាន្ត ព្រីមមៀរ ដ៏ធំនោះ នៅតែបើកលក់ជាធម្មតា ដោយមិនរវល់នឹងការរិះគន់អ្វីឡើយ៕
© រក្សាសិទ្ធិដោយ thmeythmey.com