ជាតិ
សង្គមជាតិ
លោក សយ សុភាព៖ «គុណភាពអ្នកកាសែត និងដំណឹងត្រូវបានកែលម្អរ តែនៅមានកម្រិត» រូបភាព៖ facebook
× ភ្នំពេញ៖ នៅថ្ងៃទី២៦ខែធ្នូឆ្នាំ២០១៤នេះ គឺជាទិវាខួបលើកទី៧៨ឆ្នាំនៃកំណើតកាសែតជាភាសាខ្មែរលើកដំបូងរបស់កម្ពុជា។ ក្នុងរយៈពេល៧៨ឆ្នាំនេះ អ្នកកាសែតខ្មែរបានធ្វើកិច្ចការជួយសង្គមជាច្រើនតាមរយៈសំណេររបស់ខ្លួន។ លោក សយ សុភាព អគ្គនាយកសារព័ត៌មានអនឡាញដើមអំពិល បាននិយាយថា គ្រាន់តែក្នុងរយៈពេល២០ឆ្នាំចុងក្រោយនេះ គុណភាពអ្នកកាសែត និងដំណឹងត្រូវបានកែលម្អច្រើន បើទោះបីជាវានៅមានកម្រិតក៏ដោយក្តី ប្រៀបធៀបទៅនឹងកម្រិតស្តង់ដាសំណេរអន្តរជាតិនោះ។
ពីសំណេរសរសេរដៃ មកវាយកុំព្យូទ័រ។ ពីកាសែតសន្លឹក មកជាកាសែតតាមប្រព័ន្ធអេឡិចត្រូវនិក ឬអនឡាញ។ ពីដំណឹងចេញផ្សាយនៅថ្ងៃស្អែក មកជាដំណឹងទាន់ហេតុការណ៍។ នេះគឺជាការកត់សម្គាល់នៃការវិវត្តន៍បណ្តាញព័ត៌មាននៅក្នុងប្រទេសកម្ពុជារបស់លោក សយ សុភាព អគ្គនាយកសារព័ត៌មានអនឡានដើមអំពិល។ លោក សយ សុភាព ស្ថិតក្នុងអាជីពជាអ្នកសារព័ត៌មានអស់រយៈពេលជិត២០ឆ្នាំមកហើយ។
អ្នកសារព័ត៌មានខ្មែរក្នុងរយៈពេល២០ឆ្នាំចុងក្រោយនេះ បើទោះបីជាពួកគេទទួលបានការបណ្តុះបណ្តាលផ្នែកសារព័ត៌មានក្តី មិនទទួលបានការបណ្តុះបណ្តាលក្តី តែតាមរយៈបទពិសោធន៍សំណេរជារៀងរាល់ថ្ងៃ លោក សយ សុភាព កត់សម្គាល់ឃើញថា ចំណេះដឹងអ្នកកាសែតខ្មែរមានការអភិវឌ្ឍទៅមុខច្រើនគួរអោយកត់សម្គាល់។ លោក សយ សុភាព បញ្ជាក់ថា៖«គុណភាពអ្នកកាសែតខ្មែរ និងដំណឹងត្រូវបានកែលម្អរ ទោះបីជាវានៅមានកម្រិតក៏ដោយ»។
លោកអគ្គនាយកសារព័ត៌មានអនឡាញដើមអំពិល និងជាអតីតអ្នកអត្ថាធិប្បាយទូរទស្សន៍ C T N បានបន្តទៀតថា ប្រសិនបើបរិយាកាសនយោបាយអនុញ្ញាតអោយអ្នកកាសែតខ្មែរអាចសរសេរបានស្រេចតែនឹងចិត្តនោះ សំណេររបស់អ្នកសារព័ត៌មានខ្មែរ មិនចាញ់សំណេរអ្នកកាសែតបរទេសប៉ុន្មាននោះទេ។ «អ្នកកាសែតយើងមានសមត្ថភាពផលិតដំណឹងដែលល្អដូចគេអ៊ីចឹងដែរ តែត្រូវរង់ចាំពេលវេលា និងបរិយាកាសនយោបាយនៅក្នុងប្រទេសយើងអំណោយផលបន្តិចសិន។ អ្នកកាសែតទាំងអស់រួមចំណែកអភិវឌ្ឍ និងរក្សាសន្តិភាព»។ នេះគឺជាការបញ្ជាក់បន្ថែមរបស់លោក សយ សុភាព។
តើលោកយល់យ៉ាងដូចម្តេចដែរចំពោះវត្តមានបណ្តាញព័ត៌មានដ៏ច្រើនលើសលប់នៅក្នុងប្រទេសកម្ពុជានាពេលបច្ចុប្បន្ននេះ? តើលោកគិតថា វត្តមាននេះវារឹតតែល្អសម្រាប់លំហរសេរីភាព និងលំហូរព័ត៌មានដែរឬទេ?
ជារួមវាល្អហើយ។ តែបើថា វាច្រើនជ្រុលពេក ក៏វាពិបាកដែរ។ បើយោងតាមលោក សយ សុភាព អ្វីក៏ដោយអោយតែជ្រុលពេក វាមិនដែលល្អទេ។ លោកបារម្ភដោយលើកឡើងថា តើវាច្រើនតែបរិមាណឬ? ហើយគុណភាពយ៉ាងដូចម្តេចដែរ?
© រក្សាសិទ្ធិដោយ thmeythmey.com