អន្តរជាតិ
នយោបាយអន្តរជាតិ
×![]()
ប្រទេសចិនបច្ចុប្បន្ននេះកំពុងរះត្រដែតឡើងក្នុងឆាកនយោបាយអន្តរជាតិ ហើយគេសម្លឹងឃើញថាប្រទេសនេះកំពុងរីកធំធាត់ទាំងនយោបាយនិងសេដ្ឋកិច្ច។ ថ្ងៃនេះយើងបន្តផ្តោតលើការពង្រីកឥទ្ធិពលរដ្ឋាភិបាលក្រុងប៉េកាំងនៅក្នុងតំបន់អាហ្វ្រិក ហើយចិននេះក៏កំពុងរីករាយនិងការទាញយកប្រយោជន៍ពីតំបន់នេះផងដែរជាពិសេសប្រេងកាតនិងធនធានធម្មជាតិ។ ថ្មីៗនេះ រដ្ឋាភិបាលក្រុងប៉េកាំងបានប្រកាសបញ្ជូនទ័ពកងទ័ពរក្សាសន្តិភាពរបស់ខ្លួនរាប់រយនាក់ទៅកាន់ប្រទេសស៊ូដង់ខាងត្បូងដើម្បីជួយស្វែងរកសន្តិភាពដល់ប្រទេសនេះនិងការពារជនស៊ីវិលដែលរងគ្រោះថ្នាក់។ យ៉ាងណាក៏ដោយបើតាមពិតជាក់ស្តែងកងទ័ពចិនដែលត្រូវបញ្ជូនទៅស៊ូដង់ គឺដើម្បីជួយការពារផលប្រយោជន៍របស់ខ្លួន ជាពិសេសទីតាំងបូមប្រេងដែលអាចប្រឈមមុខនឹងការបញ្ឈប់ដំណើរការដោយសារសង្គ្រាមស៊ីវិល។ ប៉ុន្តែចិនបានប្រកាសថានឹងជួយរដ្ឋក្មេងខ្ចីនៅតំបន់អាហ្វ្រិកមួយនេះបញ្ចប់សង្គ្រាមស៊ីវិលដែលអូសបន្លាយអស់ពេលជាងមួយឆ្នាំមកហើយនោះ។
សូមស្តាប់ការបកស្រាយរបស់លោក សៅ ផលនិស្ស័យ ពាក់ព័ន្ធបញ្ហានេះ៖
មហាយក្សចិនកំពុងតែរីកធំធាត់ឡើងលើគ្រប់វិស័យជាពិសេសផ្នែកនយោបាយនិងសេដ្ឋកិច្ច ហើយឥទ្ធិពលប្រទេសនេះក៏កំពុងបន្តរីកដុះដាលគ្របដណ្តប់ពាសពេញតំបន់និង ពិភពលោកទាំងមូល។ រយៈពេលប៉ុន្មានឆ្នាំចុងក្រោយប្រទេសចិនកំពុងតែសប្បាយរីករាយនឹងការទាញយកផលប្រយោជន៍ពីបណ្តាតំបន់មួយចំនួន ជាពិសេសតំបន់អាហ្វ្រិកដែលពោរពេញដោយធនធានធម្មជាតិនោះតែម្តង។ បើតាមរបាយការណ៍របស់រដ្ឋាភិបាលក្រុងប៉េកាំង ប្រទេសនេះបានចំណាយទុនរាប់ពាន់លានដុល្លារដើម្បីវិនិយោគនៅក្នុងប្រទេសដែលសម្បូរដោយធនធានធម្មជាតិ រ៉ែ ព្រៃឈើ និងឧស្ម័ន ហើយក្រុមហ៊ុនចិនរាប់ពាន់កំពុងដំណើរការនៅទ្វីបអាហ្វ្រិកថែមទៀតផង។បើទោះបីជាចិនកំពុងសប្បាយនឹងទាញយកប្រយោជន៍សេដ្ឋកិច្ច ការខួងបូមយកប្រេង រ៉ែ កាប់បំផ្លាញព្រៃឈើ និងពង្រីកឥទ្ធិពលនយោបាយរបស់ខ្លួនក៏ដោយក៏ប្រទេសនេះរងការរិះគន់ខ្លាំងពីសំណាក់ប្រទេសលោកខាងលិចផងដែរ។
យ៉ាងណាក៏ដោយ ក្រៅពីរងការរិះគន់ ប្រទេសចិនក្នុងរយៈពេលប៉ុន្មានឆ្នាំចុងក្រោយនេះ ក៏បានប្រឈមមុខជាមួយឧបសគ្គមួយចំនួន ដោយខាតបង់ទុនរបស់ខ្លួនច្រើនដែរដោយសារវិបត្តិនៅអាហ្វ្រិក។ ជាឧទាហរណ៍កាលពីពីរឆ្នាំមុនចិនបានខាតបង់លុយប្រមាណ ២០ពាន់លានដុល្លារដោយសារគម្រោងជាច្រើនលើហេដ្ឋារចនាសម្ព័ន្ធ វិស័យប្រេង និងទូរគមនាគមន៍ត្រូវបានបញ្ឈប់ដោយសារសង្គ្រាមស៊ីវិលនៅលីប៊ី ហើយមិនទាន់មានសំណងសម្រាប់ការខាតបង់ពីរដ្ឋាភិបាលនេះឡើយ។ ដោយឡែកបច្ចុប្បន្ននេះចិនក៏កំពុងព្រួយបារម្ភពីការខាតបង់ផ្សេងទៀតនៅប្រទេសក្មេងខ្ចីសម្បូរប្រេងជាងគេនៅអាហ្វ្រិកស៊ូដង់ខាងត្បូង ដោយសារសង្គ្រាមរាំរ៉ៃអូសបន្លាយមួយឆ្នាំរកផ្លូវបញ្ចប់មិនឃើញ។ បើតាមប្រព័ន្ធផ្សព្វផ្សាយរបស់ចិន ក្នុងឆ្នាំ២០១១ រដ្ឋាភិបាលចិនបានសម្រេចបោះទុន២០ពាន់លានដុល្លារនៅស៊ូដង់មុនពេលស៊ូដង់ខាងត្បូងប្រកាសឯករាជ្យចេញពីស៊ូដង់។
ហើយក្រោយមកក្នុងឆ្នាំ ២០១២ រដ្ឋាភិបាលលោក ហ៊ូ ចិនតាវ បានប្រកាសបន្ថែមទុនវិនិយោគនៅស៊ូដង់ខាងត្បូង ៨ពាន់លានដុល្លារទៀតក្នុងពេលដែលប្រធានាធិបតីSalvaKiir ធ្វើដំណើរទស្សនកិច្ចទៅកាន់ក្រុងប៉េកាំង។
សូមរម្លឹកវិបត្តិនៅស៊ូដង់ខាងត្បូងបន្តិច វិបត្តិនេះកើតឡើងនៅចុងឆ្នាំ ២០១៣ ក្រោយមានប្រទេសនេះប្រកាសឯករាជ្យឆ្នាំ ២០១១ ដោយជម្លោះនេះកើតមានការប្រយុទ្ធគ្នារវាងកងកម្លាំងរដ្ឋាភិបាលលោក SalvaKiirនិងកងកម្លាំងឧទ្ទាមដឹកនាំដោយអតីតអនុប្រធានាធិបតីលោកRiekMachar ។ សង្គ្រាមស៊ីវិលនេះបានបន្តអូសបន្លាយដល់បច្ចុប្បន្នដោយភាគីទាំងពីរមិនអាចចរចាបញ្ចប់ជម្លោះបានឡើយ ហើយប្រជាជនរាប់ម៉ឹននាក់ស្លាប់ និងរាប់លាននាក់បាត់បង់ជម្រកនិងរត់ភៀសខ្លួន។ ក្រៅពីនេះ ហេដ្ឋារចនាសម្ព័ន្ធរូបវ័ន្តត្រួវបានបំផ្លាញ សង្វាក់ផលិតកម្ម ជាពិសេសការផលិតប្រេងដែលជាប្រភពនៃចំណូលសេដ្ឋកិច្ចស្ទើរតែត្រូវកាត់ផ្តាច់។
បើតាមសារព័ត៌មានចិន ទិន្នផលប្រេងនៅស៊ូដង់ខាងត្បូងថយចុះ ២០ភាគរយថ្មីៗនេះ ហើយក្រុមកម្មករចិនបូមប្រេងរាប់រយនាក់រងការគំរាមកំហែង និងរត់ភៀសខ្លួនផងដែរ។ បើទុកវិបត្តិនៅលីប៊ីជាបទពិសោធន៍ ចិនចាំបាច់ធ្វើអ្វីម្យ៉ាងដើម្បីបញ្ចប់បញ្ហានិងការពារផលប្រយោជន៍របស់ខ្លួននៅស៊ូដង់ខាងត្បូង។ ចិនកំពុងតែព្យាយាមជួយបញ្ចប់ជម្លោះនៅស៊ូដង់ខាងត្បូង ដើម្បីអោយឧស្សាហកម្មបូមប្រេងរបស់ខ្លួននៅស៊ូដង់ខាងត្បូងអាចបន្តទៅបានដោយនិរន្តរភាព និងគ្មានការខាតបង់។ ចិនព្យាយាមបញ្ចុះបញ្ចួលស្ថាប័នអង្គការសហប្រជាជាតិអោយលូកដៃចូលរួមបង្កើតសន្តិភាពនៅស៊ូដង់ខាងត្បូង និងក្រោយមកសម្រេចបញ្ជូនកងទ័ពរក្សារបស់ខ្លួនជិត១ពាន់នាក់ទៅស៊ូដង់ខាងត្បូងនៅដើមឆ្នាំក្រោយ។
កាលពីប៉ុន្មានខែមុននេះ រដ្ឋាភិបាលក្រុងប៉េកាំងបានស្នើអោយមានការបញ្ជូនកងកម្លាំងរក្សាសន្តិភាពមួកខៀវ របស់អង្គការសហប្រជាជាតិ ទៅកាន់ប្រទេសស៊ូដង់ខាងត្បូងបន្ថែមកងទ័ពសហភាពអាហ្វ្រិក ដោយរដ្ឋាភិបាលនេះអះអាងថា ជាការជួយការពារជិវិតប្រជាជនស៊ីវិល និងការពារការផលិតប្រេងដែលជាអាយុជីវិតរបស់ប្រទេសក្មេងខ្ចីមួយនេះ។ ចំណែកមកទល់ម្សិលមិញនេះ រដ្ឋាភិបាលលោក Xi Jinpingនិងគណកម្មការកណ្តាលយោធាចិន បានសម្រេចអនុញ្ញាតគម្រោងបញ្ជូនកងទ័ពរក្សាសន្តិភាពប្រហែល ៧០០នាក់ទៅស៊ូដង់ខាងត្បូងនៅដើមឆ្នាំ ២០១៥ ដើម្បីសហការជាមួយកងកម្លាំងអង្គការសហប្រជាជាតិនៅទីក្រុង Juba ផងដែរ។
តាមពិតទៅ ការសន្យាពង្រាយទ័ពទៅស៊ូដង់ខាងត្បូង កើតឡើងក្រោយពេលក្រុមហ៊ុនប្រេងរបស់រដ្ឋចិន បានចុះកិច្ចព្រមព្រៀងជាមួយរដ្ឋាភិបាលក្រុង Juba ដោយប្រទេសនេះធ្វើយ៉ាងណាអោយមានស្ថេរភាព និងបង្កើនការផលិតប្រេងនៅតំបន់សម្បូរប្រេងបីកន្លែងធំ។ ប៉ុន្តែគេមើលឃើញថាកងទ័ពរបស់ចិនដែលនឹងត្រូវបញ្ជូនទៅកាន់ស៊ូដង់ខាងត្បូងទំនងជាត្រូវបញ្ជូនទៅការពារកម្មករចិន និងអណ្តូងបូមប្រេងនៃក្រុមហ៊ុនចិននៅទីនោះ មិនមែនការពារប្រជាជនស៊ូដង់ខាងត្បូងដូចកាអះអាងឡើយ។
ដោយឡែកក្រៅពីប្រកាសផ្តល់ជំនួយជាកងទ័ពរក្សាសន្តិសុខ ចិនក៏កំពុងព្យាយាមពង្រីកតួនាទីការទូតរបស់ខ្លួនក្នុងការដោះស្រាយវិបត្តិនៅអាហ្វ្រិក ជាពិសេសស៊ូដង់ខាងត្បូងនេះតែម្តង។ កាលពីថ្ងៃចន្ទម្សិលមិញ រដ្ឋមន្ត្រីការបរទេសចិនលោក Wang Yi ដែលបានធ្វើដំណើរទៅកាន់ទីក្រុង Addis Ababa នៃប្រទេសអេត្បូពីម្សិលមិញ លោកបានអំពាវនាវអោយភាគីជម្លោះស៊ូដង់ខាងត្បូងត្រលប់ចូលតុចរចា និងបញ្ចប់សង្គ្រាមស៊ីវិល។ព័ត៌មានក្រៅផ្លូវការបានអោយដឹងថា រដ្ឋមន្ត្រីការបរទេសចិននេះ មានបំណងចង់ធ្វើជាអ្នកផ្សះផ្សាជម្លោះជាលក្ខណៈឯកជន ដើម្បីនាំសន្តិភាពដល់រដ្ឋដែលក្មេងខ្ចីនៅអាហ្រិជនកមួយនេះ។បើទោះជាចិនហាក់ដូចជាប្រឹងប្រែងដើម្បីជួយកសាងសន្តិភាពស៊ូដង់ខាងត្បូងក៏ដោយ ក៏អ្នកវិភាគបានថ្លែងថា មានហេតុផលច្រើននៅពីក្រោយសកម្មភាពរបស់ចិន និយាយអោយខ្លីចិនបារម្ភពីបញ្ហាប្រយោជន៍ខ្លួនច្រើនជាងជនស៊ីវិលស៊ូដង់ខាងត្បូងទាំងនោះ។
© រក្សាសិទ្ធិដោយ thmeythmey.com
