ជាតិ
បទយកការណ៍ / បទសម្ភាសន៍
សង្គមជាតិ
អ្វីទៅជា OGP ដែលអង្គការសង្គមស៊ីវិលចង់បាន?
× ភ្នំពេញ៖ កាលពីថ្ងៃទី២៣ ខែធ្នូម្សិលមិញ ក្រុមអង្គការសង្គមស៊ីវិល ដែលមានគណៈកម្មាធិការសហប្រតិបត្តិការដើម្បីកម្ពុជា (CCC) ជាអ្នករៀបចំ បានធ្វើសន្និសីទយុវជនមួយស្តីពី «គោលនយោបាយអភិវឌ្ឍន៍និងភាពជាដៃគូររបស់រដ្ឋាភិបាលបើកទូលាយ ( Policy development and Open Government Partnership (OGP) )។ សន្និសីទយុវជនលើកទី២ ធ្វើឡើងនៅ ដាយកូនៀ សិនធី មានយុវជនមកពីខេត្ត ក្រុង និងរាជធានី ប្រមាណ២០០នាក់ចូលរួម។ សង្គមស៊ីវិលយល់ថា ប្រសិនបើប្រទេសកម្ពុជាក្លាយជាសមាជិកប្រទេស OGP នោះកម្ពុជានឹងទាញផលប្រយោជន៍ជាច្រើន ជាពិសេសអ្នកវិនិយោគទុន។
ខាងក្រោមនេះ ជាបទសម្ភាសន៍ខ្លីរវាងអ្នកសារព័ត៌មានថ្មីៗ និងលោក សឿង សារឿន នាយកប្រតិបត្តិគណៈកម្មាធិការសហប្រតិបត្តិការដើម្បីកម្ពុជា (CCC) ជុំវិញបញ្ហា OGP ដូចតទៅ។
អ៊ីសា រ៉ហានី៖ យុវជនប្រមាណ២០០នាក់ មកពីបណ្តាខេត្ត ក្រុង និងរាជធានី ត្រូវបានអញ្ជើញឲ្យចូលរួមក្នុងសន្និសីទយុវជន ស្តីពី គោលនយោបាយអភិវឌ្ឍន៍ និងភាពជាដៃគូររបស់រដ្ឋាភិបាលបើកទូលាយ ដែលហៅកាត់ថា OGP? តើអ្វីទៅ ជា OGP ដែលសង្គមស៊ីវិលអះអាងថា វាមានគុណសម្បត្តិច្រើនដល់រដ្ឋាភិបាលកម្ពុជា?
សឿង សារឿន៖ OGP គឺជាសមទ្ធិរួមមួយ របស់ក្រុមអង្គការសង្គមស៊ីវិលកម្ពុជា ធ្វើការរួមគ្នានាពេលកន្លងមក។ ហើយយើងបានយល់ថា OGP ឫភាពជាដៃគូររដ្ឋាភិបាលបើកទូលាយនេះ គឺជាឯកសារ ឫជាឧបករណ៍មួយយ៉ាងសំខាន់ សម្រាប់លើកទឹកចិត្តដល់អង្គការសង្គមស៊ីវិល និងជាពិសេស ឲ្យរាជរដ្ឋាភិបាលកម្ពុជា ឲ្យមានភាពបើកចំហ គណនីភាព ប្រសិទ្ធិភាព និងឆ្លើយតបទៅនឹងតម្រូវការរបស់ប្រជាពលរដ្ឋឲ្យកាន់តែប្រសើរឡើង។
អ៊ីសា រ៉ហានី៖ ប្រសិនបើរាជរដ្ឋាភិបាលកម្ពុជាបើកចំហ តើវាមានសារសំខាន់អ្វីខ្លះ?
សឿង សារឿន៖ ទីមួយ គឺយើងបង្កើនការទុកចិត្តគ្នា រវាងអង្គការសង្គមស៊ីវិល និងរដ្ឋាភិបាល និងរវាងរដ្ឋាភិបាល និងប្រជាពលរដ្ឋ ដែលជាម្ចាស់ឆ្នោត។ ទីពីរ គឺបើកឳកាសឲ្យទូលាយ ដល់វិស័យឯកជន សម្រាប់ការវិនិយោគនៅក្នុងប្រទេសកម្ពុជា។ ទីបី ដែលសំខាន់ គឺបញ្ហាសង្គមដែលប្រជាពលរដ្ឋបានជួបប្រទះ នឹងត្រូវបានដោះស្រាយយ៉ាងប្រសើរ ដូចជាទំនាស់ដីធ្លីជាដើម។ ទីបួន កាលណាយើងមានរដ្ឋាភិបាលបើកទូលាយ យើងនឹងមានព័ត៌មានដែលអាចទុកចិត្តបាន សម្រាប់ជាប្រយោជន៍ដល់ប្រជាពលរដ្ឋទាំងមូល។
អ៊ីសា រ៉ហានី៖ តើ OGP ជាស្ថាប័នអង្គការ ឫគ្រាន់តែជាឧបករណ៍មួយ?
សឿង សារឿន៖ OGPជាវេទិការពិភពលោក ជាវេទិការរវាងរដ្ឋាភិបាល និងសង្គមស៊ីវិល ធ្វើការរួមគ្នា។ វាបានបង្កើតឡើងនៅឆ្នាំ២០១១ នៅទីក្រុងឡុង ប្រទេសអង់គ្លេស ដែលមានប្រទេសជាស្ថាបនិកចំនួន៨ ក្នុងនោះមានប្រទេសអាស៊ីចំនួន៤ មានកូរ៉េខាងត្បូង ភីលីពីន ឥណ្ឌូនេស៊ី និងបង់ហ្គូលី។
អ៊ីសា រ៉ហានី៖ ក្នុងនាមជាសង្គមស៊ីវិល តើលោកមើលឃើញថា រដ្ឋាភិបាលកម្ពុជា មានភាពបើកចំហ ហើយឫនៅ?
សឿង សារឿន៖ ចំណុចសំខាន់ ដែលក្រុមសង្គមស៊ីវិលមើលឃើញថា រដ្ឋាភិបាលមិនទាន់បើកចំហនៅឡើយ ក្នុងនោះដូចជា ដំណើរការនៃគោលនយោបាយតាក់តែងច្បាប់ ដែលពាក់ព័ន្ធនឹងសង្គមស៊ីវិល និងផលប្រយោជន៍របស់ប្រជាជន។ រដ្ឋាភិបាល គួរបើកចំហ តាំងពីសេចក្តីព្រាងតាំងពីដំបូង។ មួយទៀត ដែលយើងគិតថាសំខាន់ គឺព័ត៌មានទាក់ទងនឹងថវិកា និងការសម្រេចចិត្តផ្សេងៗ គឺមិនទាន់បើកចំហនៅឡើយទេ ចំណែកច្បាប់សិទ្ធិទទួលបានព័ត៌មាន ក៏រាជរដ្ឋាភិបាលកម្ពុជាមិនទាន់ធ្វើដែរ គ្រាន់តែគ្រោង។
អ៊ីសា រ៉ហានី៖តើមានលក្ខខណ្ឌអ្វីខ្លះ ដើម្បីអាចក្លាយជាសមាជិករបស់ OGP?
សឿង សារឿន៖ ជាមួយគេមានលក្ខខណ្ឌចំនួន៤ ទីមួយ ភាពបើកចំហផ្នែកហិរញ្ញវត្ថុ ទីពីរការទទួលបានព័ត៌មាន ទីបីការប្រកាសទ្រព្យសម្បត្តិ និងចំណូលជាសាធារណ ទីបួន ការចូលរួមរបស់ប្រជាពលរដ្ឋយ៉ាងសកម្ម។ នៅក្នុងកម្រិតមួយៗ គឺគេមានពិន្ទុ៤ សរុបទាំងអស់គឺ១៦ពិន្ទុ។
អ៊ីសា រ៉ហានី៖ ឃើញថា ប្រទេសអាស៊ាន២ប៉ុណ្ណោះ ដែលបានចូលជាសមាជិក OGP ក្នុងនោះ មានភីលីពីន និងឥណ្ឌូនេស៊ី តើប្រទេសកម្ពុជា នៅខ្វះលក្ខខណ្ឌអ្វីទៀត ដើម្បីអាចចូលជាសមាជិកនឹងគេបាន?
សឿង សារឿន៖ កម្ពុជាយើងទើបទទួលបាន៩ពិន្ទុទេ ចំណុចដែលនៅខ្វះខាតមានដូចជា សិទ្ធិទទួលបានព័ត៌មាន និងច្បាប់ប្រឆាំងអំពើពុករលួយ។ បើទោះជាមន្ត្រីរាជការ តម្រូវឲ្យប្រកាសទ្រព្យសម្បត្តិក៏ពិតមែន ប៉ុន្តែការប្រកាសកន្លងមក នៅក្នុងរង្វង់ជាកញ្ចប់នៅឡើយ។ នៅក្នុងតម្រូវការរបស់ OGP គឺការប្រកាសទ្រព្យសម្បត្តិ ត្រូវប្រកាសជាសាធារណ៕
© រក្សាសិទ្ធិដោយ thmeythmey.com