ជាតិ
សង្គមជាតិ
សៀមរាបរំពឹងទទួលបានភ្ញៀវទេសចរប្រមាណ៥ម៉ឺននាក់ក្នុងថ្ងៃឆ្លងឆ្នាំសកល
× សៀមរាប៖ បុណ្យចូលឆ្នាំសកលឆ្នាំ២០១៥ នឹងឈានចូលមកដល់ ក្នុងពេលឆាប់ៗខាងមុខនេះ។ ក្នុងនោះប្រជាពលរដ្ឋខ្មែរ មួយចំនួនធំក៏មានគោលដៅសម្រាប់ដំណើរកម្សាន្ត រួចរាល់ហើយដែរ។ ខេត្តដែលជាគោលដៅសំខាន់ៗសម្រាប់ពួកគេ រួមមានខេត្តព្រះសីហនុ កំពត កែប មណ្ឌលគិរី រតនគិរី និងខេត្តសៀមរាបជាដើម។ អាជ្ញាធរខេត្តសៀមរាបរំពឹងថា នៅឆ្នាំនេះ ខ្លួននឹងទទួលបានភ្ញៀវទេសមិនក្រោម៥ម៉ឺននាក់ ដែលមកកម្សាន្តក្នុងពិធីបុណ្យ ឆ្លងឆ្នាំ ឫបុណ្យចូលឆ្នាំសកល។
លោក ប៊ុន ថារិទ្ធ បាននិយាយថា ទីតាំងមួយចំនួន ត្រូវបានរៀបចំ ដើម្បីប្រារព្ធពិធីឆ្លងឆ្នាំសកល ដែលនឹងឈានចូលមកដល់ក្នុងពេលខាងមុខនេះ។ បើតាមលោកអភិបាលរងខេត្ត មានការប្រគុំតន្ត្រី សម្តែងសិល្បៈចម្រុះ និងការបាញ់កាំជ្រូចចំនួន២កន្លែង ដើម្បីអបអរពិធីបុណ្យ ចូលឆ្នាំសកល ឆ្នាំ២០១៥ ។
ថ្លែងប្រាប់គេហទំព័រព័ត៌មានថ្មីៗនៅរសៀលនេះ លោក ប៊ុន ថារិទ្ធ បានរំលឹកថា កាលពីឆ្នាំ២០១៣កន្លងទៅ ខេត្តសៀមរាប ទទួលបានភ្ញៀវទេសចរមិនក្រោម៤ម៉ឺននាក់ ក្នុងថ្ងៃឆ្លងឆ្នាំសកល។ នៅឆ្នាំ២០១៤ ទន្ទឹមនឹងការរៀបចំកម្មវិធីសម្បូរបែប និងសន្តិសុខសណ្តាប់ធ្នាប់ល្អ លោកអភិបាលរងខេត្ត រំពឹងថា ភ្ញៀវទេសចរនឹងមានការកើនឡើងជាងឆ្នាំទៅ គឺមានចំនួនប្រមាណ៥ម៉ឺននាក់។
ការប្រមើរមើលរបស់អភិបាលរងខេត្ត ក៏មិនមែនចេះតែគិតៗនោះដែរ។ តាមអ្វីដែលលោក បានប្រាប់ គឺមានការសាកសួរព័ត៌មានជាច្រើន ពីម្ចាស់សណ្ឋាគារ ដែលពួកគេនិយាយថា មានការកក់បន្ទប់ ដ៏ច្រើនលើសលុបពីភ្ញៀវ។ ប្រធានផ្នែកលក់ និងទីផ្សារនៃសណ្ឋាគារ វិចតូរីយ៉ា (Victoria Angkor Resort ) លោក សំអុល សុខុម ក៏បានប្រាប់សារព័ត៌មានថ្មីៗថា គិតត្រឹមថ្ងៃ២៦ ធ្នូនេះ សណ្ឋាគាររបស់លោក នៅសល់បន្ទប់ចំនួន៥ប៉ុណ្ណោះ ដែលការកក់ទាំងនោះ សុទ្ធសឹងជាភ្ញៀវបរទេស មានមកពីសហរដ្ឋអាមេរិក អឺរ៉ុប ចិន និងជប៉ុន៕
© រក្សាសិទ្ធិដោយ thmeythmey.com