ជាតិ
សង្គមជាតិ
សីតុណ្ហភាពនឹងចុះត្រជាក់ដល់១៣អង្សាររយៈពេល៦ថ្ងៃចាប់ពីថ្ងៃទី៣០ខែធ្នូ
× អាកាសធាតុនៅប្រទេសកម្ពុជានឹងចុះត្រជាក់រយៈពេល៦ថ្ងៃ ចាប់ពីថ្ងៃទី៣០ខែធ្នូឆ្នាំ២០១៤ដល់ថ្ងៃទី០៤ខែមករាឆ្នាំ២០១៥។ នេះបើយោងតាមសេចក្តីជូនដំណឹងរបស់ក្រសួងធនធានទឹកនិងឧតុនិយមនៅថ្ងៃទី២៨ខែធ្នូនេះ។
បើតាមសេចក្តីជូនដំណឹង ចាប់ពីថ្ងៃទី៣០ខែធ្នូ ជ្រលងសម្ពាធខ្ពស់នឹងបង្កើនឥទ្ធិពលមកលើប្រទេសកម្ពុជា បង្កឲ្យកម្រិតសីតុណ្ហភាពថយចុះ ធ្វើឲ្យអាកាសធាតុចុះត្រជាក់ជាថ្មីម្តងទៀត។ លក្ខណៈបែបនេះនឹងធ្វើឲ្យស្ថានភាពអាកាសធាតុនៅកម្ពុជាចុះត្រជាក់ចាប់ពីថ្ងៃទី៣០ខែធ្នូ ដល់ថ្ងៃទី០៤ខែមករាឆ្នាំ២០១៥៖
-តំបន់ជួរខ្នងភ្នំដងរែក ខេត្តឧត្តរមានជ័យ ព្រះវិហារ មណ្ឌលគិរី រតនគិរី ស្ទឹងត្រែង និងខេត្ត ប៉ៃលិន សីតុណ្ហភាពអប្បរមានឹងធ្លាក់ក្នុងកម្រិតពី១៣-១៧អង្សារសេ និងសីតុណ្ហភាពអតិបរមា មានពី២៤-២៧អង្សារសេ។
-រាជធានីភ្នំពេញ ខេត្តកណ្តាល កំពង់ស្ពឺ កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប កំពង់ធំ កំពង់ចាម ត្បូងឃ្មុំ ក្រចេះ ព្រៃវែងនិង ស្វាយរៀង សីតុណ្ហភាពអប្បរមាមានពី១៩-២១អង្សារសេ និងសីតុណ្ហភាពអតិបរមាមានពី២៧-២៩អង្សារសេ។
-ខេត្តតាកែវ កោះកុង ព្រះសីហនុ កំពត និងខេត្តកែប សីតុណ្ហភាពអប្បរមាមានពី២១-២៣អង្សារសេ និងសីតុណ្ហភាពអតិបរមាមានពី៣០-៣២អង្សារសេ៕
© រក្សាសិទ្ធិដោយ thmeythmey.com