ជាតិ
ពីនេះ ពីនោះ
កំណាព្យ៖ កំហុសមិនមែនជារឿងគួរឲ្យខ្លាចនោះទេ!
× កំណាព្យ៖ កំហុសមិនមែនជារឿងគួរឲ្យខ្លាចនោះទេ!
(បទពាក្យប្រាំពីរ)
យើងកើតមកនៅលើលោកា
គ្មាននរណាធ្វើត្រូវទាំងអស់
តែងតែមានការខ្វះចន្លោះ
ល្អឥតខ្ចោះរកមិនបានទេ ។
មិនថាគ្រហស្ថឬបព្វជា
ជនគ្រប់គ្នាទាំងយើងទាំងគេ
បើមិនចង់ឲ្យខុសវៀចវេរ
នៅទំនេរមិនបាច់ធ្វើអ្វី ។
ដេករង់ចាំតែព្រេងសំណាង
មិនគិតសាងអំពើថ្មីៗ
អ្នកខ្លាចខុសខ្លាចបរាជ័យ
នោះមានន័យខ្លាចជោគជ័យដែរ ។
គេមិនខ្លាចជនមានកំហុស
តែខ្លាចខុសហើយមិនព្រមកែ
ដូច្នេះបងប្អូនទាំងក្រុងស្រែ
គិចម៉េចដែរចូលជ្រើសរើសចុះ ៕
និពន្ធដោយ ជា ធីរិទ្ធ
© រក្សាសិទ្ធិដោយ thmeythmey.com