ជាតិ
សង្គមជាតិ
សុខភាព
កម្ពុជា៖ យ៉ាងហោច ១១លានស្រោមអនាម័យត្រូវបានប្រើប្រាស់នៅឆ្នាំ២០១៤
×![]()
ភ្នំពេញ៖ ក្នុងឆ្នាំ ២០១៤នេះ ស្រោមអនាម័យប្រភេទ Number One និង OK Condom ជាង ១១ លានត្រូវបានលក់ និងចែកចាយ នៅតាមផ្ទះសំណាក់ សណ្ឋាគារ និងឱសថស្ថាននានា ទូទាំងប្រទេសកម្ពុជា។ នេះបើតាម លោក ប៊ុត លន ប្រធានផ្នែកលក់ និងចែកចាយស្រោមអនា ម័យ របស់អង្គការខ្មែរបម្រើសុខភាពប្រជាជន (Population Services Khmer) ។
ការលក់ និងចែកចាយស្រោមអនាម័យរបស់អង្គការខ្មែរបម្រើសុខភាពប្រជាជន PSK ប្រចាំឆ្នាំ ២០១៤នេះ ត្រូវបានលោក ប៊ុត លន ប្រធានផ្នែកលក់ និងចែកចាយ ប្រាប់ឲ្យដឹងថា អង្គការ PSK បានលក់ និងចែកចាយស្រោមជាង ១១លាន ទូទាំងប្រទេសកម្ពុជា។ ចំនួននេះមិនត្រូវបានគេបូកបញ្ចូលចំនួនស្រោមអនាម័យដែលលក់ក្រៅពីអង្គការ PSK នោះទេ។
លោក ប៊ុន លាន ប្រាប់យ៉ាងដូច្នេះ៖«ចាប់ពីដើមខែមករា ដល់ចុងខែធ្នូ ឆ្នាំ២០១៤នេះ យើងបានលក់ និងចែកចាយស្រោមជាង ១១លាន តាមផ្ទះសំណាក់ សណ្ឋាគារ ឱសថសា្ថន និងគោលដៅរបស់យើងមួយចំនួនទៀត»។
លោកបន្ថែមថា ស្រោមអនាម័យដែល PSK បានលក់ និងចែកចាយនោះ មានពីរប្រភេទគឺ ប្រភេទ Number One និង OK Condom ហើយស្រោមសម្រាប់ប្រជាជនអាស៊ីទាំងពីរ ប្រភេទនេះ មានទំហំ ៤៩ មីលីម៉ែត្រ។កាលពីឆ្នាំ២០១៣ កន្លងមក ក្រុមហ៊ុនបានលក់ និងចែកចាយស្រោមអនាម័យចំនួន១៣លានស្រោម។ នៅក្នុងឆ្នាំ ២០១៥ ខាងមុខនេះ លោក ប៊ុត លន រំពឹងទុកថា ការលក់ និងចែកចាយស្រោម អនាម័យនឹងកើនដល់ជាង ១២លាន ដោយសារ PSK បានពង្រីកតំបន់ចែកចាយ ដើម្បីបំពេញតម្រូវការរបស់អ្នកប្រើប្រាស់ស្រោមផងដែរ។ ចំនួន១២លាន ឬ១៣លានស្រោមនេះ គឺជាចំនួនដែលអង្គការ PSK លក់ និងចែកចាយតែប៉ុណ្ណោះ។ ចំនួនស្រោមអនាម័យលក់ពិតប្រាកដនៅលើទីផ្សារអាចមានចំនួនច្រើនជាងនេះ ពីព្រោះ ស្រោមអនាម័យច្រើនប្រភេទផ្សេងទៀតត្រូវបានលក់នៅលើទីផ្សារផងដែរ។
លោក តារា មានវ័យជាង២០ឆ្នាំ បានប្រាប់សារព័ត៌មានថ្មីៗថា លោកប្រើប្រាស់ស្រោមអនាម័យអស់ប្រមាណជា៦ស្រោមក្នុងមួយខែ។ បើនិយាយពីការរួមភេទវិញ លោកបានសារភាពថា លោកបានរួមភេទច្រើនជាងនេះឆ្ងាយណាស់។ តែគ្រាន់ថា ពេលខ្លះ លោកមិនបានប្រើប្រាស់ស្រោមអនាម័យទេ ពីព្រោះ វាជាដៃគូរដែលលោកទុកចិត្ត។
បុរសម្នាក់ទៀតឈ្មោះ សង្ហា អាយុ២០ឆ្នាំ បានសារភាពទាំងរបៀបខ្មាសអៀនបន្តិចថា លោករួមភេទប្រមាណជាជាង២០ដងក្នុងមួយខែ។ ប៉ុន្តែ ៣ឬ៤ដង លោកប្រើប្រាស់ស្រោមអនាម័យ រីឯ ប្រមាណជា២០ដងទៀត លោកមិនបានប្រើប្រាស់ទេ ពីព្រោះលោកទុកចិត្តដៃគូរបស់លោក៕
© រក្សាសិទ្ធិដោយ thmeythmey.com
