ជាតិ
សង្គមជាតិ
×![]()
សៀមរាប៖ អ្នកគ្រប់គ្រងនៅតាមសណ្ឋាគារធំៗនៅទីក្រុងសៀមរាបប្រាប់ថា សណ្ឋាគាររបស់ពួកគេ គ្មានកន្លែងដាក់ភ្ញៀវនោះទេ ខណៈភ្ញៀវទេសចរបុកមកឆ្លងឆ្នាំ និងចូលឆ្នាំសកល យ៉ាងសន្ធឹកសន្ធាប់ នៅក្នុងឆ្នាំថ្មី ឆ្នាំ២០១៥នេះ។
ផ្លូវសំខាន់ៗនៅទីក្រុងសៀមរាប បានកកស្ទះដោយកន្លែង ជាពិសេស ផ្លូវដែលពុំមានភ្លើងស្តុប ហើយជំនួសវិញដោយប៉ូលិសចរាចរណ៍។ នៅពេលរាត្រី កន្លែងដែលសម្បូរភ្ញៀវច្រើនជាងគេ និងមានសភាពអ៊ូអរជាងគេ នោះគឺផ្លូវផាប់ស្ទ្រីត (Pub Street ) ។ ចំនួនភ្ញៀវទេសចរសន្ធឹកបែបនេះហើយ ទើបធ្វើឲ្យសណ្ឋាគារស្ទើរទាំងអស់នៅសៀមរាប ពេញណែនណាន់។
ប្រធានផ្នែកលក់ និងទីផ្សារនៃសណ្ឋាគារ វិចតូរីយ៉ា (Victoria Angkor Resort ) បាននិយាយថា សណ្ឋាគាររបស់លោកបានពេញចាប់ពីថ្ងៃទី២៦ ខែធ្នូមក។ លោក សំអុល សុខុម បន្ថែមថា ដូចរាល់ឆ្នាំនៅក្នុងខែធ្នូ និងជាពិសេសចុងខែធ្នូតែម្តង បន្ទប់ទាំង១៣០ក្នុងសណ្ឋាគារ វិចតូរីយ៉ា ត្រូវបានកក់ពីភ្ញៀវបរទេស ដែលភាគច្រើនមកពីសហរដ្ឋអាមេរិក អឺរ៉ុប ចិន និងជប៉ុន។
នៅខាងសណ្ឋាគារបុរីអង្គរ ( Borei Angkor) ដែលនៅលំដាប់ផ្កាយ៥ ដូចសណ្ឋាគារ វិចតូរីយ៉ា ដែរនោះ បានអះអាងថា បន្ទប់ស្នាក់នៅទាំង១៨៨បន្ទប់ ត្រូវបានភ្ញៀវដែលជាបរទេសទាំងអស់ កក់រយៈពេលមុន៣ខែមកហើយ។ លោក ឳ បុត្រ ប្រធានផ្នែកលក់ និងទីផ្សារ សណ្ឋាគារ បុរីអង្គរ បានបញ្ជាក់ថា ក្នុងខែធ្នូ ដែលជាខែសម្បូរភ្ញៀវដើរកម្សាន្តនេះ សណ្ឋាគាររបស់លោក ពេញរៀងរាល់ថ្ងៃ ដោយក្នុងនោះ លោកមិនបានគិតពីថ្ងៃឆ្លងឆ្នាំ និងចូលឆ្នាំសកលនេះផង ដែលក្នុងសណ្ឋាគាររបស់លោក មានភ្ញៀវសរុបប្រមាណ៤០០នាក់។
ទាក់ទងនឹងតម្លៃបន្ទប់វិញ ថ្នាក់គ្រប់គ្រងសណ្ឋាគារលំដាប់ទាំង២ខាងលើ អះអាងថា មានការដំឡើងតិចតួចតែប៉ុណ្ណោះ។ លោក សំអុល សុខុម សណ្ឋាគារ វិចតូរីយ៉ា ដែលមានសាខា៧ប្រទេស៖« នៅចុងឆ្នាំចឹង តម្លៃពី៣០០ដុល្លារ ទៅ៥០០ដុល្លារសហរដ្ឋអាមេរិក»។ លោក បុត្រ ឳ សណ្ឋាគារ បុរីអង្គរ ដែលជាសណ្ឋាគារក្នុងស្រុក៖« នៅថ្ងៃធម្មតា តម្លៃពី១៣០ ទៅ១៤០ ដុល្លារ ហើយចុងឆ្នាំដូច្នេះ យើងតម្លើងតាមបរិមាណភ្ញៀវច្រើន ឫភ្ញៀវតិច គឺពី១៥០ ទៅ២០០ ទៅតាមបន្ទប់»។លោក បុត្រ អះអាងថា គ្រប់សណ្ឋាគារ និងផ្ទះសំណាក់មួយចំនួនធំ សុទ្ធសឹងតែពេញក្នុងថ្ងៃចូលឆ្នាំសកលនេះ ហើយពួកគេនឹងស្នាក់នៅរយៈពេល៣ថ្ងៃ នៅទីក្រុងសៀមរាប។
ទន្ទឹមនឹងបរិមាណភ្ញៀវច្រើននៅចុងឆ្នាំដូច្នេះ អ្នកគ្រប់គ្រងនៅតាមសណ្ឋាគារខាងលើ បានទទួលស្គាល់ពីការធ្លាក់ចុះចំនួនភ្ញៀវនៅឆ្នាំនេះថា មានសន្ទុះថយចុះជាងរាល់ឆ្នាំ។ ពួកគេបានបញ្ជាក់ពីមូលហេតុដូចៗគ្នាថា ដោយសារគ្រោះមហន្តរាយ បញ្ហានយោបាយទាំងក្នុងក្រៅប្រទេសនិងបញ្ហាសេដ្ឋកិច្ច ដែលធ្វើឲ្យភ្ញៀវទេសចរខ្លះ បញ្ឈប់ការធ្វើដំណើរកម្សាន្តរបស់ខ្លួន៕
© រក្សាសិទ្ធិដោយ thmeythmey.com
