ជាតិ
សង្គមជាតិ
មតិចម្រុះជុំវិញភាពវិជ្ជមាន និងអវិជ្ជមាន នៅក្នុងសង្គមក្នុងឆ្នាំ២០១៤
× ភ្នំពេញ៖ ប្រជាពលរដ្ឋជាច្រើនបានសម្តែងមតិខុសៗគ្នាទាក់ទិននឹងចំណុចវិជ្ជមាន និងចំណុចអវិជ្ជមាននៅក្នុងសង្គមខ្មែរក្នុងឆ្នាំ២០១៤នេះ។ អ្នកខ្លះបានសាទរចំពោះការអភិវឌ្ឍន៍ និងការកំណែរទម្រង់មួយចំនួនរបស់រដ្ឋាភិបាល។ ប៉ុន្តែទន្ទឹមនេះ ក៏មានការរិះគន់លើចំណុចអវិជ្ជមានមួយចំនួនផងដែរ។ តើប្រតិកម្មទាំងនោះមានអ្វីខ្លះ?
កញ្ញា សុខណា ជាបុគ្គលិកក្រុមហ៊ុនឯកជនមួយ ដែលមានលំនៅដ្ឋានក្នុងសង្កាត់បឹងទំពុនបានកត់សម្គាល់ថា កន្លងមកនៅក្នុងសហគមន៍របស់កញ្ញាមិនសូវមានសន្តិសុខនោះទេ កញ្ញាតែងឃើញមានករណីចោរលួច ចោរឆក់ និងចោរប្លន់ញឹកញាប់។ តែទោះជាយ៉ាងណា កញ្ញា បានមើលឃើញពីការខិតខំមួយចំនួនផងដែរ ជាក់ស្តែងពេលរាត្រីខ្លះកញ្ញាសង្កេតឃើញថាមានការដាក់ពង្រាយក្រុមសមត្ថកិច្ចចុះត្រួតពិនិត្យអាវុធ និងគ្រឿងញៀនទៀតផង។
ងាកមកស្តាប់អ្នកស្រី រដ្ឋាដែលជាមន្ត្រីរាជការក្នុងមន្ទីរមួយនៅខេត្តកំពង់ចាមវិញ អ្នកស្រីបានកត់សម្គាល់ពីចំណុចអវិជ្ជមានមួយចំនួនថា សិទ្ធក្នុងការបញ្ចេញមតិហាក់នៅមិនទាន់ទូលំទូលាយនៅឡើយ ជាក់ស្តែងតែងមានអំពើរហិង្សាកើតឡើងនៅពេលមានការតវ៉ាម្តងៗ ។ អ្នកស្រីបន្ថែមទៀតថា អ្នកមានលុយមានអំណាចមួយចំនួនជិះជាន់អ្នកក្រីក្រ។ ម្យ៉ាងវិញទៀត ការអភិវឌ្ឍន៍មួយចំនួនបានបង្កផលប៉ះពាល់ និងបាត់បង់ធនធានធម្មជាតិខ្លះផងដែរ។
ទោះជាយ៉ាងក៏ដោយ អ្នកស្រី រដ្ឋា ក៏បានមើលឃើញពីចំណុចវិជ្ជមានមួយចំនួនផងដែរ។ អ្នកស្រីថា ប្រទេសជាតិមានសន្តិភាព មានការវិនិយោគដែលបានផ្តល់ការងារដល់ប្រជាពលរដ្ឋមួយចំនួនដែរ។ ក្រៅពីនោះក៏មានការកសាងផ្លូវថ្នល់ថ្មី និងការអភិវឌ្ឍន៍តំបន់ទេសចរណ៍ដែលបានទាក់ទាញភ្ញៀវជាច្រើនទៀតផង។
ដោយឡែកមន្ត្រីរាជការនៅមន្ទីរហិរញ្ញវត្ថុក្នុងខេត្តកំពង់ចាមម្នាក់ទៀតដែលសុំមិនបញ្ចេញឈ្មោះ សង្កេតឃើញថានៅស្ថាប័នរបស់លោកមានការអភិវឌ្ឍន៍ច្រើន៖«ការងារនិងប្រាក់ខែប្រសើរជាងមុន។ ទាំងពេលវេលាបើកប្រាក់ខែទាំងរចនាសម្ព័ន្ធនិងការជ្រើសរើសមន្ត្រីរាជការឱ្យចូលបំរើការងារជាដើម។ ជាងនេះទៅទៀតការបើកប្រាក់ខែដល់មន្ត្រីចូលនិវត្តន៍ក៏មានភាពប្រក្រតីផងដែរ»។ទោះជាយ៉ាងណាក៏ដោយមន្ត្រីរូបនេះ ក៏បានកត់សម្គាល់ពីចំណុចអវិជ្ជមានមួយចំនួនដែរដូចជា៖«ទំនាស់ដីធ្លីតែងតែកើតមានជារឿយៗ ។ ការសម្បទានដីធ្លីដែមានរយៈពេលយូរពេក។ ភាពអនាធិបតេយ្យមិនគោរពច្បាប់ចរាចរណ៍។ក្រៅពីនោះនៅមានការប្រកាន់បក្សពួកនិងនៅមានបញ្ហាខ្លះចំពោះការផ្តល់សេវាសាធារណៈដល់ប្រជាពលរដ្ឋដូចជាការផ្តល់សេវាសុខភាពជាដើម»។
អ្នកស្រី ពេជ្រ ជាអ្នកលក់កាហ្វេតាមដងផ្លូវវិញបានបញ្ចេញមតិថា៖«កន្លងមកនេះមានការអភិវឌ្ឍន៍ស្ពានថ្នល់ជាដើមប៉ុន្តែចរាចរណ៍នៅមានភាពរញ៉េរញ៉ៃនៅឡើយ»។ អ្នកស្រីបន្តថា៖«វាបានបង្កផលលំបាកជាច្រើនដល់របររកស៊ីរបស់ខ្ញុំព្រោះចរាចរណ៍ឧស្សាហ៍កកស្ទះពិបាកធ្វើដំណើរពីផ្លូវមួយទៅផ្លូវមួយទៀតណាស់»។
ងាកមកស្តាប់លោក លី វណ្ណៈ វិញ។ វណ្ណៈជានិស្សិតឆ្នាំទី៣ នៃសាកលវិទ្យាល័យជាតិគ្រប់គ្រង លោកបានសារទរចំពោះកំណែទម្រង់វិស័យអប់រំ។ ក្រៅពីនោះ ក៏មានការដំឡើងប្រាក់បៀវត្សដល់មន្ត្រីរាជការផងដែរ។លោបានបន្ថែមថាបើទោះបីជាការដំឡើងប្រាក់បៀវត្សនេះ នៅមិនទាន់គ្រប់គ្រាន់ក៏ដោ តែវាជាលទ្ធផលបណ្តោះអាសន្ននៃការកំណែទម្រង់ក្នុងឆ្នាំ២០១៤នេះ។និស្សិតដដែលនេះ ក៏បានសរសើរចំពោះការរឹតបន្តឹងវិន័យក្នុងសម័យប្រឡងបាក់ឌុបកន្លងមកផងដែរ ក្រោមពាក្យស្លោករបស់រដ្ឋមន្ត្រីក្រសួងអប់រំថា៖«អ្នកចេះទើបជាប់»។ ក្រោមពាក្យស្លោកនេះបានជំរុញឱ្យសិស្សានុសិស្សខិតខំរៀនសូត្រ។ ក្រៅពីនេះលោកបានសារទចំពោះអង្គភាពប្រឆាំងអំពើពុករលួយ ដែលបានកម្ចាត់មន្ត្រីខ្មោចមួយចំនួនផងដែរ។
ចំពោះចំណុចអវិជ្ជមានវិញ និស្សិត វណ្ណៈ រិះគន់ថា៖«បញ្ហារំលោភសិទ្ធដីធ្លីនៅតែជារឿងដែលរដ្ឋាភិបាលមិនអាចដោះស្រាយជូនប្រជាពលរដ្ឋបានដដែល បើទោះបីជាមានការសម្របសម្រួលបញ្ហានយោបាយហើយក៏ដោយ»។ និស្សិតរូបនេះបន្តទៀតថា ទោះបីប្រជាពលរដ្ឋ និងសកម្មជនដីធ្លី ជាច្រើនខិតខំធ្វើបាតុកម្មតវ៉ាហែរញត្តិដាក់ជូនរដ្ឋាភិបាល ឬស្ថាប័នដែលពាក់ព័ន្ធផ្សេងទៀត យ៉ាងណាក៏ដោយ តែនៅតែគ្មានដំណោះស្រាយជូនប្រជាពលរដ្ឋរងគ្រោះដដែល។ ហើយលទ្ធផលចុងក្រោយមានសកម្មជនដីធ្លីជាច្រើននាក់ជាប់នៅក្នុងពន្ធនាគារ។
ចំណែកឯលោក សុភាព ជានិស្សិតឆ្នាំទី៣ម្នាក់ទៀត បានរិះគន់ថា៖«កន្លងមកមានក្មេងស្ទាវទំនើង ឬកូនអ្នកមានអំណាច និងមានទ្រព្យសម្បត្តិហូរហៀរមួយចំនួនអុកឡុកនៅក្នុងទីក្រុង។ ពួកគេខ្លះនាំគ្នាប្រណាំងឡាន ឬជិះម៉ូតូធំបំពងសំឡេងរំខានដល់ប្រជាពលរដ្ឋជាដើម»។ តែទោះជាយ៉ាងណាលោកបានសរសើរថា នៅតំបន់ផ្សារធំថ្មីដែលលោករស់នៅសព្វថ្ងៃនេះមិនសូវមានករណីចោរកម្មនោះទេ៕
© រក្សាសិទ្ធិដោយ thmeythmey.com