ជាតិ
ពីនេះ ពីនោះ
សង្គមជាតិ
នៅក្នុងប្រទេសរំដួល «អស់អំណាច»ទើបគេតាំងខ្លួនធ្វើជាមនុស្សល្អ!
×
នៅក្នុងប្រទេសជាច្រើននៅលើពិភពលោក ជាធម្មតា មានតែអ្នកស្អាតស្អំ ឬអ្នកស្មោះត្រង់ទេដែលត្រូវដំឡើងបំពង់កស្រែករិះគន់អ្នកពុករលួយ។ ប៉ុន្តែនៅក្នុងប្រទេសរំដួល គេតែងតែសង្កេតឃើញអ្នកពុករលួយ រិះគន់អ្នកពុករលួយគ្នាឯង។ តើអ្នកពុករលួយ រិះគន់អ្នកពុករលួយគ្នាឯងយ៉ាងដូម្តេចទៅ?
នៅក្នុងប្រទេសរំដួល បុគ្គលដែលកំពុងរកលុយបានដោយអំពើមិនស្របច្បាប់ តាមរយៈមធ្យោបាយផ្សេងៗ ដូចជា ការរំលោភតួនាទី-អំណាច របស់ខ្លួនដើម្បីផលប្រយោជន៍ខ្លួនឯង ឬតាមរយៈការកិបកេងប្រាក់ចំណូលរដ្ឋនានា ពួកគេសម្ងំស្ងៀមមិនមាត់អ្វីទាំងអស់(ពេលកំពុងរកបាន ឬពេលកំពុងត្រូវប៉ាន់)។ ប៉ុន្តែនៅពេលដែលពួកគេអស់តួនាទី រកប្រាក់កម្រៃមិនត្រឹមត្រូវលែងបាន ពួកគេចាប់ផ្តើមនិយាយរិះគន់អ្នកដទៃថា៖«ពុករលួយយ៉ាងហ្នឹង ប្រទេសជាតិរលាយអស់ហើយ។ ពុករលួយយ៉ាងហ្នឹង គ្មាននរណាហ៊ានមករកស៊ីនៅក្នុងប្រទេសរំដួលទេ។ ពុករលួយយ៉ាងហ្នឹង អនាគតកូនចៅជំនាន់ក្រោយក្រលំបាកហើយ»។
នេះហើយជាទ្រឹស្តីអ្នកពុករលួយ រិះគន់អ្នកពុករលួយនៅក្នុងប្រទេសរំដួល។ និយាយបែបម្យ៉ាងទៀត គឺថា នៅក្នុងប្រទេសរំដួល បុគ្គលមួយចំនួន ចាប់ផ្តើមធ្វើល្អ ឬនិយាយល្អ ហើយរិះគន់អ្នកធ្វើអាក្រក់ លុះត្រាតែខ្លួនឯងអស់បុណ្យ អស់ស័ក្តិ រកប្រាក់លែងបានទើបធ្វើជាមនុស្សល្អឡើងវិញ៕
© រក្សាសិទ្ធិដោយ thmeythmey.com