ក្រសួងបរិស្ថាន​សម្រេច​បាន​សមិទ្ធិផល​ចម្បង​ចំនួន៥ក្នុង​ឆ្នាំ២០១៤
ជាតិ
សង្គមជាតិ
ក្រសួងបរិស្ថាន​សម្រេច​បាន​សមិទ្ធិផល​ចម្បង​ចំនួន៥ក្នុង​ឆ្នាំ២០១៤
02, Jan 2015 , 7:30 pm        
រូបភាព

សមិទ្ធិផលសំខានៗចំនួន៥ ត្រូវបាន​ក្រសួងបរិស្ថាន​សម្រេចបាន​នៅក្នុង​ឆ្នាំ២០១៤កន្លងទៅ។ នេះ​បើ​យោងតាម​ការចុះផ្សាយ​នៅក្នុង​ហ្វេ​ក​ប៊ុ​ក​ផ្លូវការ​របស់​ក្រសួងបរិស្ថាន។



ប្រភព​ដដែល​បានសរសេរថា សមិទ្ធិផល​ទាំង០៥ដែល​ក្រសួង​សម្រេចបាន​នោះ​រួមមាន៖

១. ការធ្វើ​ទំនើបកម្ម​ស្ថាប័ន​តាមរយៈ​ការកែសម្រួល​រចនាសម្ព័ន្ធ​គ្រប់គ្រង​និង​ដឹកនាំ ការកែលម្អ​ក្របខ័ណ្ឌ​គតិយុត្ត ការសាងសង់​អគារ​ទីស្តីការ​ថ្មី​របស់​ក្រសួង និង​ការកសាង​និង​ពង្រឹងសមត្ថភាព​មន្ត្រីរាជកា​រ ព្រមទាំង​ការយកចិត្តទុកដាក់​ដ​ល់​ជីវភាព​រស់នៅ​របស់​ម​ន្ត្រី​រាជការ។

២. ពង្រឹង​កិច្ច​គាំពារ​បរិស្ថាន ជាពិសេស​ការត្រួតពិនិត្យ​ការបំពុល​បរិស្ថាន និង​ការគ្រប់គ្រង​សំណល់​រឹង​និង​រាវ។

៣. ការអភិរក្ស​ជីវៈចម្រុះ តាមរយៈ​ការពង្រឹង​សកម្មភាព​ការពារ និង​អភិរក្ស​ធនធានធម្មជាតិ​នៅក្នុង​តំបន់ការពារធម្មជាតិ តាមរយៈ​តម្លើង​ប្រាក់ខែ​ជូន​មន្ត្រី​ឧ​ទ្យា​នុ​រក្ស ក៏ដូចជា​ការពង្រឹង​សមត្ថភាព​ល្បាត​របស់​មន្ត្រី​ឧ​ទ្យា​នុ​រក្ស។

៤. ការរស់នៅ​ដោយ​ចីរភាព តាមរយៈ​ការគិតគូរ​អំពី​តុល្យភាព​រវាង​ការអភិវឌ្ឍ និង​ការអភិរក្ស។

៥-ការពង្រឹង​ការគ្រប់គ្រង​គម្រោង​វិនិយោគ​អភិវឌ្ឍន៍​ដី​សម្បទាន​សេដ្ឋកិច្ច តាមរយៈ​ការត្រួតពិនិត្យ និង​វាយតម្លៃ​គម្រោង​វិនិយោគ​ទាំងអស់ ដែល​ស្ថិតនៅក្រោម​ការគ្រប់គ្រង​របស់​ក្រសួងបរិស្ថាន ដោយបាន​សម្រេច​ដកហូត​ដី​សម្បទាន​សេដ្ឋកិច្ច​ពី​ក្រុមហ៊ុន​ចំនួន១៧ កែសម្រួល​ផ្ទៃដី​របស់​ក្រុមហ៊ុន​ចំនួន២ ហើយ​មាន​ក្រុមហ៊ុន​ចំនួន៣ បាន​ស្ម័គ្រចិត្ត​ប្រគល់​ដី​សម្បទាន​ត្រឡប់មក​រាជរដ្ឋាភិបាល​កម្ពុជា​វិញ។  រាជរដ្ឋាភិបាល​កំពុង​បន្ត​ត្រួតពិនិត្យ និង​វាយតម្លៃ​ក្រុមហ៊ុន​ដែល​នៅ​សេសសល់ ដើម្បី​មាន​វិធ​នា​ការជាក់ស្តែង។

ជាមួយគ្នានេះដែរ ដើម្បី​ធានា​ចីរភាព​បរិស្ថាន​នៅ​កម្ពុជា ក្រសួងបរិស្ថាន​បាន​បង្កើន​កិច្ចខិតខំ​ប្រឹងប្រែង​ផ្សព្វផ្សាយ​ព័ត៌មាន និង​អប់រំ​អំពី​បរិស្ថាន​តាមរយៈ​ប្រព័ន្ធ​ទំនាក់ទំនង​សង្គម និង​ប្រព័ន្ធ​ផ្សព្វផ្សាយ​ជាតិ និង​អន្តរជាតិ​ដើម្បី​ផ្តល់ព័ត៌មាន​គ្រប់​ជ្រុងជ្រោយ​ពី​បរិស្ថាន​ជូន​ដល់​សាធារណៈជន។ ក្រសួងបរិស្ថាន​បាន​ពង្រឹង និង​ពង្រីក​កិច្ចសហប្រតិបត្តិការ​អន្តរជាតិ និង​ពង្រឹង​ភាព ជា​ដៃគូ​ជាមួយ​ដៃគូ​អភិវឌ្ឍន៍​នានា ព្រមទាំង​សង្គម​ស៊ីវិល​នានា​ដែល​ធ្វើ​ការងារ​លើ​បញ្ហា​បរិស្ថាន៕


© រក្សាសិទ្ធិដោយ thmeythmey.com