អន្តរជាតិ
នយោបាយអន្តរជាតិ
នាយករដ្ឋមន្ត្រីអូស្ត្រាលីទស្សនកិច្ចនៅអ៊ីរ៉ាក់និងប្រកាសកម្ចាត់ក្រុមរដ្ឋឥស្លាម
× នាយករដ្ឋមន្ត្រីអូស្ត្រាលីលោក តូនី អាបូតបានធ្វើដំណើរទៅដល់ប្រទេសអ៊ីរ៉ាក់កាលពីម្សិលមិញនេះ ដោយបានជួបពិភាក្សាជាមួយសមភាគីលោកនាយរដ្ឋមន្ត្រីអ៊ីរ៉ាក់ផងដែរកាលពីម្សិលមិញ។ ដំណើរទស្សនកិច្ចលើកដំបូងបំផុតរបស់អ្នកនាយរដ្ឋមន្ត្រីអូស្ត្រាលីនៅក្នុងប្រទេសអ៊ីរ៉ាក់នេះ បង្ហាញពីការពង្រឹងចំណងការទូតទ្វេភាគីជាមួយគ្នា ហើយមូលហេតុចម្បងនេះទស្សនកិច្ចគឺការប្រឆាំងក្រុមភេរវជនរដ្ឋឥស្លាមនេះតែម្តង។ ក្នុងកិច្ចប្រជុំទ្វេភាគី មេដឹកនាំអ៊ីរ៉ាក់បានស្នើសុំជំនួយគាំទ្រត្រង់ៗទៅកាន់នាយករដ្ឋមន្ត្រីអូស្ត្រាលី ដើម្បីប្រយុទ្ធជាមួយក្រុមសកម្មប្រយុទ្ធរដ្ឋឥស្លាម។ អូស្ត្រាលីដែលជាសមាជិកមួយនៃក្រុមសម្ព័ន្ធអន្តរជាតិប្រឆាំងក្រុមរដ្ឋឥស្លាម និងជាប្រទេសដែលរងការគំរាមកំហែងពីក្រុមភេរវជនខ្លាំងដែរនោះ ក៏ប្រហែលជាពិចារណាបញ្ជូនកងកម្លាំងបន្ថែម និងផ្តល់ជំនួយហិរញ្ញវត្ថុដល់រដ្ឋាភិបាលក្រុងបាដាដបន្ថែមទៀតដើម្បីតាមប្រមាញ់ក្រុមភេរវជនរដ្ឋឥស្លាម។
សូមស្តាប់ការបកស្រាយរបស់លោក សៅ ផលនិស្ស័យ ជុំវិញបញ្ហានេះ៖
ថ្ងៃអាទិត្យម្សិលមិញ នាយករដ្ឋមន្ត្រីអូស្ត្រាលីលោក តូនី អាបូត បានអញ្ជើញទៅដល់រដ្ឋធានីបាដាដដោយជួបពិភាក្សាជាមួយសមភាគីលោកនាយករដ្ឋមន្ត្រីអ៊ីរ៉ាក់លោក Haider al-Abadi។ ក្នុងដំណើរទស្សនកិច្ចជាលើកដំបូងបំផុតជាប្រវត្តិសាស្ត្ររបស់មេដឹកនាំកំពូលអូស្ត្រាលីនេះត្រូវបានគេសន្និដ្ឋានថា គ្មានអ្វីក្រៅពីជំរុញអោយរដ្ឋាភិបាលអ៊ីរ៉ាក់បង្កើនសមត្ថភាពដើម្បីប្រឆាំងក្រុមសកម្មប្រយុទ្ធរដ្ឋឥស្លាមដែលកំពុងកាន់កាប់ទឹកដីធំល្វឹងល្វើយនៅអ៊ីរ៉ាក់និងស៊ីរីនោះ។ បើទោះជាគេមិនបានបញ្ជាក់ច្បាស់ពីជំនួបទ្វេភាគី និងខ្លឹមសារលម្អិតនៃកិច្ចពិភាក្សាក៏ដោយ ក៏គេអាចសន្និដ្ឋានបានថា អូស្ត្រាលីព្យាយាមលើកកម្ពស់ទំនាក់ទំនងការទូតជាមួយរដ្ឋាភិបាលក្រុងប៉ាដាដ ដើម្បីពង្រឹងយុទ្ធនាការកម្ចាត់ក្រុមភេរវជនរដ្ឋឥស្លាម ព្រោះអូស្ត្រាលីនេះក៏រងការគំរាមកំហែងខ្លាំងផងដែរដោយសារបញ្ហាភេរវកម្មនេះ។
បើតាមការអោយដឹងពីមន្ត្រីអូស្ត្រាលី ជនជាតិអូស្ត្រាលីជាច្រើននាក់បានចាកចេញពីប្រទេសដោយធ្វើដំណើរទៅមជ្ឈិមបូព៌ាដើម្បីចូលរួមជាមួយក្រុមក្រុមជីហាតរដ្ឋឥស្លាមផងដែរ។ បច្ចុប្បន្ននេះសន្តិសុខនៅក្នុងប្រទេសអូស្ត្រាលីត្រូវបានរឹតបន្តឹងខ្លាំងដោយតម្លើងកម្រិតប្រកាសអាសន្នពីកម្រិតមធ្យមទៅកម្រិតខ្ពស់ ដែលនេះមានន័យថាករណីវាយប្រហារដោយក្រុមភេរវជនអាចកើតមានឡើងគ្រប់ពេល។ ប្រសិនបើមិនមានវិធានការទប់ស្កាត់ទេ ក្រុមជនជាតិអូស្ត្រាលីដែលចូលរួមជាមួយក្រុមភេរវជនរដ្ឋឥស្លាមនោះអាចនឹងត្រលប់មកអូស្ត្រាលីវិញដើម្បីបង្កអសន្តិសុខ និងអស្ថិរភាពនៅអូស្តាលី។ កាលពីខែមុននេះដែរ គេឃើញមានចាប់ចំណាប់ខ្មាំងជាច្រើននាក់ ដោយបុរសប្រកាន់សាសនាឥស្លាមម្នាក់ ហើយការរំដោះចំណាប់ខ្មាំងបានធ្វើអោយមនុស្ស៥នាក់បានស្លាប់បាត់បង់ជីវិតផងដែរ។ ប៉ុន្តែគេបញ្ជាក់ថា មិនមានសញ្ញាក្រុមឧទ្ទាមរដ្ឋឥស្លាមនៅពីក្រោយនោះឡើយ។ ប៉ុន្តែការតាមកម្ចាត់ក្រុមសកម្មប្រយុទ្ធរដ្ឋឥស្លាមជាបញ្ហាចម្បងរបស់រដ្ឋាភិបាលក្រុងកង់បេរ៉ាដដែល។
យ៉ាងណាមិញដំណើរទស្សនកិច្ចទៅកាន់ប្រទេសអ៊ីរ៉ាក់របស់នាយករដ្ឋមន្ត្រី តូនី អាបូត មិនត្រូវបានគេប្រកាសអោយដឹងជាផ្លូវការពីមុននោះឡើយ ដំណើរទស្សនកិច្ចរបស់លោកហាក់បីដូចជាស្ងៀមស្ងាត់និងក្រៅផ្លូវការ។ គេទម្លាយថា ក្នុងជំនួបពិភាក្សាលក្ខណៈទេ្វភាគីរវាងប្រមុខរដ្ឋាភិបាលប្រទេសទាំងពីរអូស្ត្រាលីនិងអ៊ីរ៉ាក់ ភាគច្រើនផ្តោតលើការពង្រឹងចំណងទំនាក់ទំនងផ្នែកយោធា សន្តិសុខ រួមមានទាំងការបំពាក់បំប៉នសមត្ថភាពនិងផ្តល់ជំនួយសព្វាវុធដល់កងម្លាំងរដ្ឋាភិបាលក្រុងបាដាដដើម្បីប្រឆាំងនឹងក្រុមភេរវជនរដ្ឋឥស្លាម។ ខណៈពេលដែលលោកអាបូតស្ថិតក្នុងសន្និសីទសារព័ត៌មាននៅអ៊ីរ៉ាក់ លោកបានថ្លែងថ្កោលទោសក្រុមភេរវជនរដ្ឋឥស្លាម និងប្រកាសប្រឆាំងដាច់ខាតនឹងក្រុមនេះ ជាពិសេសប្តេជ្ញាចូលរួមកម្ចាត់ក្រុមនេះអោយអស់។ លោក នាយករដ្ឋមន្ត្រីអូស្ត្រាលី តូនី អាបូត បានលើកឡើងថាបញ្ហាភេរវជនរដ្ឋឥស្លាមជាគ្រោះថ្នាក់មិនមែនតែអ៊ីរ៉ាក់ ឬតំបន់មជ្ឈិមបូព៌ាឡើយ តែវាជាគ្រោះមហន្តរាយនៃពិភពលោក ហើយអូស្ត្រាលីប្តេជ្ញាចិត្តប្រឆាំងក្រុមភេរជននេះ ដោយបង្កើនចំណងមិត្តភាពជាមួយក្រុងបាដាដនិងសម្ព័ន្ធមិត្តផ្សេងទៀត។
ដំណើរទស្សនកិច្ចរបស់លោក តូនី អាបូត កើតឡើងស្របពេលដែលក្រុមភេរវជនរដ្ឋឥស្លាមបង្កើនការវាយប្រហារនៅអ៊ីរ៉ាក់ ជាពិសេសប្រឆាំងប្រជាជនស៊ីវិលតែម្តង។ គ្រាន់តែក្នុងថ្ងៃសុក្រសប្តាហ៍មុន គេទទួលបានព័ត៌មានថា ក្រុមសកម្មប្រយុទ្ធរដ្ឋឥស្លាមប្រហារជីវិតជនស៊ីវិលប្រហែល ១៥នាក់នៅក្នុងខេត្ត Anbar។យ៉ាងណាក៏ដោយគេរំពឹងថា រដ្ឋាភិបាលអូស្ត្រាលីនឹងបន្តផ្តល់ជំនួយទាំងហិរញ្ញវត្ថុនិងសព្វាវុធទៅកាន់រដ្ឋាភិបាលអ៊ីរ៉ាក់ ដើម្បីធានាពីប្រសិទ្ធភាពនៃការកម្ចាត់ក្រុមភេរវជនរដ្ឋឥស្លាមផងដែរ។ ក្នុងកិច្ចពិភាក្សាគ្នាដែរ គេឃើញនាយករដ្ឋមន្ត្រីអ៊ីរ៉ាក់បានអំពាវនាវត្រង់ៗទៅកាន់ប្រមុខរដ្ឋាភិបាលក្រុងកង់បេរ៉ា ដោយស្នើសុំអោយរដ្ឋាភិបាលនេះផ្តល់ការគាំទ្រដល់ខ្លួន និងបញ្ជូនជំនួយបន្ថែមទៀតដល់កងម្លាំងអ៊ីរ៉ាក់ដើម្បីប្រយុទ្ធប្រឆាំងក្រុមឧទ្ទាមរដ្ឋឥស្លាម។ ដោយឡែកលោក តូនី អាបូត បានប្រកាសបន្ថែមជំនួយមនុស្សធម៌ទៅកាន់ប្រទេសអ៊ីរ៉ាក់ ដោយក្នុងឆ្នាំ ២០១៤ រាប់ចាប់ពីខែមិថុនា ជំនួយមនុស្សធម៌របស់រដ្ឋាភិបាលអូស្ត្រាលីកើនឡើងដល់ជិត ២០លានដុល្លារអាមេរិក។ លោក អាបូត ប្រកាសថានឹងបន្តគាំទ្ររដ្ឋាភិបាលអ៊ីរ៉ាក់ដើម្បីប្រឆាំងក្រុមភេរវជន ហើយលោកជឿជាក់ថាការបង្កើនទំនាក់ទំនងយោធានឹងជួយអោយរដ្ឋាភិបាលអ៊ីរ៉ាក់អាចយកជ័យជម្នះលើក្រុមភេរវជន។
គេដឹងថា អូស្ត្រាលីនេះគឺជាផ្នែកមួយដ៏សំខាន់របស់របស់ក្រុមសម្ព័ន្ធអន្តរជាតិដែលដឹកនាំដោយក្រុងវ៉ាស៊ីនតោនដើម្បីកម្ចាត់ក្រុមភេរវជនរដ្ឋឥស្លាមនៅក្នុងប្រទេសស៊ីរី និងអ៊ីរ៉ាក់ ផងដែរ។ អូស្ត្រាលីកំពុងបន្តប្រតិបត្តិការរបស់ខ្លួន ដើម្បីទម្លាក់គ្រាប់បែកនៅក្នុងប្រទេសអ៊ីរ៉ាក់ ហើយចាប់ពីខែមិថុនាឆ្នាំ ២០១៤ក្រុងកង់បេរ៉ា បានបញ្ជូនកងកម្លាំងពិសេស រួមទាំងប្រឹក្សាសឹកប្រហែល ២០០នាក់ និងយន្តហោះចម្បាំង៦គ្រឿងទៅកាន់ប្រទេសអ៊ីរ៉ាក់រួចរាល់ហើយ។
ដោយឡែកទាក់ទិននឹងកងកម្លាំងអូស្ត្រាលីដែលចេញច្បាំងកម្ចាត់ក្រុមភេរវជនរដ្ឋឥស្លាម តាមពិតទៅអូស្ត្រាលីបានបញ្ជូនកងកម្លាំងពិសេសរបស់ខ្លួនចំនួន ៦០០នាក់ និងកប៉ាល់ចម្បាំងជាច្រើនគឿងទៅកាន់ប្រទេសអារ៉ាប់រួមរួចទៅហើយតាំងពីពាក់កណ្តាលខែកញ្ញាមកម្ល៉េះ ដើម្បីត្រៀមលក្ខណៈក្នុងការចូលរួមជាមួយជាមួយសហរដ្ឋអាមរិក។ ប៉ុន្តែបើទោះជាមានការពង្រឹងចំណងទំនាក់ទំនងជាមួយគ្នាលើវិស័យយោធានេះក៏ដោយ លទ្ធភាពនៃការយកជ័យជម្នះលើក្រុមឧទ្ទាមរដ្ឋឥស្លាម មិនមែនជារឿងងាយស្រួលនោះឡើយ ហើយក្រុមភេរវជនរដ្ឋឥស្លាមនេះមិនទាន់ចុះខ្សោយដែរបើទោះជាបណ្តាប្រទេសជាច្រើនរាប់ទាំងអាមេរិក និងអូស្ត្រាលីចូលរួមក្នុងប្រតិបត្តិការយោធាប្រឆាំងក្រុមភេរវជនខាងលើក៏ដោយ។ គេមើលឃើញថា សង្គ្រាមផ្លូវអាកាសរបស់សម្ព័ន្ធអន្តរជាតិដឹកនាំដោយក្រុងវ៉ាស៊ីនតោននេះ មិនមានប្រសិទ្ធភាពក្នុងការយកជ័យជម្នះលើក្រុមភេរវជនរដ្ឋឥស្លាមឡើយ ប៉ុន្តែសម្លាប់ច្រលំតែជនស៊ីវិល។ នេះមានន័យថាសម្ព័ន្ធអន្តរជាតិ អ៊ីរ៉ាក់ អ៊ីស្ត្រាលី ឬអាមេរិក ប្រហែលជាត្រូវផ្លាស់ប្តូរយុទ្ធសាស្ត្រក្នុងការធ្វើសង្គ្រាមប្រឆាំងក្រុមភេរវជន មិនមែនបន្តទម្លាក់គ្រាប់បែកឡើយ៕
© រក្សាសិទ្ធិដោយ thmeythmey.com