ជាតិ
សង្គមជាតិ
ក្រសួងស្នើអាជ្ញាធរភ្នំពេញ កណ្តាល និងព្រៃវែងឲ្យកំណត់តំបន់ហាមឃាត់អាជីវកម្មបូមខ្សាច់
× ក្រសួងរ៉ែ និងថាមពល បានធ្វើលិខិតដាច់ដោយឡែកមួយ ទៅកាន់អភិបាលរាជធានី-ខេត្តចំនួន៣ រួមមានភ្នំពេញ កណ្តាល និងព្រៃវែង អំពីការកំណត់តំបន់ហាមឃាត់ ការធ្វើអាជីវកម្មបូមខ្សាច់អនាធិបតេយ្យ តាមដងទន្លេមេគង្គលើ មេគង្គក្រោម និងទន្លេបាសាក់។ ការកំណត់តំបន់ហាមឃាត់នេះមានតាំងពីឆ្នាំ២០១១មកម្ល៉េះដោយអតីតក្រសួងឧស្សាហកម្មរ៉ែនិងថាមពល។នេះបើតាមសេចក្តីជូនដំណឹងរបស់ ក្រសួងរ៉ែ និងថាមពល។
បើតាមសេចក្តីជូនដំណឹងដដែល រាល់សកម្មភាពបូមខ្សាច់ទាំងឡាយណាដែលកើតឡើងក្នុងតំបន់ទាំង៣ខាងលើនេះគឺជាសកម្មភាពអានាធិបតេយ្យល្មើសនឹងច្បាប់ស្តីពីការគ្រប់គ្រងនិងការធ្វើអាជីវកម្មធនធានរ៉ែដែលត្រូវទទួលទោសបញ្ញាតិស្របតាមមាត្រា៣៥នៃច្បាប់នេះ។
ពាក់ព័ន្ធនឹងបញ្ហានេះ កាលពីថ្ងៃទី២៥ខែធ្នូឆ្នាំ២០១៤កន្លងទៅ លោករដ្ឋមន្ត្រីក្រសួងធនធានទឹក លឹម គានហោ បានមានប្រសាសន៍ទៅកាន់ក្រុមអ្នកកាសែតថា ឈ្មួញដែលកំពុងធ្វើអាជីវកម្មបូមខ្សាច់ទាំងអស់នៅពេលនេះគ្មានអាជ្ញាប័ណ្ណនៅឡើយទេ។ ដោយសារបញ្ហាគ្មានអាជ្ញាប័ណ្ណនេះ ក្រុមការងាររបស់រដ្ឋាភិបាលបានបង្ក្រាប និងរឹបអូសសម្ភារបទល្មើសបានជិត១០០គ្រឿងហើយ។
លោកបានបញ្ជាក់ទៀតថា អ្នកធ្វើអាជីវកម្មកាលពីពេលមុនអាចមានអាជ្ញាប័ណ្ណ តែឈ្មួញកំពុងធ្វើអាជីវកម្មបូមខ្សាច់សព្វថ្ងៃគ្មានអាជ្ញាប័ណ្ណទេក្រោយការបង្កើតគណៈកម្មាធិការគ្រប់គ្រងធនធានខ្សាច់កម្ពុជាក្នុងអាណត្តិថ្មីនេះដែលមានរូបលោកជាប្រធានដដែល៕
© រក្សាសិទ្ធិដោយ thmeythmey.com