អន្តរជាតិ
នយោបាយអន្តរជាតិ
អាមេរិកប្រឆាំងការបង្កកពន្ធរបស់អ៊ីស្រាអែលដែលផ្ទេរទៅប៉ាឡេស្ទីន
×
ក្រោយពេលដែលអាជ្ញាធរប៉ាឡេស្ទីនព្យាយាមស្នើសុំចូលរួមជាមួយតុលាការព្រហ្មទណ្ឌអន្តរជាតិ រដ្ឋាភិបាលអ៊ីស្រាអែលបានប្រកាសតបតវិញដោយបញ្ឈប់ការផ្ទេរលុយពន្ធទៅអោយរដ្ឋាភិបាលប៉ាឡេស្ទីន។ ប៉ុន្តែក្រោយមានការប្រកាសរបស់អាជ្ញាធរអ៊ីស្រាអែល សហរដ្ឋអាមេរិកបានប្រកាសប្រឆាំងនឹងវិធានការនេះដោយលើកឡើងថាទង្វើអ៊ីស្រាអែលនឹងធ្វើអោយភាគីទាំងពីរប្រឈមមុខដាក់គ្នានិងភាពតានតឹងកើនឡើងខ្លាំង។
កញ្ញា ខន ចំប៉ា លម្អិតព័ត៌មាននេះ
រដ្ឋាភិបាលក្រុងជេរ៉ូសាឡិមបានប្រកាសថាខ្លួននឹងព្យួរការផ្ទេរលុយពន្ធទៅកាន់អាជ្ញាធរប៉ាឡេស្ទីន ដើម្បីឆ្លើយតបនឹងអាជ្ញាធរប៉ាឡេស្ទីនដែលចង់ក្លាយខ្លួនជាសមាជិកតុលាការព្រហ្មទណ្ឌអន្តរជាតិ។ អ៊ីស្រាអែលបញ្ជាក់ថាថវិកាពន្ធប្រមាណ ១២៧លានដុល្លារដែលខ្លួនប្រមូលជំនួសអោយអាជ្ញាធរប៉ាឡេស្ទីនកាលពីខែមុន នឹងមិនត្រូវបញ្ជូនទៅអោយអាជ្ញាធរប៉ាឡេស្ទីនឡើយ។ ប្រទេសអ៊ីស្រាអែលបានទទួលបន្ទុកប្រមូលពន្ធជំនួសអោយអាជ្ញាធរប៉ាឡេស្ទីន ហើយទំហំលុយពន្ធប្រមូលបាននេះអាចនិយាយបានថា ស្មើនឹង២ភាគ៣នៃថវិកាសរុបរបស់អាជ្ញាធរប៉ាឡេស្ទីនផងដែរ។
ការសម្រេចមិនបញ្ជូនលុយពន្ធច្រើនសន្ធឹកសន្ធាប់ទៅអោយអាជ្ញាធរប៉ាឡេស្ទីននៅពេលនេះ កំពុងធ្វើអោយភាគីទាំងពីរអ៊ីស្រាអែលនិងប៉ាឡេស្ទីន ប្រឈមមុខដាក់គ្នាកាន់តែខ្លាំង ហើយប៉ាឡេស្ទីនហាក់បីដូចជាមិនរារែក ក្នុងការបន្តស្នើសុំការទទួលស្គាល់ខ្លួនជារដ្ឋឯករាជ្យដោយសហគមន៍អន្តរជាតិផងដែរ។ យ៉ាងណាក៏ដោយ ទង្វើរបស់រដ្ឋាភិបាលអ៊ីស្រាអែល ដែលមិនព្រមផ្ទេរលុយពន្ធទៅកាន់ប៉ាឡេស្ទីននោះ ត្រូវបានរដ្ឋាភិបាលក្រុងវ៉ាស៊ីនតោនប្រឆាំង ព្រោះវាគ្មានជួយដោះស្រាយបញ្ហា ក្រៅពីធ្វើអោយភាពតានតឹងកើនឡើងឡើយ។
អ្នកនាំពាក្យក្រសួងការបរទេសអាមេរិក លោកស្រី Jen Psaki បានអះអាងថាអ៊ីស្រាអែលមិនគួរធ្វើបែបនេះឡើយ ព្រោះប្រទេសនេះគួរដឹងហើយថា វិធានការតបតគ្នាទៅវិញទៅមករបស់ភាគីទាំងមិនជួយអោយដំណើរការកសាងសន្តិភាពជោគជ័យឡើយ។ លោកស្រីបានបន្តអំពាវនាវអោយភាគីទាំងពីរត្រលប់ពិភាក្សាគ្នា និងបញ្ឈប់រាល់សកម្មភាពបង្ករឿង និងធ្វើអោយប៉ះពាល់ដល់ការកសាងសន្តិភាពរវាងប្រទេសទាំងពីរ។ ក្រៅពីដង្ហើយហៅភាគីទាំងពីរអោយបញ្ចៀសសកម្មភាពបង្ករឿង អ្នកនាំពាក្យក្រសួងការបរទេសខាងលើ បានបន្ទោសអាជ្ញាធរប៉ាឡេស្ទីនផងដែរ ដែលបន្តស្នើសុំជាសមាជិកតុលាការព្រហ្មទណ្ឌអន្តរជាតិ ដោយលោកស្រីលើកឡើងថា ប៉ាឡេស្ទីនកំពុងបង្កបញ្ហាធំ។ មន្ត្រីក្រុងវ៉ាស៊ីនតោនរូបនេះបានសង្កត់ធ្ងន់ថា ការចូលរួមជាមួយតុលាការព្រហ្មទណ្ឌអន្តរជាតិនឹងធ្វើអោយប៉ាឡេស្ទីនទទួលផលអវិជ្ជមាន ហើយវាមិនជួយអោយប្រជាជនប៉ាឡេស្ទីនទទួលបានអធិបតេយ្យនិងភាពជារដ្ឋឯករាជ្យពេញលេញឡើយ។
គួរបញ្ជាក់បន្តិចថា ការឈានទៅស្នើសុំជាសមាជិកតុលាការព្រហ្មទណ្ឌអន្តរជាតិរបស់ប៉ាឡេស្ទីនកើតមានឡើង ក្រោយពេលក្រុមប្រឹក្សាសន្តិសុខបរាជ័យ ក្នុងការអនុម័តដំណោះស្រាយព្រាងដោយអាជ្ញាធរប៉ាឡេស្ទីន និងបណ្តាប្រទេសអារ៉ាប់ កាលពីសប្តាហ៍មុន។ ដំណោះស្រាយដែលក្រុមប្រឹក្សាសន្តិសុខមិនអាចអនុម័តបាននោះ មានកំណត់ពីការកំណត់អោយអ៊ីស្រាអែលបញ្ជប់អាណានិគមរបស់ខ្លួននៅលើទឹកដីប៉ាឡេស្ទីន និងការទទួលស្គាល់រដ្ឋប៉ាឡេស្ទីនជាផ្លូវការតាមដំណោះស្រាយរដ្ឋពីរ ប៉ុន្តែសហរដ្ឋអាមេរិក និងអូស្ត្រាលីបានបោះឆ្នោតប្រឆាំងដំណោះស្រាយ។ ប៉ាឡេស្ទីនខកចិត្តចំពោះការបរាជ័យជាថ្មីម្តងទៀតនេះ ក៏សម្រេចបន្តសកម្មភាពរបស់ខ្លួនដោយស្នើសុំចូលរួមជាមួយតុលាការព្រហ្មទណ្ឌអន្តរជាតិ ដើម្បីទាមទារអោយមានការកាត់ទោសមេដឹកនាំអ៊ីស្រាអែល ក្នុងការប្រព្រឹត្តបទឧក្រិដ្ឋ សង្គ្រាម៕
© រក្សាសិទ្ធិដោយ thmeythmey.com