សង្គមអន្តរជាតិ
អន្តរជាតិ
×![]()
លោក Kiyoshi Kimura បានឈ្នះក្នុងការដេញថ្លៃដើម្បីទិញយកត្រីធូណាBluefin មួយក្បាលដោយត្រូវគេលក់ក្នុងតម្លៃ៣៧ ៥០០ ដុល្លារដែលជាការដេញថ្លៃលក់ត្រីដំបូងគេ ក្នុងឆ្នាំ២០១៥ នេះនៅក្នុងទីក្រុងToykoប្រទេសជប៉ុន។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន AP ។
ប្រភពខាងលើក៏បានឲ្យដឹងថា ត្រីធូណា Bluefin មួយក្បាលនោះមានទម្ងន់ ១៨០ គីឡូក្រាមហើយត្រូវបានលក់ទៅឲ្យ លោកKiyoshi ជាម្ចាស់កន្លែងផលិតsushi ដ៏ល្បីនៅក្នុងប្រទេសជប៉ុន។ លោកKiyoshi បាននិយាយថា នេះគឺជាឆ្នាំទីបួនដែលលោកបានចូលរួមក្នុងដេញថ្លៃហើយនឹងបានឈ្នះការដេញថ្លៃនេះព្រោះថាត្រីដំបូងនៃការដេញថ្លៃនេះត្រូវបានគេជឿថានឹងនាំមកនូវសំណាងល្អ។
ទោះជាត្រីខាងលើត្រូវបានលក់ក្នុងតម្លៃជិត ៤ ម៉ឺនដុល្លារក៏ដោយ ក៏នៅថោកជាងការដេញថ្លៃត្រីលើកដំបូងកាលពីឆ្នាំ ២០១៣ដែលត្រីធូណាទម្ងន់ ២២២ គីឡូក្រាមមួយក្បាល ត្រូវគេលក់ទៅឲ្យលោក Kimuraក្នុងតម្លៃ ១,៧៦លានដុល្លារ។
ជនជាតិជប៉ុន ពេញនិយមក្នុងការបរិភោគត្រីត្រីធូណានិងត្រី salmonដោយយកវាមកធ្វើជាsushi និង sashimi ឬក៏សម្រាប់ហូបសាច់ត្រីឆៅដោយផ្ទាល់តែម្ដង ព្រោះត្រីប្រភេទនេះមានប្រូតេអ៊ីនខ្ពស់ និងធ្វើឲ្យមានអាយុវែង។
កំណើននៃការបរិភោគសាច់ត្រី ធូណា និងត្រី salmonបានធ្វើឱ្យចំនួនត្រីទាំងពីរប្រភេទនេះ មានការធ្លាក់ចុះជាខ្លាំង នៅក្នុងដែនសមុទ្រនៅទូទាំងពិភពលោក ខណៈពេលដែលតម្លៃមានការកើនឡើងជាខ្លាំងនោះ៕
© រក្សាសិទ្ធិដោយ thmeythmey.com
