ពីនេះ ពីនោះ
សង្គមអន្តរជាតិ
អន្តរជាតិ
ទីក្រុងឌូបៃប្រកាសបើកកម្មវិធីប្រកួត «សម្រកទម្ងន់ដើម្បីទទួលបានមាស»
×
រដ្ឋធានីឌូបៃ របស់ប្រទេសអារ៉ាប់រួម បានប្រកាសបើកកម្មវិធីប្រកួតប្រជែងមួយ ដែលមានឈ្មោះថា «សម្រកទម្ងន់ដើម្បីទទួលបានមាស»សម្រាប់ឆ្នាំ២០១៥ នេះ ដែលនឹងត្រូវចាប់ផ្ដើម ពីថ្ងៃទី១៥ ខែកក្កដា ដល់ថ្ងៃទី១ ខែកញ្ញា។ នេះបើយោងតាមគេហទំព័រ future of Dubai ។
ប្រភពដដែលនេះក៏បានរាយការណ៍ថា ការប្រកួតសម្រកទម្ងន់នៅឆ្នាំ២០១៥ នេះគឺផ្ដោតទៅលើការសម្រកទម្ងន់របស់កុមារ ដែលមានអាយុក្រោម ១៣ ឆ្នាំ ដើម្បីលើកម្ពស់ការយកចិត្តទុកដាក់ចំពោះជម្ងឺធាត់របស់កុមារអារ៉ាប់។ បច្ចុប្បន្ននេះជម្ងឺធាត់របស់កុមារបានក្លាយជាប្រឈមដ៏ធំមួយនៅក្នុងបណ្តាប្រទេសជាច្រើនជាពិសេសប្រទេសនៅតំបន់មជ្ឈឹមបូព៌ានិងអឺរ៉ុប ដែលការធាត់នេះគឺបណ្ដាលមកពីការញៀនលេងឧបករណ៍អេឡិចត្រូជំនាន់ថ្មីដ៏ទំនើបៗ នោះ។
លោក Hussain Nasser Lootah អគ្គលេខាធិការសាលាក្រុងឌូបៃ បានបញ្ជាក់ថា កម្មវិធីប្រកួតនេះគឺត្រូវបានធ្វើឡើង ដើម្បីបំផុសគំនិត និងលើកទឹកចិត្តឲ្យក្រុមគ្រួសារនីមួយៗ ទទួលយកនូវការអនុវត្តដែលនាំមកនូវសុខភាពល្អ គឺការសម្រកទម្ងន់។
លោកបានបន្តថា៖«យើងត្រូវការពារមនុស្សជំនាន់ក្រោយរបស់យើងពីផលប៉ះពាល់អវិជ្ជមាននៃបច្ចេកវិទ្យាដោយលើកទឹកចិត្ដពួកគេឱ្យមានរបៀបរស់នៅដែលមានសុខភាពល្អនិងការអប់រំឪពុកម្តាយអំពីតួនាទីរបស់ពួកគេក្នុងការទទួលបានអ្នកជំនាន់ក្រោយដែលមានសុខភាពល្អ»។
ចំពោះលក្ខខណ្ឌក្នុងការប្រកួតនៅឆ្នាំនេះគឺ គ្រួសារនីមួយៗ នៅក្នុងទីក្រុងឌូបៃ អាចចុះឈ្មោះចូលរួមប្រកួតតែម្នាក់ឯងក៏បានជាក្រុមគ្រួសារក៏បាន ព្រោះថាប្រសិនបើអ្នកអាចសម្រកទម្ងន់យ៉ាងតិច ២ គីឡូក្រាម ក្នុងរយៈពេលនៃការប្រកួតនោះ អ្នកនឹងទទួលបានមាស ២ ក្រាម ។ ប៉ុន្តែសម្រាប់គ្រួសារដែលមានកុមារអាយុក្រោម ១៣ ចូលរួមប្រកួត ហើយអាចសម្រកទម្ងន់បាន យ៉ាងតិច ២ គីឡូក្រាមដែរ នោះពួកគេនឹងទទួលបានរង្វាន់ទ្វេដង គឺ មាស ៤ ក្រាម៕
© រក្សាសិទ្ធិដោយ thmeythmey.com