អន្តរជាតិ
នយោបាយអន្តរជាតិ
អាមេរិក៖ រដ្ឋាភិបាលស៊ីរីប្រើឧទ្ធម្ភាគចក្រទម្លាក់អាវុធគីមីក្នុងសង្គ្រាមស៊ីវិល
×![]()
របាយការណ៍មួយដែលចងក្រងឡើងដោយក្រុមអង្កេតការប្រើប្រាស់អាវុធគីមីត្រូវបានគេ ទម្លាយចេញកាលពីថ្មីៗនេះ បានបង្ហាញពីភស្តុតាងនិងព័ត៌មានបន្ថែមពាក់ព័ន្ធនឹង ការប្រើប្រាស់អាវុធគីមីនៅក្នុងប្រទេសស៊ីរី។ បើទោះជារបាយការណ៍ទទួលស្គាល់ពីការ ប្រើប្រាស់អាវុធគីមីប្រឆាំងជនស៊ីវិលនិងយោធានៅក្នុងប្រទេសស៊ីរីក៏ដោយ គេមិនបានបញ្ជាក់ថាភាគីណាដែលប្រើប្រាស់អាវុធដ៏គ្រោះថ្នាក់នេះឡើយ។
រាយការណ៍ព័ត៌មានដោយ លោក រឿន ភារុន
របាយការណ៍ស្វែងរកការពិតស្តីពីការប្រើប្រាស់អាវុធគីមីជីវសាស្ត្រនៅក្នុងប្រទេសស៊ីរីកន្លង មកត្រូវបានគេទម្លាយចេញហើយ របាយការណ៍ថ្មីនេះបានផ្តល់ព័ត៌មាន និងភស្តុតាង បន្ថែមជុំវិញសំណុំរឿងការប្រើប្រាស់អាវុធគីមីនៅស៊ីរី។ របាយការណ៍នេះរៀបចំឡើងដោយ អង្គការហាមឃាត់ការប្រើប្រាស់អាវុធគីមីដែលបានតាមដាននិងត្រួតពិនិត្យយ៉ាងយកចិត្តទុកពីការប្រើប្រាស់អាវុធជីវសាស្ត្រនៅក្នុងប្រទេសស៊ីរី ហើយរបាយការណ៍នេះបញ្ជាក់ថា អាវុធដ៏ គ្រោះថ្នាក់ទាំងនោះពិតជាត្រូវបានប្រើប្រាស់ពិតមែន។
បើតាមការត្រួតពិនិត្យរបាយការណ៍ជារួម គេឃើញមានរួមបញ្ចូលចម្លើយសាក្សីដែលបាន ឃើញផ្ទាល់ពីការប្រើប្រាស់អាវុធគីមីទាំងនោះ ហើយគេបញ្ជាក់ថា អាវុធទាំងនោះត្រូវបាន គេទម្លាក់ចុះពីលើឧទ្ធម្ភាគចក្រថែមទៀតផង។ បើតាមការសាកសួរសាក្សីដែលបានឃើញ ហេតុការណ៍នោះ មុននឹងមានការវាយប្រហារដោយអាវុធដ៏សាហាវនេះ គេលឺសូរសម្លេង ឧទ្ធម្ភាគចក្រហោះហើរលើអាកាស បន្ទាប់មកគេឃើញអាវុធទាំងនោះធ្លាក់មកលើដីតែម្តង។
ក្នុងរបាយការណ៍សាក្សីប្រហែល ៣២នាក់ បានអះអាងស្រដៀងគ្នាថា ពួកគេពិតជាបានលឺ សំឡេងយន្តហោះមុននឹងមានការវាយប្រហារដោយអាវុធជីវសាស្ត្រនេះ ហើយអាវុធភាគ ច្រើនជាគ្រាប់បែកគីមី និងសារធាតុក្លរីន។
ប៉ុន្តែយ៉ាងណាពួកគេបានលើកឡើងថាពួកគេមិនបានដឹងភាគីណាដែលប្រើប្រាស់អាវុធ ឡើយ។ ប៉ុន្តែយ៉ាងណាក៏ដោយ ប្រទេសលោកខាងលិចជាពិសេសសហរដ្ឋអាមេរិកដែលជា សមាជិកអចិន្ត្រៃយ៍នៃក្រុមប្រឹក្សាសន្តិសុខមិនរារែកឡើយ ក្នុងការចោទប្រកាន់រដ្ឋាភិបាល ស៊ីរីលោក បាសា អាល់អាសាដ ទាក់ទិននឹងការប្រើប្រាស់អាវុធនេះ។ លោកស្រី Samantha Power ឯកអគ្គរដ្ឋទូតអាមេរិកប្រចាំអង្គការសហប្រជាជាតិបានអះអាងថា មិនមានអ្វីគួរអោយ សង្ស័យឡើយ ហើយគ្មានអ្នកណាក្រៅពីកងកម្លាំងរដ្ឋាភិបាលស៊ីរីឡើយដែលមានលទ្ធភាព ប្រើប្រាស់ឧទ្ធម្ភាគចក្រសម្រាប់ជញ្ជូននិងទម្លាក់អាវុធគីមីនេះ ដ្បិតក្រុមឧទ្ទាមគ្មានលទ្ធភាព ណាប្រើប្រាស់ឧទ្ធម្ភាគចក្រឡើយ។
របាយការណ៍ថ្មីដែលមានកម្រាស់ ១១៧ទំព័រនេះ មិនខុសប្លែកអ្វីពីរបាយការណ៍ពីរមុនដែរ ហើយនៅក្នុងកិច្ចប្រជុំបិទទ្វារនៅក្រុមប្រឹក្សា សន្តិសុខអង្គការសហប្រជាជាតិលោកស្រី Samantha Power បានលើកឡើងពីភស្តុតាង បន្ថែមដោយចោទប្រកាន់ថា រដ្ឋាភិបាលស៊ីរីបានប្រើប្រាស់អាវុធគីមី ឧស្ម័នក្លរីន ក្នុងសង្គ្រាមដែលមានរយៈពេលបួនឆ្នាំនេះ។
ប៉ុន្តែយ៉ាងណាក៏ដោយបើទោះជាមានការលើកឡើងយ៉ាងនេះក្តី ខាងភាគីរដ្ឋាភិបាលស៊ីរី និងក្រុមឧទ្ទាមដែលគាំទ្រដោយលោកខាងលិចនោះ នៅតែបន្តចោទគ្នាទៅវិញទៅមកជុំវិញ ការប្រើប្រាស់អាវុធដ៏គ្រោះថ្នាក់ទាំងនោះ។ យ៉ាងណាក៏ដោយកាលពីឆ្នាំ ២០១៣ រដ្ឋាភិបាលក្រុងដាម៉ាសបានសម្រេចលះបង់និងកម្ទេចចោលកម្មវិធីផលិតអាវុធគីមីរបស់ខ្លួន ក្រោយពេលដែលមានករណីវាយប្រហារដោយអាវុធគីមីនៅក្នុងទីក្រុង Ghouta ដែល នៅក្បែររដ្ឋធានីដាម៉ាសដែលបានសម្លាប់ជនស៊ីវិលរាប់រយនាក់៕
© រក្សាសិទ្ធិដោយ thmeythmey.com
