អន្តរជាតិ
នយោបាយអន្តរជាតិ
×![]()
លោកនាយករដ្ឋមន្ត្រីជប៉ុនស៊ីនហ្សូអាបេបានចូលរួមក្នុងសន្និសីទដើម្បីចាប់ផ្តើមសរសេរសេចក្តីថ្លែងការណ៍សម្រាប់ខួបរម្លឹកនៃការចុះចាញ់សង្គ្រាមលោកលើកទី២លើកទី៧០ដែលនឹងត្រូវប្រព្រឹត្តនៅចុងខែសីហាខាងមុខនេះ។សេចក្តីថ្លែងការណ៍នេះដែរនឹងបង្ហាញពីការសុំអភ័យទោសនិងវិប្បដិសារីចំពោះសង្គ្រាមនិងបញ្ហាទាសភាពការរំលោភបំពានផ្លូវភេទដែលបានប្រព្រឹត្តចំពោះប្រជាជនចិននិងកូរ៉េនៅក្នុងសម័យសង្គ្រាមលោកលើកទី២ដែលបានប្រព្រឹត្តដោយទាហានជប៉ុន។
កាលពីថ្មីៗកន្លងទៅនេះលោកនាយករដ្ឋមន្ត្រីជប៉ុនស៊ីនហ្សូអាបេបានប្រកាសថា លោកនឹងចេញសេចក្តីថ្លែងការណ៍មួយ ដើម្បីរម្លឹកខួបលើកទី៧០នៃការបញ្ចប់សង្គ្រាមលោកលើកទី។ សេចក្តីថ្លែងការណ៍នេះដែរ មានបង្ហាញវិប្បដិសារីទាក់ទិននឹងការប្រព្រឹត្តអំពើមិនគប្បីរបស់ទាហានជប៉ុន ទៅលើប្រជាជនចិននិងកូរ៉េដែលនេះជាការកសាងទំនាក់ទំនងជាមួយប្រទេសចិននិងកូរ៉េ ដោយដោះស្រាយបញ្ហាប្រវត្តិសាស្ត្រ។
នាយករដ្ឋមន្ត្រីជប៉ុន បានបញ្ជាក់នៅក្នុងសន្និសីទជាលើកដំបូងក្នុងឆ្នាំ២០១៥ថាលោកនឹងសរសេរសេចក្តីថ្លែងការណ៍ដើម្បីបង្ហាញវិប្បដិសារី ចំពោះសង្គ្រាមលោកដែលបានកើតឡើងជាពិសេសចំពោះទង្វើរបស់ទាហានជប៉ុនប្រព្រឹត្តលើប្រទេសដែលធ្លាប់ស្ថិតនៅក្រោមការគ្រប់គ្រងរបស់ជប៉ុននៅតំបន់អាស៊ីប៉ាស៊ីហ្វិកតែម្តង។ លោកបានបន្ថែមទៀតថាសេចក្តីថ្លែងការណ៍ នឹងអាចជួយសម្រាលភាពតានតឹង និងប្រឈមមុខគ្នាលើបញ្ហាប្រវត្តិសាស្ត្រនិងធ្វើអោយទំនាក់ទំនងរវាងជប៉ុននិងកូរ៉េខាងត្បូងព្រមទាំងចិនកាន់តែល្អប្រសើរ។
លោកអាបេបានបញ្ជាក់ទៀតថាទោះបីជាជប៉ុនធ្លាប់មានប្រវត្តិសាស្ត្រ និងធ្លាប់ប្រព្រឹត្តទង្វើមិនគប្បីលើប្រជាជននៃប្រទេសជិតខាងក៏ដោយនៅក្នុងរយៈពេល៧០ឆ្នាំនេះជប៉ុនបានចូលរួមចំណែកយ៉ាងច្រើននៅក្នុងការកសាងសន្តិភាពស្ថិរភាព ការអភិវឌ្ឍនិងលទ្ធិប្រជាធិបតេយ្យនៅក្នុងតំបន់អាស៊ីប៉ាស៊ីហ្វិក។
ដោយឡែកសម្រាប់រាល់សេចក្តីថ្លែងការណ៍ដែលតែងតែរៀបចំឡើយដោយនាយករដ្ឋមន្ត្រីជប៉ុន នៅថ្ងៃ រម្លឹកនៃការចុះចាញ់សង្គ្រាមនិងថ្លែងពីវិប្បដិសារីរបស់ជប៉ុននៅអំឡុងសង្គ្រាមលោកលើកទី២ពិតជាមានសារៈសំខាន់ណាស់សម្រាប់ទំនាក់ទំនងការបរទេសជាមួយប្រទេសដែលធ្លាប់រងគ្រោះដោយសារតែការគ្រប់គ្រងដោយជប៉ុន។
គួរបញ្ជាក់ផងដែរថានៅក្នុងអំឡុងសង្គ្រាមលោកលើកទី២ជប៉ុនបានគ្រប់គ្រងប្រទេសកូរ៉េ និងចិនហើយនៅពេលនោះដែរទាហានជប៉ុនបានចាប់ស្រី្តជនជាតិចិននិងកូរ៉េជាច្រើននាក់ដើម្បីបំរើផ្លូវភេទរបស់ខ្លួន ហើយប្រៀបប្រដូចពួកគេទៅនឹងទាសករផ្លូវភេទ។ កត្តាទាំងនេះហើយដែលធ្វើអោយប្រជាជនចិននិងកូរ៉េចងចាំមិនភ្លេច និងចងគំនុំជាមួយជប៉ុនហើយចាត់ទុកអំពើរបស់ទាហានជប៉ុនជាអំពើគួរអោយស្អប់ខ្ពើមបំផុត៕
© រក្សាសិទ្ធិដោយ thmeythmey.com
