អន្តរជាតិ
ទស្សនាវដ្តីបារាំងបង្ហោះរូបត្លុកមេដឹកនាំរដ្ឋឥស្លាម មុនមានការវាយប្រហារ
× មុនមានការវាយប្រហារប៉ុន្មានម៉ោងប៉ុណ្ណោះ គេឃើញទស្សនាវដ្តី Charlie Hebdo បង្ហោះរូបត្លុករបស់មេដឹកនាំក្រុមរដ្ឋឥស្លាមផងដែរ ហើយគេឃើញមានពាក្យថាជូនពរ Baghdadi ។ តាមពិតទៅទស្សនាវដ្តីនេះ តែងតែគូរ និងបោះពុម្ភផ្សាយរូបភាពត្លុកស្តីពីបញ្ហាចម្រូងចម្រាស ផ្នែកសាសនា វប្បធម៌ នយោបាយ មេដឹកនាំពិភពលោកជាដើម តាំងពីយូរយារមកហើយ។
ត្រឹមតែមួយម៉ោងប៉ុណ្ណោះមុនមានការវាយប្រហារលើទស្សនាវដ្តី Charlie Hebdo នៅបារាំងដែលសម្លាប់មនុស្ស១២នាក់ គេឃើញទស្សនាវដ្តីនេះបោះពុម្ភនិងបង្ហោះរូបត្លុកមេដឹកនាំរដ្ឋឥស្លាម Abu Bakr al-Baghdadi ដែលភ្ជាប់ពាក្យជូនពរផងផង។ រូបភាពជាលក្ខណៈត្លុកនោះមានពណ៌ស ខ្មៅ ដែលមានរូបមេដឹកនាំកំពូលក្រុមរដ្ឋឥស្លាមត្រូវបានគេបង្ហោះតាមប្រព័ន្ធទំនាក់ទំនងសង្គម Twitter កាលពីម្សិលមិញនេះ ហើយបើតាមការអះអាងរបស់សាក្សី រូបភាពត្រូវបានគេបង្ហោះមុនការវាយប្រហារត្រឹមមួយម៉ោងប៉ុណ្ណោះ។
បើតាមអ្នកជំនាញរូបភាពដែលគេគូរនោះ បង្ហាញមេដឹកនាំរដ្ឋឥស្លាមលើកដៃស្តាំឡើងលើ និងលើកចង្អុលដៃមួយ ដែលនេះមានន័យថា ជាការឧទ្ទិសដល់មនោគមន៍វិជ្ជា និងសាសនា ដោយទាមទារអោយមានការកម្ទេចចោលប្រទេសលោកខាងលិច។ ដោយឡែកបើតាមខ្សែអាត់វីដេអូគេថតបាននៅក្នុងសកម្មភាពវាយប្រហារការិយាល័យទស្សនាវដ្តីខាងល់ើពីម្សិលមិញគេសង្កេតឃើញមានជនសង្ស័យម្នាក់បានលើកដៃឡើងលើធ្វើកាយវិការស្រដៀងគ្នានឹងរូបត្លុកដែរ ខណៈពេលជននោះកាន់កាភ្លើងអាកា ៤៧ មួយដើមក្រោយពេលវាយប្រហារនៅក្នុងការិយាល័យរួចហើយនោះ។
យ៉ាងណាក៏ដោយ កាលពីថ្មីៗនេះគេឃើញ រូបភាពមួយទៀតដែលត្រូវបានទស្សនាវដ្តីខាងលើបោះពុម្ភផ្សាយដែលនោះក៏បង្ហាញពីក្រុមសកម្មប្រយុទ្ធរដ្ឋឥស្លាមដែរ ដែលរូបនោះគូរដោយនិពន្ធនាយកទស្សនាវដ្តីលោក Stephane Charbonnier ផងដែរ ។ ក្នុងរូបនោះមាន បុរសម្នាក់មានពុកមាត់ស្ពាយកាំភ្លើង ដែលគេចាត់ទុកថាជាក្រុមសកម្មប្រយុទ្ធរដ្ឋឥស្លាម និងធ្វើសញ្ញាដូចគ្នានឹងរូបភាពមេដឹកនាំរដ្ឋឥស្លាមខាងលើដែរ។ ប៉ុន្តែគេឃើញរូបភាពមានភ្ជាប់ឃ្លាដែលលើកឡើងពីគម្រោងវាយប្រហារប្រទេសបារាំងផងដែរ។ ឃ្លានោះសរសេរជាភាសាបារាំង ដែលមានន័យថា ៖«នៅមិនទាន់មានការវាយប្រហារនៅបារាំងទេ?រង់ចាំបន្តិច ! យើងមានពេលរហូតដល់ចុងខែមករាដើម្បីបង្ហាញការជូនពររបស់ពួកយើង»។ ក្នុងពេលក្រុមភេរវជនវាយប្រហារក្នុងការិយាល័យ ជនម្នាក់បានស្រែករកលោក Stephane Charbonnier ផងដែរ ដែលនេះបញ្ជាក់ថា លោក ជាគោលដៅនៃការវាយប្រហារនេះ។
© រក្សាសិទ្ធិដោយ thmeythmey.com