ជាតិ
សង្គមជាតិ
និស្សិតពេទ្យ៖ បើរដ្ឋចង់ពង្រឹងវិស័យសុខាភិបាល ត្រូវយកថវិការដ្ឋមកទ្រទ្រង់វិស័យនេះ
×![]()
ដោយ: ខន ចំប៉ា
និស្សិតពេទ្យប្រមាណ៥០នាក់បានប្រមូលផ្តុំគ្នាតវ៉ា នៅមុខសាកលវិទ្យាល័យវិទ្យាសាស្ត្រសុខាភិបាល នៅព្រឹកថ្ងៃទី០៨ខែមករានេះ ស្នើសុំអន្តរាគមន៍ ពីលោកនាយករដ្ឋមន្ត្រី ហ៊ុន សែន ចំពោះការកំណត់តម្លៃទិញពាក្យប្រឡងថ្នាក់ជាតិ និងការកំណត់អាយុចំពោះវេជ្ជបណ្ឌិតដែលមានបំណងប្រឡងក្របខណ្ឌរដ្ឋ។ ក្រៅពីការឈរកាន់បដាទាមទារ ក្រុមនិស្សិតក៏បានផ្តិតមេដៃ ដែលមានខ្លឹមសារមិនពេញចិត្តចំពោះការកំណត់នេះ ទៅកាន់ថ្នាក់ដឹកនាំសាលាផងដែរ។ 
មិនមែនមានតែនិស្សិតតែជាង៥០នាក់ដែលមកតវ៉ា នៅមុខសាកលវិទ្យាល័យវិទ្យាសាស្ត្រសុខាភិបាល នៅព្រឹកនេះនោះទេ ដែលមិនពេញចិត្តចំពោះការកំណត់របស់ក្រសួង ប៉ុន្តែនិស្សិតភាគច្រើន ទាំងឱសថសាស្ត្រ វេជ្ជបណ្ឌិតទូទៅ គិលានុបដ្ឋាយិកា និងទណ្ឌបណ្ឌិតជាដើម ដែលត្រូវបញ្ចប់ការសិក្សា និងត្រូវប្រឡងថ្នាក់ជាតិនៅឆ្នាំនេះ ក៏បានសម្តែងការមិនពេញចិត្តផងដែរ ប៉ុន្តែគ្រាន់តែពួកគាត់មិនហ៊ានចេញមុខ តែប៉ុណ្ណោះ ដោយហេតុផលថា ខ្លាចមានការរឹតបន្តឹងនៅពេលប្រឡង ឬពេលធ្វើអត្រាកំណែវិញ្ញាសា។ នេះបើតាមការបញ្ជាក់ របស់តំណាងនិស្សិតម្នាក់ដែលសុំមិនបញ្ចេញឈ្មោះ។
ជានិស្សិតផ្នែកវេជ្ជសាស្ត្រជំនាន់ទី៣៥ ដែលត្រូវប្រឡងថ្នាក់ជាតិនៅឆ្នាំនេះដែរ បានឱ្យដឹងថា រូបគាត់ និង និស្សិតទាំងអស់ ពេញចិត្តនិងការប្រឡងថ្នាក់ជាតិ ដែលជាផ្នែកមួយនៃការពង្រឹងគុណភាពរបស់វេជ្ជបណ្ឌិតដែលបញ្ចប់ការសិក្សា ប៉ុន្តែមិនពេញចិត្តចំពោះការកំណត់ទិញពាក្យប្រឡងចំនួន១២៥ដុល្លារ ដែលលោក អះអាងថា វិធានការនេះ មិនមែនជាវិធានការដែលអាចឱ្យ វិស័យសុខាភិបាល មានគុណភាពប្រសើរជាងនេះនោះទេ តែជាការជំរិតទារលុយពីនិស្សិតដោយស្របច្បាប់។
និស្សិតពេទ្យរូបនោះ បានពន្យល់យ៉ាងដូច្នេះថា៖«ប្រសិនបើរាជរដ្ឋាភិបាលពិតជាចង់ពង្រឹងគុណភាពក្នុងវិស័យសុខាភិបាល រដ្ឋាភិបាលមិនត្រូវមកជំរិតយកប្រាក់ពីនិស្សិតតាមរយៈរូបភាពផ្សេងៗនោះទេ រដ្ឋាភិបាលត្រូវតែយកថវិកាជាតិមកផ្គត់ផ្គង់វិស័យនេះ ដូចជាការផ្តល់ជំនួយដូចជាឧបករណ៍ទំនើបៗពាក់ព័ន្ធនឹងផ្នែកសុខាភិបាល ដើម្បីឱ្យនិស្សិតបានអនុវត្តន៍ ផ្តល់ប្រាក់បៀវត្សដល់សាស្ត្រាចារ្យឱ្យគ្រប់គ្រាន់ និងត្រូវរកមន្ទីរពេទ្យឱ្យបានគ្រប់គ្រាន់ ដើម្បីឱ្យនិស្សិតចុះទៅអនុវត្តន៍ការងារជាដើម»។
ពាក់ព័ន្ធនឹងការកំណត់អាយុត្រឹម៣០ឆ្នាំ សម្រាប់វេជ្ជបណ្ឌិតដែលចង់ប្រឡងក្របខណ្ឌរដ្ឋវិញ និស្សិតទាំងអស់ស្នើសុំឱ្យក្រសួង កំណត់អាយុប្រមាណ៣៥ឆ្នាំសម្រាប់ថ្នាក់វេជ្ជសាស្ត្រទូទៅ និងសម្រាប់ថ្នាក់ឯកទេសឱ្យលើសពីអាយុ៣៥ឆ្នាំ។ និស្សិតដដែលនោះបានបន្ថែមថា៖«និស្សិតត្រូវចំណាយពេលរៀនយូរណាស់ អ្នកខ្លះត្រូវ៦ទៅ៨ឬ៩ឆ្នាំតាមជំនាញនីមួយៗ ហើយរហូតដល់រៀនចប់ គឺផុតអាយុប្រឡងចូលធ្វើការរដ្ឋបាត់ទៅហើយ ហើយក៏មិនប្រាកដថា ប្រឡងម្តងជាប់នោះទេ អ្នកខ្លះត្រូវប្រឡង២ឬ៣ដងឯណោះទើបជាប់»។
សូមបញ្ជាក់ថាកាលពីពេលថ្មីៗនេះ គណៈកម្មាធិការប្រឡងថ្នាក់ជាតិរបស់ទីស្ដីការគណៈរដ្ឋមន្ដ្រី បានចេញសេចក្ដីជូនដំណឹង ស្ដីពីការប្រឡងថ្នាក់ជាតិនៅតាមគ្រឹះស្ថានវិស័យសុខាភិបាលប្រចាំឆ្នាំ២០១៥ ។ សេចក្តីជូនដំណឹងបន្តថា និស្សិតពេទ្យទាំងអស់ដែលបានបញ្ចប់ការសិក្សាឆ្នាំ ២០១៣-២០១៤ ត្រូវដាក់ពាក្យប្រឡងថ្នាក់ជាតិ ដែលនឹងប្រព្រឹត្តទៅនៅថ្ងៃទី២៤និង២៥ ខែមករា ឆ្នាំ២០១៥ សម្រាប់ទ្រឹស្តី និងថ្ងៃទី០៥ ខែកុម្ភៈ សម្រាប់ជំនាញគ្លីនិក។ និស្សិតបង់ថ្លៃប្រឡងថ្នាក់ជាតិចំនួន១២៥ដុល្លារក្នុងម្នាក់ ហើយបើប្រឡងធ្លាក់ត្រូវបង់លុយប្រឡងម្តងទៀត៕
មិនមែនមានតែនិស្សិតតែជាង៥០នាក់ដែលមកតវ៉ា នៅមុខសាកលវិទ្យាល័យវិទ្យាសាស្ត្រសុខាភិបាល នៅព្រឹកនេះនោះទេ ដែលមិនពេញចិត្តចំពោះការកំណត់របស់ក្រសួង ប៉ុន្តែនិស្សិតភាគច្រើន ទាំងឱសថសាស្ត្រ វេជ្ជបណ្ឌិតទូទៅ គិលានុបដ្ឋាយិកា និងទណ្ឌបណ្ឌិតជាដើម ដែលត្រូវបញ្ចប់ការសិក្សា និងត្រូវប្រឡងថ្នាក់ជាតិនៅឆ្នាំនេះ ក៏បានសម្តែងការមិនពេញចិត្តផងដែរ ប៉ុន្តែគ្រាន់តែពួកគាត់មិនហ៊ានចេញមុខ តែប៉ុណ្ណោះ ដោយហេតុផលថា ខ្លាចមានការរឹតបន្តឹងនៅពេលប្រឡង ឬពេលធ្វើអត្រាកំណែវិញ្ញាសា។ នេះបើតាមការបញ្ជាក់ របស់តំណាងនិស្សិតម្នាក់ដែលសុំមិនបញ្ចេញឈ្មោះ។
ជានិស្សិតផ្នែកវេជ្ជសាស្ត្រជំនាន់ទី៣៥ ដែលត្រូវប្រឡងថ្នាក់ជាតិនៅឆ្នាំនេះដែរ បានឱ្យដឹងថា រូបគាត់ និង និស្សិតទាំងអស់ ពេញចិត្តនិងការប្រឡងថ្នាក់ជាតិ ដែលជាផ្នែកមួយនៃការពង្រឹងគុណភាពរបស់វេជ្ជបណ្ឌិតដែលបញ្ចប់ការសិក្សា ប៉ុន្តែមិនពេញចិត្តចំពោះការកំណត់ទិញពាក្យប្រឡងចំនួន១២៥ដុល្លារ ដែលលោក អះអាងថា វិធានការនេះ មិនមែនជាវិធានការដែលអាចឱ្យ វិស័យសុខាភិបាល មានគុណភាពប្រសើរជាងនេះនោះទេ តែជាការជំរិតទារលុយពីនិស្សិតដោយស្របច្បាប់។
និស្សិតពេទ្យរូបនោះ បានពន្យល់យ៉ាងដូច្នេះថា៖«ប្រសិនបើរាជរដ្ឋាភិបាលពិតជាចង់ពង្រឹងគុណភាពក្នុងវិស័យសុខាភិបាល រដ្ឋាភិបាលមិនត្រូវមកជំរិតយកប្រាក់ពីនិស្សិតតាមរយៈរូបភាពផ្សេងៗនោះទេ រដ្ឋាភិបាលត្រូវតែយកថវិកាជាតិមកផ្គត់ផ្គង់វិស័យនេះ ដូចជាការផ្តល់ជំនួយដូចជាឧបករណ៍ទំនើបៗពាក់ព័ន្ធនឹងផ្នែកសុខាភិបាល ដើម្បីឱ្យនិស្សិតបានអនុវត្តន៍ ផ្តល់ប្រាក់បៀវត្សដល់សាស្ត្រាចារ្យឱ្យគ្រប់គ្រាន់ និងត្រូវរកមន្ទីរពេទ្យឱ្យបានគ្រប់គ្រាន់ ដើម្បីឱ្យនិស្សិតចុះទៅអនុវត្តន៍ការងារជាដើម»។
ពាក់ព័ន្ធនឹងការកំណត់អាយុត្រឹម៣០ឆ្នាំ សម្រាប់វេជ្ជបណ្ឌិតដែលចង់ប្រឡងក្របខណ្ឌរដ្ឋវិញ និស្សិតទាំងអស់ស្នើសុំឱ្យក្រសួង កំណត់អាយុប្រមាណ៣៥ឆ្នាំសម្រាប់ថ្នាក់វេជ្ជសាស្ត្រទូទៅ និងសម្រាប់ថ្នាក់ឯកទេសឱ្យលើសពីអាយុ៣៥ឆ្នាំ។ និស្សិតដដែលនោះបានបន្ថែមថា៖«និស្សិតត្រូវចំណាយពេលរៀនយូរណាស់ អ្នកខ្លះត្រូវ៦ទៅ៨ឬ៩ឆ្នាំតាមជំនាញនីមួយៗ ហើយរហូតដល់រៀនចប់ គឺផុតអាយុប្រឡងចូលធ្វើការរដ្ឋបាត់ទៅហើយ ហើយក៏មិនប្រាកដថា ប្រឡងម្តងជាប់នោះទេ អ្នកខ្លះត្រូវប្រឡង២ឬ៣ដងឯណោះទើបជាប់»។
សូមបញ្ជាក់ថាកាលពីពេលថ្មីៗនេះ គណៈកម្មាធិការប្រឡងថ្នាក់ជាតិរបស់ទីស្ដីការគណៈរដ្ឋមន្ដ្រី បានចេញសេចក្ដីជូនដំណឹង ស្ដីពីការប្រឡងថ្នាក់ជាតិនៅតាមគ្រឹះស្ថានវិស័យសុខាភិបាលប្រចាំឆ្នាំ២០១៥ ។ សេចក្តីជូនដំណឹងបន្តថា និស្សិតពេទ្យទាំងអស់ដែលបានបញ្ចប់ការសិក្សាឆ្នាំ ២០១៣-២០១៤ ត្រូវដាក់ពាក្យប្រឡងថ្នាក់ជាតិ ដែលនឹងប្រព្រឹត្តទៅនៅថ្ងៃទី២៤និង២៥ ខែមករា ឆ្នាំ២០១៥ សម្រាប់ទ្រឹស្តី និងថ្ងៃទី០៥ ខែកុម្ភៈ សម្រាប់ជំនាញគ្លីនិក។ និស្សិតបង់ថ្លៃប្រឡងថ្នាក់ជាតិចំនួន១២៥ដុល្លារក្នុងម្នាក់ ហើយបើប្រឡងធ្លាក់ត្រូវបង់លុយប្រឡងម្តងទៀត៕
© រក្សាសិទ្ធិដោយ thmeythmey.com
