ជាតិ
សង្គមជាតិ
អ្នកកាសែតខ្មែរថ្កោលទោសទង្វើធ្វើឃាតលើអ្នកកាសែតបារាំង
× ភ្នំពេញ៖ អ្នកកាសែតខ្មែរប្រកាសថ្កោលទោសភេវរជនដែលបានសម្លាប់អ្នកកាសែតបារាំង។ ការថ្កោលទោសនេះបានធ្វើឡើងបន្ទាប់ពីមានការវាយប្រហារ ទៅលើសារព័ត៌មានប្រចាំសប្តាហ៍បារាំង Charlie Hebdo នៅផ្លូវ Nicolas-Appert ក្នុងទីក្រុងប៉ារីស ប្រទេសបារាំង កាលពីល្ងាចថ្ងៃទី៧ ខែមករា ឆ្នាំ២០១៥ ដែលបានបណ្តាលឲ្យមនុស្សស្លាប់ចំនួប១២នាក់ក្នុងនោះប៉ូលិស២នាក់ អ្នកកាសែត៨នាក់ ភ្ញៀវ១នាក់ និងភ្នាក់ងារទទួលភ្ញៀវ១នាក់។ ក្នុងចំណោមអ្នកកាសែត៨នាក់ អ្នកគូរូបត្លុកមានរហូតដល់ទៅ៥នាក់។
ខាងក្រោមនេះជាប្រតិកម្មរបស់អ្នកកាសែតខ្មែរចំពោះឃាតកម្មលើអ្នកកាសែត Charlie Hebdo។
លោក ពុយ គា អ្នកឆ្លើយឆ្លងព័ត៌មាននៃទីភ្នាក់ងារសារព័ត៌មានជប៉ុនក្យូដូ(Kyodo)៖«អ្នកកាសែតគ្រាន់តែជាអ្នកសរសេរជួយឆ្លុះបញ្ចាំងសង្គមដើម្បីផលប្រយោជន៍រួមតែប៉ុណ្ណោះ។ ដូច្នេះ ពួកគេមិនត្រូវរងនូវការសម្លាប់ឡើយ។ ការសម្លាប់នេះ គឺជាការបំបិទសេរីភាពក្នុងការបញ្ចេញមតិ។ ខ្ញុំមានការសោកស្តាយ»។
លោក កៃ គឹមសុង និពន្ធនាយកកាសែតភ្នំពេញប៉ុស្តិ៍ជាភាសាខ្មែរ៖«ខ្ញុំថ្កោលទោសយ៉ាងខ្លាំងចំពោះភេវេរជនដែលបានធ្វើឃាតលើអ្នកកាសែតបារាំង។ ក្រុមភេវរកកំពុងចាត់ទុកសារព័ត៌មានថា ជាឧបសគ្គរបស់ពួកគេ»។
លោក សយ សុភាព អគ្គនាយកសារព័ត៌មានអនឡាញដើមអំពិល៖«ជាដំបូងខ្ញុំសូមសម្តែងការសោកស្តាយចំពោះការបាត់បង់ជីវិតអ្នកកាសែតបារាំង។ បន្ទាប់មក ខ្ញុំសូមថ្កោលទោសទង្វើភេវរករដែលបានសម្លាប់អ្នកកាសែតបារាំង។ ព្រមពេលជាមួយគ្នា ខ្ញុំសូមអំពាវនាវាអោយអ្នកកាសែតទាំងអស់ត្រូវប្រុងប្រយ័ត្នលើសំណេររបស់ខ្លួន»។
លោក ឆាយ សុផល សមាជិកគណៈកម្មាធិការនាយកក្លិបអ្នកកាសែតកម្ពុជា៖«ខ្ញុំមានការសោកស្តាយមែនទែនចំពោះដំណឹងដែលថា អ្នកកាសែតបារាំងត្រូវបានគេចូលទៅបាញ់ទីស្នាក់ការផ្ទាល់តែម្តង។ នេះគឺជាទង្វើកំសាកបំផុតរបស់ឃាតករ»។
លោក ហ៊ុយ វណ្ណៈ អគ្គនាយករងនៃទូរទស្សន៍ CNC៖«ការសម្លាប់អ្នកកាសែត គឺជាការសម្លាប់មនសិការ និងជាការប្រឆាំងស្មារតីរបស់មនុស្ស។ ការយកកាំភ្លើងទៅបាញ់អ្នកកាសែតដែលកាន់តែប៊ិច គឺជាអំពើអមនុស្សធម៌។ ខ្ញុំថ្កោលទោស និងអំពាវនាវអោយមានការរកយុត្តិធម៌ជូនជនរងគ្រោះ»។
© រក្សាសិទ្ធិដោយ thmeythmey.com