សង្គមអន្តរជាតិ
អន្តរជាតិ
នៅលោកខាងលិច ខែមករា គឺជាខែដែលមានអត្រាលែងលះខ្ពស់ជាងគេបំផុត
× នៅក្នុងបណ្ដាប្រទេសជាច្រើននៅលោកខាងលិច នៅពេលចូលដល់ខែមករានេះ មេធាវីផ្នែកអាពាហ៍ពិពាហ៍ គឺមានការងារមមាញឹកជាងគេបង្អស់ ព្រោះថាមានប្ដីប្រពន្ធជាច្រើនគូ បានសម្រុកទៅសុំការពិគ្រោះយោបល់ពីការលែងលះ និងខ្លះទៀតសម្រេចចិត្តដាក់ពាក្យសុំលែងលះតែម្ដង។ នេះបើយោងតាមគេហទំព័រ market watch ។
លោក James McLaren ប្រធានបណ្ឌិតសភាមេធាវីអាពាហ៍ពិពាហ៍អាមេរិក បានប្រាប់គេហទំព័រខាងលើថា លោកតែងតែសង្កេតឃើញថា ចំនួនមនុស្សដែលមកស្វែងរកការប្រឹក្សាយោបល់ និងចុងក្រោយបានសម្រេចចិត្តដាក់ពាក្យលែងលះនោះ គឺមានការកើនឡើងយ៉ាងខ្លាំងនៅក្នុងខែមករា។
លោកបានបន្ថែមថា ចំនួនអ្នកដែលបានមករកមេធាវីដើម្បីប្រឹក្សាយោបល់ និង ដាក់ពាក្យលែងលះ គឺមានអត្រា មួយ ភាគ បី នៅក្នុងខែមករា ពោលគឺខ្ពស់ជាងខែណាៗទាំងអស់ ហើយនិន្នាការនេះគឺបានចាប់ផ្ដើមពីខែមករា រហូតដល់ខែមីនា។
ដោយឡែកលទ្ធផលនៃការស្ទង់មតិរបស់សហគ្រាសប្រឹក្សាផ្នែកច្បាប់ Irwin Mitchellទៅលើប្ដីប្រពន្ធជាង ២០០០ គូ បានបង្ហាញថា និន្នាការស្រដៀងគ្នានេះ ក៏មានកើតមានផងដែរនៅក្នុងចក្រភពអង់គ្លេស ដោយអត្រានៃការដាក់ពាក្យលែងលះនៅក្នុងខែមករានេះ គឺមានរហូតដល់ មួយ ភាគ ប្រាំ។ នៅក្នុងខែមករានេះផងដែរមេធាវីការពាររឿងក្ដីលែងលះគ្នា បានទទួលឯកសារសុំលែងលះចំនួន ២៧ ភាគរយ ពោលគឺមានអត្រាខ្ពស់បំផុត បើធៀបនឹងអត្រាជាមធ្យមក្នុងផ្សេងៗទៀតនោះ។
លោក James McLaren បានពន្យល់ពីមូលហេតុសំខាន់ៗចំនួនពីរ ដែលធ្វើឲ្យខែមករា មានអត្រានៃការលែងលះខ្ពស់ ទីមួយគឺ ប្ដីប្រពន្ធភាគច្រើនដែលមានរឿងរ៉ាវរហូតដល់ចង់លែងលះ គ្នា មិនចង់ទៅដាក់ពាក្យបណ្ដឹងនៅចុងឆ្នាំនោះទេ ព្រោះវាជាពេលវេលាឈប់សម្រាក ហើយតុលាការត្រូវការពេលវេលាយ៉ាងតិចណាស់ក៏ ៣ សប្ដាហ៍ដែរដើម្បីដោះស្រាយរឿងក្ដីប្រភេទនេះ ហេតុដូច្នេះហើយទើបពួកគេរង់ចាំរហូតដល់ខែមករាតែម្ដងទៅ។
មូលហេតុទីពីរគឺថា ប្ដីប្រពន្ធដែលគ្រោងនឹងលែងលះគ្នា ពួកគេចង់ទុកពេលនៅជួបជុំជាមួយគ្រួសាររបស់ពួកគេជាលើកចុងក្រោយសិន នៅក្នុងរដូវកាលឈប់សម្រាកចុងឆ្នាំ ព្រោះមានពិធីបុណ្យជាច្រើននៅលោកខាងលិចដែលនឹងត្រូវធ្វើនៅចុងឆ្នាំដូចជា បុណ្យ Thanksgiving Hanukkah Christmas ឬបុណ្យឆ្លងឆ្នាំសកលជាដើម៕
© រក្សាសិទ្ធិដោយ thmeythmey.com