អន្តរជាតិ
នយោបាយអន្តរជាតិ
លោកពូទីនអនុញ្ញាតអោយជនបរទេសចូលបម្រើវិស័យយោធារុស្ស៊ី
×
ប្រធានាធិបតីរុស្ស៊ីលោក វ្ល៉ាឌីមៀ ពូទីន បានសម្រេចចុះហត្ថលេខាលើក្រឹត្យមួយដែល អនុញ្ញាតអោយបណ្តាជនបរទសទាំងអស់ចូលបម្រើការងារក្នុងវិស័យយោធារុស្ស៊ី និងកម្លាំងរបស់ក្រសូងមហាផ្ទៃ។ ព័ត៌មានពាក់ព័ន្ធនឹងការអនុញ្ញាតអោយជនបរទេស អាចចូលបម្រើការងារក្នុងវិស័យយោធាបាន នេះត្រូវបានគេផ្សាយនៅលើគេហទំព័ររបស់ រដ្ឋាភិបាលក្រេមឡាំង។
រាយការណ៍ព័ត៌មានដោយ លោក រឿន ភារុន
មេដឹកនាំកំពូលរុស្ស៊ីលោក វ្ល៉ាឌីមៀ ពូទីន បានចុះហត្ថលេខាលើក្រឹត្យមួយ ដែលបើកផ្លូវ ដល់បណ្តាជនបរទេសដែលមានចំណាប់អារម្មណ៍ ចង់បំពេញកាងារក្នុងវិស័យយោធា អាចចូលបម្រើការងារជាកងទ័ពរុស្ស៊ីបានដោយសេរី។
បើតាមព័ត៌មានដែលបានផ្សព្វផ្សាយនៅលើគេហទំព័ររដ្ឋាភិបាលរុស្ស៊ី ដែលយោងតាម ក្រឹត្យប្រធានាធិបតី រាល់ជនបរទេសដែលមានវ័យពី១៨ ដល់ ៣០ឆ្នាំ ចេះនិយាយភាសា រុស្ស៊ី និងមិនធ្លាប់ជាប់ពាក់ព័ន្ធឬរងការកាត់ទោសដោយប្រព្រឹត្តបទឧក្រិដ្ឋអ្វីនោះ អាចដាក់ពាក្យស្នើសុំបំពេញភារកិច្ចជាកងទ័ពសហព័ន្ធរុស្ស៊ីបាន។
បើតាមការអោយដឹងពីមន្ត្រីរុស្ស៊ី ក្រឹត្យប្រធានាធិបតីស្តីពីការអនុញ្ញាតអោយជនបរទេស ចូលបម្រើកងទ័ពរុស្ស៊ីនេះ ត្រូវបានលោក ពូទីន ចុះហត្ថលេខាងតាំងពីថ្ងៃ ២មករា ឆ្នាំ២០១៥មកម្ល៉េះ ប៉ុន្តែគេទើបឃើញចុះផ្សាយក្នុងគេហទំព័ររដ្ឋាភិបាលកាល ពីចុងសប្តាហ៍មុននេះ។
ជនបរទេសដែលស្ម័គ្រចិត្តបម្រើការងារជាទាហានរុស្ស៊ី ជាទាហានកិច្ចសន្យារយៈពេល ប្រាំឆ្នាំ ហើយប្រាក់បៀវត្សន៍ពួកគេអាចទទួលបានរហូតដល់ ៥០០ដុល្លារអាមេរិកក្នុង មួយខែ។
យ៉ាងណាក៏ដោយ ការចេញច្បាប់អនុញ្ញាតអោយជនបរទេសចូលបម្រើកងទ័ពរុស្ស៊ីនេះ នឹងជួយសម្រួលដល់យុវជន ដែលមកពីបណ្តាប្រទេសនៅអាស៊ីកណ្តាលជាអតីតរដ្ឋសហ ភាពសូវៀតនោះ ដែលពួកគេបន្តឆ្លងចូលមកកាន់ប្រទេសរុស្ស៊ីក្នុងក្របខ័ណ្ឌជាពលករ ចំណាកស្រុកនោះ អាចចុះឈ្មោះបម្រើការងារជាទាហាន និងទទួលបានផលប្រយោជន៍ ការងារនិងប្រាក់កម្រៃសមរម្យផងដែរ។
ចំណែកបច្ចុប្បន្ននេះ គេឃើញមានប្រជាជន ជាពិសេសយុវជនមកពីអតីតរដ្ឋសភាព សូវៀតនៅអាស៊ីកណ្តាល ដែលកំពុងស្វះស្វែងរកកាងារធ្វើស្រាប់នោះ បង្ហាញចំណាប់ អារម្មណ៍ ហើយពួកគេប្រាកដជានឹងចុះឈ្មោះចូលបម្រើការងារជាទាហានរុស្ស៊ីជាក់ ជាមិនខាន។
ជនបរទេសដែលចូលបម្រើការងារជាទាហានរុស្ស៊ីនឹងទទួលបានសញ្ជាតិរុស្ស៊ី។ បច្ចុប្បន្ននេះ ជនបរទេសដែលបម្រើការងារជាទាហានរុស្ស៊ីមានជាច្រើននាក់ ដែលពួកគេបំពេញការងារក្នុងប្រទេសរបស់ពួកគេ ហើយរុស្ស៊ីមានមូលដ្ឋានកងទ័ព នៅក្នុងបណ្តាប្រទេសមួយចំនួនដូចជា Armenia និងTajikistan ហើយនិងនៅតាម បណ្តាអតីតរដ្ឋសភាពសូវៀតផ្សេងទៀតនៅ Moldova និង Georgia ថែមទៀតផង។
បើតាមក្រឹត្យខាងលើ ទាហានដែលជាជនបរទេសអាចនឹងត្រូវបញ្ជូនទៅបរទេស ក្នុងករណីមានសង្គ្រាមកើតឡើង ប៉ុន្តែមានមតិខ្លះលើកឡើងថា ការសម្រេចអនុម័ត ក្រឹត្យថ្មីនេះអាចពាក់ព័ន្ធនឹងបញ្ហាក្នុងប្រទេសអ៊ុយក្រែន និងការបង្កើនកម្លាំងទប់ទល់ ជាមួយបក្សសម្ព័ន្ធយោធាណាតូផងដែរ។ ប៉ុន្តែបើតាមអ្នកវិភាគ ទង្វើរបស់ក្រុងម៉ូស្គូដូចជា មិនមានជាប់ពាក់ព័ន្ធអ្វីនឹងបញ្ហាអ៊ុយក្រែនឡើយ ប៉ុន្តែរុស្ស៊ីចង់ជំរុញអោយកងទ័ពរបស់ខ្លួនបង្កើនសមត្ថភាព និងវិជ្ជាជីវៈរបស់ខ្លួន ព្រមទាំងបង្កើនឥទ្ធិពលរបស់រុស្ស៊ីលើបណ្តាប្រទេសនៅអាស៊ីកណ្តាលដែលសុទ្ធជាអតីតរដ្ឋសហភាពសូវៀតផងដែរ៕
© រក្សាសិទ្ធិដោយ thmeythmey.com