សង្គមអន្តរជាតិ
អន្តរជាតិ
ម្ចាស់ក្រុមហ៊ុនវ័យក្មេងនៅចិន ផ្ដល់រង្វាន់ជារថយន្ត BMW ៤គ្រឿងដល់បុគ្គលិកឆ្នើម
×![]()
ស្ថិតក្នុងវ័យ ២១ ឆ្នាំ កញ្ញា NiuMutong គឺជាសហគ្រិនវ័យក្មេងម្នាក់នៅក្នុងប្រទេសចិន នាងមានជំនឿថាបុគ្គលិកដែលធ្វើការដោយសប្បាយចិត្ត គឺជាបុគ្គលិកដែលមានផលិតភាពខ្ពស់។ ដោយយោងលើហេតុផលនេះ នាងបានសម្រេចផ្ដល់រង្វាន់លើកទឹកចិត្តដល់បុគ្គលិកឆ្នើមប្រចាំឆ្នាំ នៅក្នុងក្រុមហ៊ុនរបស់នាង ជារថយន្តBMW ៤ គ្រឿង ដល់បុគ្គលិកឆ្នើម ៤ រូប។ នេះបើយោងតាមការផ្សាយរបស់ CCTV ។
បណ្ដាញផ្សព្វផ្សាយមជ្ឈឹមរដ្ឋចិនមួយនេះ ក៏បានផ្សាយថា នាង NiuMutong គឺជាម្ចាស់ក្រុមហ៊ុនអ៊ីនធឺណែតមួយ ត្រូវបានអ្នកប្រព័ន្ធផ្សព្វផ្សាយសង្គមនៅក្នុងប្រទេសចិន ចាប់អារម្មណ៍ជាខ្លាំង បន្ទាប់ពីនាងប្រកាសផ្ដល់រង្វាន់ជារថយន្តBMW ៤ គ្រឿង បុគ្គលិករបស់នាងដែលជាផ្នែកមួយនៃប្រាក់រង្វាន់ចុងឆ្នាំរបស់ពួកគេនោះ។
កញ្ញា NiuMutong បានចាប់ផ្ដើមអាជីវកម្មរបស់នាងនៅក្នុងឆ្នាំ ២០១១ ដោយបង្កើតគេហទំព័រលក់ផលិតផលសម្រកទម្ងន់ ផលិតផលថែរក្សាស្បែក និងផលិតផលថែរក្សាសុខភាពនៅលើប្រព័ន្ធអ៊ីនធើណែត ដែលបច្ចុប្បន្ននេះ បាននឹងកំពុងដំណើរការនៅក្នុងប្រទេស ចិន អាមេរិក អង់គ្លេស បារាំង អ៊ីតាលី និងណូវែលសេឡង់។
មកដល់ពេលនេះនាងបានគ្រប់គ្រងបុគ្គលិកសរុបចំនួនជាង ៧០០០ នាក់ ដែលភាគច្រើននៃបុគ្គលិករបស់នាងគឺជានិស្សិតដែលរៀននៅសាកលវិទ្យាល័យ និងអ្នកខ្លះទៀតបានបញ្ចប់ថ្នាក់មហាវិទ្យាល័យផងដែរ។ ចាប់តាំងពីពេលបើកក្រុមហ៊ុននេះមក នាងរកប្រាក់ចំណូលបានសរុបចំនួន ៣២ លានដុល្លារ ពីការលក់ផលិតផលទាំងនោះ តាមអ៊ីនធើណែត។
កញ្ញា NiuMutong ក៏បានឲ្យដឹងថា រង្វាន់រថយន្ត BMW ៤ គ្រឿងនេះ គឺគ្រាន់តែរង្វាន់បន្ថែមសម្រាប់បុគ្គលិកឆ្នើមប្រចាំឆ្នាំនោះទេ ដោយពួកគេទាំង ៤ នាក់ ដែលជាអតីតមិត្តរៀននៅមហាវិទ្យាល័យរបស់នាងផងនោះ បានទទួលរង្វាន់លើកទឹកចិត្ត ម្នាក់ៗចំនួន ១,៦ លានដុល្លាររួចទៅហើយ៕
© រក្សាសិទ្ធិដោយ thmeythmey.com
