អន្តរជាតិ
នយោបាយអន្តរជាតិ
×![]()
ប្រទេសបារាំងនឹងរៀបចំកិច្ចប្រជុំពិសេសស្តីពីការប្រឆាំងភេរវកម្មអន្តរជាតិ ដោយមានការចូលរួមពីបណ្តា ប្រទេសជាច្រើន នៅថ្ងៃអាទិត្យខាងមុខនេះ។ ការរៀបចំកិច្ចប្រជុំប្រឆាំងភេរវកម្ម អន្តរជាតិនេះ ធ្វើឡើង ដើម្បីស្វែងវិធានការ និងការសហការគ្នារវាងប្រទេសនានាក្នុង ពិភពលោក ដើម្បីដោះស្រាយនិងកម្ចាត់ ក្រុមភេរវជន ក្រោយមានករណីវាយប្រហារសម្លាប់រង្គាលនៅបារាំងកាលពីថ្ងៃពុធ។
កញ្ញា ខន ចំប៉ា លម្អិតព័ត៌មាននេះ
កិច្ចប្រជុំពិសេសស្តីពីការប្រឆាំងភេរវកម្មអន្តរជាតិនឹងត្រូវរៀបចំឡើងនៅក្នុងប្រទេស បារាំងនៅថ្ងៃ អា ទិត្យខាងមុខនេះ។ កិច្ចប្រជុំពិសេសនេះនឹងមានការចូលរួមពីបណ្តាមេដឹកនាំ ប្រទេសជាច្រើន ជាពិ សេសតំបន់អឺរ៉ុបដើម្បីស្វែងរកវិធានការចាំបាច់និងមានប្រសិទ្ធភាពដើម្បីប្រយុទ្ធប្រឆាំងក្រុមភេរវជន និងទប់ស្កាត់គ្រោះមហន្តរាយសន្តិសុខដែលបង្កឡើងដោយក្រុមភេរវជន។
រដ្ឋមន្ត្រីក្រសួងមហាផ្ទៃ បារាំងបានបញ្ជាក់ថា លោកនឹងធ្វើជាប្រធាននៃកិច្ចប្រជុំពិសេសនេះ ដោយក្នុងកិច្ចប្រជុំមានការចូល រួមពីបណ្តាប្រទេសនៅតំបន់អឺរ៉ុប និងសហរដ្ឋអាមេរិកផងដែរ ដោយប្រទេសទាំងអស់នឹងមានលទ្ធភាព ផ្តល់អនុសាសន៍ និងលើកឡើងពីវិធានការចាំបាច់ដើម្បីប្រើប្រាស់ប្រឆាំងក្រុមភេរវជនផងដែរ។ គេមិន ដឹងថា កិច្ចប្រជុំខាងមុខនេះនឹងមានប្រទេសច្រើនប៉ុណ្ណាចូលរួមឡើយ។ប៉ុន្តែគេដឹងថាបណ្តាប្រទេសភាគច្រើនមកពីតំបន់អឺរ៉ុបនឹងចូលរួមក្នុងកិច្ចពិភាក្សាពហុភាគី ដ្បិតសន្តិសុខ នៅក្នុងតំបន់អឺរ៉ុបរងការគំរាមកំហែងខ្លាំងពីសំណាក់ក្រុមភេរវជនជ្រុលនិយម។
បើតាមការអោយដឹងពីរដ្ឋមន្ត្រីមហាផ្ទៃបារាំង បារាំងជាអ្នកផ្តួចផ្តើមអោយមានការជជែកពិភាក្សាគ្នានេះ ដោយអញ្ជើញបណ្តាសមភាគីដែលជាប្រទេសមានឥទ្ធិពលមកពីសហភាពអឺរ៉ុប និងសហរដ្ឋអាមេរិកផងអោយមកកាន់ប្រទេសបារាំង។
កិច្ចប្រជុំបន្ទាន់ ដើម្បីរកវិធានការទប់ស្កាត់ និងប្រឆាំងក្រុមភេរជនត្រូវគេកំណត់បង្កើតឡើងក្រោយមានសោកនាដកម្មមួយកើតឡើងនៅក្នុងប្រទេសបារាំង ដោយ ក្រុមភេរវជនបានវាយប្រហារលើការិយាល័យទស្សនាវដ្តីមួយកន្លែងសម្លាប់មនុស្សអស់រហូតដល់១២នាក់។ ទាក់ទិនករណីវាយប្រហារដ៏ព្រៃផ្សៃនេះកំពុងធ្វើអោយបណ្តាប្រទេសអឺរ៉ុបព្រួយបារម្ភ ហើយកំពុងស្វះស្វែងរកការពិភាក្សានិងសហការគ្នាដើម្បីធានាថា តំបន់អឺរ៉ុបដែលជាតំបន់មានសន្តិភាព និងសន្តិសុខនោះ រួចផុតពីការវាយប្រហាររបស់ក្រុមភេរវជន។
កិច្ចប្រជុំនេះដែរ នឹងក្លាយជាវេទិការសម្រាប់បណ្តាប្រទេសជាមិត្តរបស់បារាំងបង្ហាញនូវការចូលរួម និងសាមគ្គីជាមួយបារាំងដើម្បីប្រយុទ្ធតទល់ជាមួយក្រុមភេរវជនដែលកំពុងបង្កអស្ថិរភាព អសន្តិសុខ និងធ្វើអោយជីវិតប្រជាជនរងគ្រោះថ្នាក់នោះ។
បើតាមការអោយដឹងពីមន្ត្រីក្រសួងការបរទេសអាមេរិក កិច្ចប្រជុំនាពេលខាងមុខនឹងផ្តោតលើការពិភាក្សាពីវិធានការទប់ទល់ក្រុមភេរវជនជ្រុលនិយម និងទប់ស្កាត់អោយបាននូវក្រុមសកម្មប្រយុទ្ធប្រទេសដែលឆ្លងដែនចេញទៅប្រយុទ្ធជាដើមផង។ សហរដ្ឋអាមេរិក និងបណ្តាប្រទេសដែលមានឥទ្ធិពលជាងគេនៅអឺរ៉ុបមានអាឡឺម៉ង់ អង់គ្លេស ជាដើមនោះកំពុងបង្ហាញជំហររួមគ្នាមួយគាំទ្ររដ្ឋាភិបាលក្រុងប៉ារីស ដើម្បីប្រយុទ្ធប្រឆាំងនឹងក្រុមភេរវជន ហើយបណ្តាប្រទេសទាំងនេះក៏ដើរតួនាទីសំខាន់ផងដែរក្នុងការកម្ចាត់ក្រុមភេរជនរដ្ឋឥស្លាមនៅក្នុងប្រទេសស៊ីរី និងអ៊ីរ៉ាក់៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
