សង្គមអន្តរជាតិ
អន្តរជាតិ
ជនគ្មានទីជម្រកក្នុងក្រុងមែលប៊នអាចមើលកុននិងចូលអាងហែលទឹកដោយមិនគិតថ្លៃ
×![]()
អាជ្ញាធរក្នុងរដ្ឋធានីមែលប៊ន របស់ប្រទេសអូស្ត្រាលី នឹងផ្ដល់សំបុត្រចូលមើលកុន និងប័ណ្ណចូលហែលទឹកក្នុងអាងហែលទឹកក្នុងក្រុង ដោយមិនគិតថ្លៃ ទៅឲ្យជនគ្មានទីជម្រក ដើម្បីអាចឲ្យពួកគេគេចផុតពីបញ្ហាអាកាសធាតុក្ដៅខ្លាំង ដែលបណ្ដាលមកពីរលកកម្ដៅនៅក្នុងរដូវក្ដៅឆ្នាំនេះ។ នេះបើយោងតាម កាសែត Theguardian។
ប្រភពខាងលើក៏បានផ្សាយថា គម្រោងរបស់អាជ្ញាធរក្រុងមែលប៊ននេះ គឺត្រូវបានគេធ្វើឡើងក្រោយពេលដែលមានការព្យាករណ៍ថា នឹងមានរលកកម្ដៅវាយប្រហារលើប្រទេសអូស្ត្រាលី ក្នុងរដូវក្ដៅឆ្នាំនេះ។ សំបុត្រចូលមើលកុន និងហែលទឹកដោយមិនគិតថ្លៃនោះ គឺនឹងត្រូវចែកដល់ជនគ្មានទីជម្រកចំនួន ១៣៤៣ នាក់ នៅក្នុងទីក្រុង មែលប៊ន និងជនគ្មានផ្ទះសម្បែងក្នុងរដ្ឋ Victoria ចំនួន ២២ ០០០ នាក់។
អ្នកនាំពាក្យសាលាក្រុងមែលប៊ន បានឲ្យដឹងថា កម្ដៅខ្លាំងគឺជាឃាតករស្ងៀមស្ងាត់មួយធ្វើមានចំនួនអ្នកស្លាប់ខ្ពស់បំផុត ក្នុងចំណោមជនងាយរងគ្រោះបំផុតនៅក្នុងទីក្រុងនេះ។ អ្នកនាំពាក្យរូបនេះបានបន្ថែមថា
ការចូលទៅមើលកុនក្នុងរោងភាពយន្ដ នឹងអាចឲ្យពួកគេ ទទួលបាននូវភាពត្រជាក់សុវត្ថិភាពការស្វាគមន៍និងបរិស្ថានល្អរួមបញ្ចូលគ្នា ដែលធ្វើឲ្យពួកគាត់មានអារម្មណ៍សប្បាយមួយរយៈ។
នាយកប្រតិបត្តិនៃក្រុមប្រឹក្សាជនគ្មានផ្ទះសម្បែង លោកស្រី Jenny Smith បាននិយាយថាយុទ្ធសាស្ត្រនេះគឺជាគំនិតផ្តួចផ្តើដ៏អស្ចារ្យប៉ុន្តែជនគ្មានលំនៅដ្ឋានគឺមានបញ្ហាពេញមួយឆ្នាំ។
លោកស្រីបានបញ្ជាក់ថា អាកាសធាតុត្រជាក់នៅក្នុងរោងកុនរឺក៏អាងហែលទឹក គ្រាន់តែជាការជួយសង្គ្រោះបន្ទាន់មួយតែប៉ុណ្ណោះ ប៉ុន្តែមិនមែនជាដំណោះស្រាយរយៈពេលវែងនោះទេ ដើម្បីដោះស្រាយបញ្ហាគឺរដ្ឋាភីបាល ត្រូវសាងសង់លំនៅដ្ឋានដែលមានសម្រាប់ពួកគេ ក្នុងតម្លៃមួយសមរម្យ៕
© រក្សាសិទ្ធិដោយ thmeythmey.com
