អន្តរជាតិ
ក្រុមអាល់កៃដាព្រមានវាយប្រហារបារាំងជាថ្មីនិងលោកខាងលិចផ្សេងទៀត
× ក្រុមអាល់កៃដានៅក្នុងប្រទេសយ៉េមែនបានប្រកាសព្រមានរដ្ឋាភិបាលបារាំងនិងលោកខាងលិចផ្សេងទៀតជាពិសេសក្រុងវ៉ាស៊ីនតោនចំពោះការវាយប្រហារផ្សេងទៀតដែលនឹងកើតឡើងនៅពេលខាងមុខ។ ពួកគេបញ្ជាក់ថាប្រសិនបើកលោកខាងលិចនៅបន្តគោលនយោបាយធ្វើសង្គ្រាមរំលោភឈ្លានពាន ធ្វើទុក្ខបុកម្នេញប្រទេសឥស្លាមទៀតពួកគេនឹងមិនបានសុខឡើយ។
ក្រោយមានការណីវាយប្រហារនៅក្នុងប្រទេសបារាំងដោយសម្លាប់មនុស្ស១២នាក់នៅទស្សនាវដ្តីCharlie Hebdo និងផ្សារទំនើបមួយកន្លែង ក្រុមភេរវជនអាល់កៃដានៅក្នុងប្រទេសយេម៉ែននិងនៅឧបទ្វីបអារ៉ាប់បានប្រកាសព្រមានប្រទេសបារាំងចំពោះការវាយប្រហារជាថ្មីទៀត និងលោកខាងលិចដូចជាអាមេរិក អង់គ្លេសដែលចូលរួមយ៉ាងសកម្មក្នុងការធ្វើសង្គ្រាមនៅក្នុងប្រទេសអារ៉ាប់។
នៅក្នុងខ្សែអាត់វីដេអូគេឃើញមន្ត្រីក្រុមអាល់កៃដា Harith al-Nadhari នៅឧបទ្វីបអារ៉ាប់បានថ្លែងថ្កោលទោសបណ្តាប្រទេសលោកខាងលិច និងព្រមានចំពោះការបន្តគោលនយោបាយធ្វើសង្គ្រាមនៅមជ្ឈិមបូព៌ា។ Harith al-Nadhari បានថ្លែងថា៖« វាជាការប្រសើរបើសិនជាអ្នកបញ្ឈប់ការឈ្លានពានប្រឆាំងប្រជាជនមូស្លីម ហើយអ្នកប្រហែលជានឹងមានសុវត្ថិភាព។
ប៉ុន្តែប្រសិនបើអ្នកបដិសេធដោយបន្តធ្វើសង្គ្រាមនោះ គួររង់ចាំទទួលអំណោយចុះ»។ បើទោះក្រុមនេះមិនបានសារភាពចំថាខ្លួនជាអ្នកនៅពីក្រោយករណីវាយប្រហារទៅលើទស្សនាវដ្តី Charlie Hebdoក៏ដោយគេដឹងច្បាស់ក្រុមនេះមានទំនាក់ទំនងជិតស្និទ្ធជាមួយជនដៃដល់ដែលត្រូវប៉ូលីសម្លាប់។
បើតាមការអះអាងរបស់សមត្ថកិច្ច ក្នុងចំណោមជនសង្ស័យដែលវាយប្រហារទស្សនាវដ្តី Charlie Hebdo នោះមានម្នាក់បានទៅរៀននៅក្នុងប្រទេសយេម៉ែន ហើយគេបានចូលរួមក្នុងការបំពាក់បំប៉នសមត្ថភាពនៅក្នុងជំរំក្រុមភេរវជនអាល់កៃដា ហើយគេបានទទួលការបណ្តុះបណ្តាលនិងរងការបញ្ជៀបមនោគមន៍វិជ្ជាសាសនាផងដែរ។ គេក៏បានទទួលការបង្ហាត់បង្រៀនពីការគោរព និងកំណត់សិទ្ធិសេរីភាពនៃការនិយាយស្តីរបស់ពួកគេមិនអោយប៉ះពាល់ដល់មេដឹកនាំសាសនាផងដែរ។
គួរបញ្ជាក់ថា ក្រោយពីតាមប្រមាញ់ក្រុមជនសង្ស័យពីរនាក់បងប្អូនអស់ប្រហែលពីរថ្ងៃ ម្សិលមិញនេះក្រុមកងម្លាំងពិសេសបារាំងបានបើកប្រតិបត្តិការរំដោះចំណាប់ខ្មាំងបួននាក់ និងសម្លាប់ជនសង្ស័យ៣នាក់ក្នុងការវាយប្រហារទស្សនាវដ្តីរូបត្លុកផងដែរ៕
© រក្សាសិទ្ធិដោយ thmeythmey.com