ជាតិ
សង្គមជាតិ
× សារជាតិអ្នកប្រមឹក
(បទពាក្យ៧)
-សារជាតិជាអ្នកប្រមឹក រាល់ថ្ងៃល្ងាចព្រឹកនឹកតែស្រា
ពេលយប់មិនទាន់រាន់ចូលបា ស្រីញីត្រៀបត្រាឱបឆ្វេងស្តាំ។
-ប្រពន្ធនៅផ្ទះទន្ទឹងផ្លូវ មិនឃើញប្តីទៅចិត្តប្រេះស្រាំ
ចាំប្តីវិលវិញតាមចំណាំ ម៉ោងប្រាំចាំប្តីពីធ្វើការ។
-តែប្តីបបួលមិត្តជុំពេញ ចិត្តមិនទោម្នេញចេញយាត្រា
ដល់ហាងផឹកស៊ីស្រែកឡូឡា សំដីក្លៀវក្លាសែនគ្រោតគ្រាត។
-នាំគ្នាលើកដាច់ថាសាច់ស្អាត ជល់កែវដូចត្មាតស្រវឹងព្រាត
ឲ្យគេគ្រាសែងឡើងរាំទៀត ចោរម្សៀតឆ្លៀតឱបទាំងស្រីស្រស់។
-ឆ្កាដៃឆ្កាជើងថ្កើងឫកពារ អន់ឫកមាយារអាប់កេរ្ដិ៍ឈ្មោះ
គេស្អប់គេខ្ពើមរំខានហួស ពេលខ្លះមានគ្រោះព្រោះសំដី។
-ខ្លះអាងខ្លួនឯងមានអំណាច កោងកាចយកមេឃទ្រាប់បាតដី
កើតឈ្លោះប្រកែកបាញ់បោះវ៉ៃ ផ្អើលពេញរាត្រីរត់ជាន់គ្នា។
-ខ្លះពេលស្រវឹងបោកកែវចាន ឡូឡារំខានគេគ្រប់គ្នា
ដូចផែនដីនេះមានតែវា ចិត្តនោះដូចមាពាលសាម៉ាន។
-នេះហើយសូរាដែលយើងផឹក ដូច្នេះគួរនឹកគួរប្រមាណ
គួរផឹកថ្លៃថ្នូរកុំថោកប្រាណ គួរផឹកចេះស្មានបានប្រពៃ។
-ផឹកស៊ីកុំក្លែមការវាយតប់ ផឹកស៊ីកុំទ្រាប់ពាក្យសំដី
ផឹកស៊ីស្រវឹងកុំដេកដី ផឹកស៊ីមានស្រីអប្រិយកេរ្តិ៍។
-ផឹកស៊ីកុំជ្រុលទល់ស្រវឹង ផឹកស៊ីកុំពឹងតែប្រាក់គេ
ផឹកស៊ីញយពេកប្រពន្ធជេរ ផឹកឥតទំនេរឈឺដល់ប្រាណ។
-ផឹកស៊ីគួរតែឲ្យថ្លៃថ្នូរ ផឹកស៊ីកុំជោរកុំភ្លេចឋាន
ផឹកស្រីគួរតែចេះប្រមាណ កុំផឹកថោកប្រាណបានគេស្អប់៕
និពន្ធដោយ៖ វិឆ័យ សុភី
© រក្សាសិទ្ធិដោយ thmeythmey.com