អន្តរជាតិ
អាមេរិកប្រុងជើងការការពារករណីវាយប្រហារដោយក្រុមភេរវជន
× ក្រោយមានការណីវាយប្រហារបន្តគ្នានៅបារាំង និងមានការព្រមានពីក្រុមភេរវជនអាល់កៃដានៅយេម៉ែនថានឹងមានការវាយប្រហារផ្សេងទៀតប្រឆាំងលោកខាងលិច នៅពេលនេះសហរដ្ឋអាមេរិកបានប្រកាសក្រើនរំលឹកប្រជាជនខ្លួនអោយប្រុងប្រយ័ត្ន និងរកវិធានការរឹតបន្តឹងសន្តិសុខក្នុងប្រទេស។ បច្ចប្បន្ននេះ ក្រុមភេរជនបច្ចុប្បន្នបានចាប់ផ្តើមអនុវត្តគោលនយោបាយថ្មី ដោយវាយប្រហារតែក្នុងប្រទេសធំៗដែលធ្វើសង្គ្រាមប្រឆាំងប្រទេសឥស្លាមតែប៉ុណ្ណោះ។
សៅ ផលនិស្ស័យ លម្អិតព័ត៌មាននេះ
សហរដ្ឋអាមេរិកជាមុខសញ្ញាធំបំផុតរបស់ក្រុមភេរវជន ដោយសារប្រទេសនេះដើរតួនាទីសំខាន់ជាគេក្នុងការតាមកម្ចាត់ក្រុមភេរវជន និងធ្វើសង្គ្រាមប្រឆាំងក្រុមភេរវជនជ្រុលនិយមនៅក្នុងតំបន់មជ្ឈិមបូព៌ា។ យ៉ាងណាក៏ដោយករណីវាយប្រហារបន្តបន្ទាប់គ្នានៅបារាំង កំពុងធ្វើអោយមហាអំណាចយោធានេះអាមេរិកនេះព្រួយបារម្ភពីសុវត្ថិភាពរបស់ខ្លួនដែរ ហើយមេដឹកនាំប្រទេសនេះបានអំពាវនាវអោយមានការរឹតបន្តឹងសន្តិសុខក្នុងប្រទេសទប់ស្កាត់ករណីភេរវកម្ម។ ម្សិលមិញនេះគេឃើញក្រសួងការបរទេសអាមរិកបានប្រកាសក្រើនរំលឹកដល់ប្រជាជនខ្លួននៅបរទេសអោយប្រុងប្រយ័ត្នខ្ពស់ និងទប់ស្កាត់ករណីវាយប្រហារប្រឆាំងអាមេរិកផងដែរ។
ក្រោយមានករណីវាយប្រហារនៅបារាំង ក្រុមអាល់កៃដានៅយេម៉ែន បានប្រកាសទទួលខុសត្រូវចំពោះការវាយប្រហារ ហើយក្រុមនេះបានប្រកាសព្រមានថាខ្លួននឹងបើកការវាយប្រហារផ្សេងទៀតប្រឆាំងលោកខាងលិចផ្សេងពីបារាំងមានអង់គ្លេស និងអាមេរិកជាដើម។ ពួកគេព្រមានចំៗថា បើចង់នៅសុខស្រួល និងសុវត្ថិភាព លោកខាងលិចទាំងនោះគួរផ្លាស់ប្តូរគោលនយោបាយរបស់ខ្លួនប្រឆាំងដោយការធ្វើសង្គ្រាម និងធ្វើទុក្ខបុកម្នេញលើបណ្តាប្រទេសឥស្លាមនៅក្នុងតំបន់មជ្ឈិមបូព៌ាផងដែរ។
ហើយពួកគេសង្កត់ធ្ងន់ថា ក្រុមភេរវជនទាំងអស់លែងវាយប្រហារប្រទេសតូចហើយ ហើយពួកគេកំពុងអនុវត្តគោលនយោបាយវាយក្បាលពស់។ ដែលនេះមានន័យថាពួកគេនឹងអុកឡុក និងវាយប្រហារនៅក្នុងប្រទេសដែលដឹកនាំកងកម្លាំងធ្វើសង្គ្រាមនៅតំបន់មជ្ឈិមបូព៌ាដើម្បីប្រឆាំងក្រុមភេរវជន និងប្រទេសឥស្លាមមួយចំនួនទៀត។ ក្រុមភេរវជនអាចនឹងបើកការវាយប្រហារប្រឆាំងនឹងប្រទេសធំៗជាពិសេសសហរដ្ឋអាមេរិក ដែលដើរតួនាទីសកម្មជាងគេនៅមជ្ឈិមបូព៌ា ហើយវាជាការដាក់សម្ពាធអោយលោកខាងលិចផ្លាស់ប្តូរគោលនយោបាយរបស់ពួកគេនៅមជ្ឈិមបូព៌ាថែមទៀតផង។
ដោយឡែកប្រធានាធិបតីអាមេរិក បារ៉ាក់ អូបាម៉ា នឹងជួបពិភាក្សាជាមួយសមភាគីលោក នាយករដ្ឋមន្ត្រីអង់គ្លេស ដេវីដ កាមេរ៉ូននៅថ្ងៃ ១៥មករាខាងមុខនេះ ដោយប្រធានបទសំខាន់សម្រាប់ការពិភាក្សារបស់មេដឹកនាំទាំងពីរនេះគឺបញ្ហាសន្តិសុខសាកល ជាពិសេសការប្រឆាំងក្រុមភេរវជន និងវិបត្តិនៅអ៊ុយក្រែនជាដើម។ តាមពិតទៅមេដឹកនាំទាំងពីរនាក់ត្រូវបានគេស្គាល់ថាមានទំនាក់ទំនងជិតស្និទ្ធគ្នាខ្លាំង ហើយលោកអូបាម៉ាធ្លាប់ហៅលោក កាម៉េរូន ប្អូនប្រុសថែមទៀតផង។
ក្នុងជំនួបពិភាក្សានាពេលខាងមុខ សមភាគីទាំងពីរនឹងលើកឡើងករណីក្រុមភេរវជនរដ្ឋឥស្លាមជ្រុលនិយមនៅស៊ីរីនិងអ៊ីរ៉ាក់ និងវិធានការប្រឆាំងក្រុមភេរវជនផ្សេងទៀតផងដែរ។ អង់គ្លេសតែងតែគាំទ្រ និងសហការជាមួយសហរដ្ឋអាមេរិកនៅក្នុងការធ្វើសង្គ្រាមប្រឆាំងក្រុមភេរវជន តាំងពីសង្គ្រាមនៅអ៊ីរ៉ាក់ និងបច្ចុប្បន្នអង់គ្លេសក៏កំពុងជួយទម្លាក់គ្រាប់ប្រឆាំងក្រុមរដ្ឋឥស្លាមនៅអ៊ីរ៉ាក់ថែមទៀតផង។ ចំណែកទាក់ទិនករណីវាយប្រហារទស្សនាវដ្តីត្លុកនៅបារាំង អាមេរិក និងអង់គ្លេសបានប្រកាន់ជំហររួមគ្នាគាំទ្របារាំងដើម្បីប្រយុទ្ធប្រឆាំងតទល់ជាមួយក្រុមភេរវជន៕
© រក្សាសិទ្ធិដោយ thmeythmey.com