ពីនេះ ពីនោះ
អន្តរជាតិ
ស្ត្រីអាមេរិកម្នាក់សម្រាលកូន ១ម៉ោងក្រោយពេទ្យពិនិត្យឃើញថានាងមានផ្ទៃពោះ
×
វាជារឿងមួយដែលមិនគួរឲ្យជឿ តែវាបានកើតឡើងទៅលើស្ត្រីម្នាក់ ដែលរស់នៅក្នុងរដ្ឋMassachusetts សហរដ្ឋអាមេរិក នៅពេលដែលនាងមានអាការៈឈឺក្នុងពោះ ហើយនាងត្រូវបានមិត្តប្រុសជូនទៅពិនិត្យនៅមន្ទីរពេទ្យ។ លទ្ធផលនៃការពិនិត្យបង្ហាញថា នាងមានផ្ទៃពោះ ៩ ខែហើយ ខណៈពេលដែលនាងមិនដែលមានអារម្មណ៍ថា ខ្លួនចាញ់កូនឬមានអ្វីប្លែកក្នុងខ្លួននោះ។ នេះបើយោងតាមកាសែត New York Daily News ។
កាសែតដដែលនេះបានផ្សាយថា ក្រោយពេលដែលគ្រូពេទ្យពិនិត្យឃើញថា នាង Katherine Kropasមានផ្ទៃពោះហើយនោះ មិត្តប្រុសរបស់នាងគឺលោក Dan Keefeបានប្រាប់ឪពុកម្តាយរបស់នាង ឲ្យនាំនាងទៅកាន់មន្ទីរពេទ្យ។ រយៈពេល ១ ម៉ោងក្រោយមក នាង Katherine សម្រាលបានកូនស្រីម្នាក់ ទម្ងន់ ៤,៦ គីឡូក្រាម ហើយគ្រូពេទ្យបានបញ្ជាក់ថា ទាំងម្ដាយ និងទារក គឺមានសុខភាពល្អធម្មតាទេ។
រឿងរ៉ាវនេះបានកើតឡើងកាលពីថ្ងៃព្រហស្បិ៍សប្ដាហ៍មុន នៅពេលដែលនាង Katherine អាយុ ២៣ ឆ្នាំ រស់នៅក្នុងទីក្រុង Weymouthរដ្ឋMassachusetts មានការឈឺចាប់ក្នុងពោះរបស់នាង ហើយនាងបានហៅមិត្តប្រុសរបស់នាង ឲ្យជូនទៅមន្ទីរពេទ្យ។ ក្រោយមកគ្រូពេទ្យបានប្រាប់នាងថា នាងមានផ្ទៃពោះ ៩ ខែហើយ រយៈពេល មួយម៉ោងក្រោយមក នាងបង្កើតបានកូនស្រីមួយដ៏ស្រស់ស្អាត។
នាង Katherine បានប្រាប់កាសែតខាងលើថា នាងគ្មានអារម្មណ៍ថា ខ្លួនមានផ្ទៃពោះនោះទេព្រោះថា ក្នុងខ្លួនរបស់នាងគឺគ្មានអាការៈប្លែកអ្វីទាល់តែសោះ សូម្បីតែការចាញ់កូន។ នៅមុនពេលមានកូននេះ នាងនិងមិត្តប្រុស ធ្លាប់បានពិភាក្សាគ្នាថា ចង់បានកូនម្នាក់នៅថ្ងៃណាមួយ ហើយពេលនេះ នាងមានកូនទាំងមិនដឹងខ្លួន ដែលធ្វើឲ្យនាងមានអារម្មណ៍រំភើបជាខ្លាំង៕
© រក្សាសិទ្ធិដោយ thmeythmey.com