ជាតិ
ពីនេះ ពីនោះ
កំណាព្យ៖ រឿងរបស់គ្រូ និងសិស្ស
× កំណាព្យ
រឿងរបស់គ្រូ និងសិស្ស
(បទពុំនោល)
-ធ្វើគ្រូត្រូវស៊ូក្រ បើខ្លាចក្រកុំធ្វើគ្រូ
គ្រូល្អប្រពន្ធល្អូ បើមិនស៊ូគ្រូកុំធ្វើ។
-កូនគេរៀនចេះដឹង ហ្នែ៎កូននឹងឆ្លាតគ្រាន់បើ
ពូជគេមិនដែលភ្លើ ឆ្លាតពីលើដល់កូនចៅ។
-បើកូនល្ងង់ល្ងិតល្ងល់ មិនសូវយល់គ្រូប្រដៅ
ដល់ផ្ទះពុកម៉ែហៅ សួរមើលទៅមិនសូវចេះ។
-គេដៀលថានេះហ្នែ៎ ល្ងង់ព្រោះតែគ្រូមិនផេះ
កូនគេរៀនមិនចេះ រៀនមិនខ្មេះមកពីគ្រូ។
-សិស្សឆ្លាតមកពីពូជ? សិស្សខិលខូចមកពីគ្រូ?
សិស្សល្ងង់រៀនមិនស៊ូ មកពីគ្រូរៀនមិនកើត។
-រឿងនឹងគួរពិចារ តើអ្នកណាមិនកំណើត?
កូនសិស្សរៀនមិនកើត ឬសស្លើតមកពីគ្រូ?
-បើសិស្សណារៀនឆ្លាត រៀនសង្វាតដោយតស៊ូ
គ្មានអ្នកសរសើរគ្រូ តែនឹងល្អូរកូនល្ងិតល្ងង់។
-រឿងនឹងគិតឲ្យដល់ កុំសល់វ៉ល់នាំឲ្យលង់
កូនចៅមានពូជពង្ស កូនឆ្លាតល្ងង់មានតក់នៀល។
-កូនឆ្លាតស្រួលបង្រៀន ស្រួលប្រិតប្រៀនប្រដៅដៀល
កូនល្ងង់មិនននៀល ច្រើនត្រាប់ពាលឫកមិនល្អ។
-ដូច្នេះកុំដៀលគ្រូ ត្រូវគិតគូរដោយចំហ
កូនអាក្រក់ឬល្អ កូនបង្កខូចពូជផៅ។
-បើផ្តេកផ្តួលលើគ្រូ គាត់តស៊ូបង្រៀនទៅ
បង្រៀនតកូនចៅ ផុតល្ងង់ខ្លៅទៅជាចេះ។
-យ៉ាងណាគាត់ជាគ្រូ ផ្តល់គំរូផ្ទេរចំណេះ
ឲ្យយើងបានរៀនចេះ កុំប្រហែសភ្លេចគុណគ្រូ៕
និពន្ធដោយ៖ វិឆ័យ សុភី
© រក្សាសិទ្ធិដោយ thmeythmey.com