ជាតិ
ឧទ្ធរណ៍បដិសេធការសុំនៅក្រៅឃុំរបស់ឪពុកម្តាយ ថោង សារ៉ាត់
× លោក ឃុន លាងម៉េង ប្រធានក្រុមប្រឹក្សាជំនុំជម្រះនៃសភាស៊ើបសួរសាលាឧទ្ធរណ៍ នាព្រឹកថ្ងៃអង្គារ ទី២០ ខែមករា នេះ បានចេញដីកាបដិសេធការសុំនៅក្រៅឃុំរបស់លោក ថោង ចំរើន និងអ្នកស្រី កែវ សារី ដែលជាឪពុករបស់ឧកញ៉ា ថោង សារ៉ាត់។
លោក ថោង ចំរើន និងអ្នកស្រី កែវ សារី ត្រូវបានចាប់ខ្លួនកាលពីយប់ថ្ងៃទី៣ ខែធ្នូ ឆ្នាំ២០១៤ ជាមួយមនុស្សប្រមាណ១០នាក់ទៀតក្នុងសំណុំរឿងទាក់ទងនឹងការសម្លាប់លោកឧកញ៉ា អ៊ឹង ម៉េងជឺ នៅកណ្តាលរាជធានីភ្នំពេញកាលពីថ្ងៃទី២២ ខែវិច្ឆិកា ឆ្នាំ២០១៤ ដោយអាជ្ញាធរបានចោទ លោក ថោង សារ៉ាត់ ម្ចាស់បុរី៩៩៩ ថា ជាមេខ្លោង។
ក្រោយមក សាលាដំបូងបានសម្រេចឃុំខ្លួនលោក ថោង ចំរើន និងអ្នកស្រី កែវ សារី រួមទាំងអង្គរក្ស៥នាក់ទៀត។ អង្គរក្សទាំងបួនត្រូវបានតុលាការចោទពីបទឃាតកម្មគិតទុកជាមុន។
លោក ថោង សារ៉ាត់ តាមរយៈឃ្លីបវីដេអូពីកន្លែងរត់គេចខ្លួន បានបដិសេធនូវការចោទប្រកាន់របស់អាជ្ញាធរ និងតុលាការ។ លោកបានអះអាងថា ខ្លួនមិនដែលមានការងាររកស៊ីជាប់ពាក់ព័ន្ធជាមួយលោក អ៊ឹង ម៉េងជឺនោះឡើយ។
លោក ស៊ី សត្យា មេធាវីឪពុកម្តាយ លោក ថោង សារ៉ាត់ បានចាត់ទុកការសម្រេចរបស់សាលាឧទ្ធរណ៍ថា ជារឿងអយុត្តិធម៌។ លោកនៅតែទាមទារឲ្យកូនក្តីរបស់លោកស្ថិតនៅក្រៅឃុំ ជាពិសេសលោក ថោង ចំរើន ដែលមានជំងឺថ្លើមដ៏ធ្ងន់ធ្ងរ៕
© រក្សាសិទ្ធិដោយ thmeythmey.com