ពីនេះ ពីនោះ
ខុង ជឺ៖ ធ្វើមន្ត្រីចំណេញ ៣យ៉ាង
× ដកស្រង់ចេញពីសៀវភៅ ខុង ជឺ ដែលប្រែសម្រួលដោយលោក គឹម ចាន់ណា និងបោះពុម្ពដោយគ្រឹះស្ថានបោះពុម្ពផ្សាយ Mind Books។
ខុង ជឺ បានជួបជាមួយកូនប្រុសរបស់បងធំគាត់ឈ្មោះ ខុង មៀ ជានាម៉ឺនជាមួយនឹង ម៉ីជឺជាន ហើយគាត់បានសួរថា៖ «តាំងពីឡើងធ្វើជានាម៉ឺនមក តើពួកឯងបានចំណេញអ្វីខ្លះ ហើយខាតអ្វីខ្លះ?»
ខុង មៀ ឆ្លើយថា៖«គ្មានចំណេញអីទេ! ខ្ញុំត្រូវខាតអស់៣យ៉ាងគឺ៖ ១ ថ្នាក់លើប្រើមិនឈប់ឈរ រវល់តែនឹងការងាររហូតរកពេលសិក្សារៀនសូត្របន្ថែមមិនកើត។ អ្វីៗដែលរៀនពីមុនមក ក៏ភ្លេចអស់បណ្តើរៗ ។ ២ ប្រាក់បៀវត្សរ៍តិចតួច ជួយសង្គ្រោះសាច់ញាតិបងប្អូនមិនបាន ញាតិសន្តានកាន់តែឃ្លាតឆ្ងាយបន្តិចម្តងៗ ។ ៣ ការងាររាជការរវល់ខ្លាំងណាស់ មិនសូវមានឱកាសជួបមិត្តភក្តិប៉ុន្មានទេ»។
ខុង ជឺ ស្តាប់ហើយមិនសូវសប្បាយចិត្តទើបសួរទៅ ម៉ីជីជាន ពីសំណួរដដែល។
ម៉ីជីជាន ឆ្លើយថា៖«តាំអពីក្លាយជានាម៉ឺនមក មិនដែលខាតបង់អ្វីទេ។ មានតែបានចំណេញ៣យ៉ាង៖១ ចំណេះដឹងដែលលោកគ្រូបង្រៀនពីកាលមុននោះ ខ្ញុំមានឱកាសបានយកទៅប្រតិបត្តិ និងដកពិសោធ ហើយទទួលបានផលល្អណាស់។ ២ ប្រាក់បៀវត្សរ៍ប្រចាំខែដែលទទួលបានខ្ញុំក៏បែងចែកទៅឲ្យសាច់ញាតិ សាច់ញាតិបងប្អូនក៏ស្រឡាញ់រាប់អានកាន់តែខ្លាំងលើសដើម។ ៣ ទោះជាការងាររវល់ប៉ុណ្ណា ក៏មិនមានផលប៉ះពាល់ដល់ទំនាក់ទំនងជាមួយមិត្តភក្តិអ្វីដែរ មានតែបានជួបគ្នាច្រើនជាងមុន កាន់តែមមាញឹក ក៏កាន់តែមានទំនាក់ទំនងច្រើន មិត្តភាពកាន់តែល្អជាងមុន»។
ខុង ជឺ ដង្ហើមពោលថា៖«ចាត់ទុកថាជា វិញ្ញូជនពិតប្រាកដ! នរណាថា នគរលូគ្មានវិញ្ញូជន? បើនគរលូ គ្មានវិញ្ញូជន តើម៉ីជីជាន បានគំនិតនេះមកពីណាមក»?
© រក្សាសិទ្ធិដោយ thmeythmey.com